Psa 51 | LinMNB | STEP | Nzembo ya Davidi. Wuta na buku ya mokambi ya bayembi.

‏ Psalms 51

Nasali masumu epai na Yo

1 ^{▼▼51:1 in some Bibles.} Nzembo ya Davidi. Wuta na buku ya mokambi ya bayembi. 2 ^{▼▼51:Title in some Bibles.} Eyembamaki tango mosakoli Natan akomaki epai ya Davidi sima na ye kosala ekobo elongo na Batisheba.

3 ^{▼▼51:1 in most Bibles.} Oh Nzambe, yokela ngai mawa
kolanda bolingo monene na Yo ;
longola masumu na ngai
kolanda mawa monene na Yo !
4 ^{▼▼51:2 in most Bibles.} Sukola ngai mobimba
mpo na kolongola mabe na ngai,
mpe petola ngai na masumu na ngai.

5 ^{▼▼51:3 in most Bibles.} Pamba te nayebi mabe na ngai,
mpe masumu na ngai ezalaka
tango nyonso liboso na ngai.
6 ^{▼▼51:4 in most Bibles.} Epai na Yo, epai na Yo kaka,
nasali masumu mpe mabe na miso na Yo.
Boye, okozala sembo tango okozwa mokano,
mpe okozala na pamela te tango okokata makambo.
7 ^{▼▼51:5 in most Bibles.} Solo, nabotamaki kati na lisumu ;
wuta na libumu ya mama na ngai,
nazali mosumuki.
8 ^{▼▼51:6 in most Bibles.} Nzokande Yo, osepelaka na bosembo,
ata kati na libumu ;
mpe okoteya ngai bwanya
kati na esika ebombama.

9 ^{▼▼51:7 in most Bibles.} Petola ngai na nzela ya izope,
mpe nakokoma peto ;
sukola ngai, mpe nakokoma pembe
koleka mvula ya pembe.
10 ^{▼▼51:8 in most Bibles.} Sepelisa ngai mpe yokisa ngai nsayi na motema ;
mpe mikuwa na ngai oyo obukaki
ekosepela makasi.
11 ^{▼▼51:9 in most Bibles.} Kotala lisusu masumu na ngai te,
mpe longola bambeba na ngai nyonso.

12 ^{▼▼51:10 in most Bibles.} Oh Nzambe, mpo na ngai, kela motema ya peto ;
mpe kati na ngai, yeisa molimo sika mpe elenda.

13 ^{▼▼51:11 in most Bibles.} Kobengana ngai te mosika ya elongi na Yo,
mpe kolongola te kati na ngai
Molimo Mosantu na Yo.
14 ^{▼▼51:12 in most Bibles.} Zongisela ngai esengo ya lobiko na Yo,
mpe kabela ngai molimo oyo emibongisi malamu
mpo na kolendisaka ngai.

15 ^{▼▼51:13 in most Bibles.} Nakoteya banzela na Yo epai ya babuki mibeko,
mpe bato ya masumu bakozonga epai na Yo.
16 ^{▼▼51:14 in most Bibles.} Oh Nzambe ! Nzambe, Mobikisi na ngai,
kangola ngai wuta na mokumba ya makila,
mpe lolemo na ngai ekosakola bosembo na Yo.
17 ^{▼▼51:15 in most Bibles.} Nkolo, fungola bibebu na ngai,
mpe monoko na ngai ekokumisa Yo.
18 ^{▼▼51:16 in most Bibles.} Mpo ete osepelaka na mbeka te,
nakobonza te mbeka ya kotumba
oyo ondimaka te.
19 ^{▼▼51:17 in most Bibles.} Nzambe, bambeka oyo osepelaka na yango ezali :
molimo oyo ebukani.
Nzambe, oyinaka te motema oyo etutami mpe emikitisi.

20 ^{▼▼51:18 in most Bibles.} Na ngolu na Yo, salela Siona bolamu,
tonga bamir ya Yelusalemi.
21 ^{▼▼51:19 in most Bibles.} Bongo okosepela na bambeka ya bosembo,
bambeka ya kotumba mpe makabo ya kokoka ;
mpe bangombe ya mibali ekobonzama na bitumbelo na Yo.