Psa 63 | LinMNB | STEP | Nzembo ya Davidi. Ayembaki yango tango azalaki kati na esobe ya Yuda.

‏ Psalms 63

Boboto ya Nzambe eleki bomoi na motuya

1 ^{▼▼63:1 in some Bibles.} Nzembo ya Davidi. Ayembaki yango tango azalaki kati na esobe ya Yuda.

2 ^{▼▼63:1 in most Bibles.} Oh Nzambe, ozali Nzambe na ngai ;
nazali koluka Yo,
molimo na ngai ezali na posa na Yo,
bomoi na ngai ezali na posa na Yo makasi,
kati na mabele ekawuka mpe ezanga mayi.

3 ^{▼▼63:2 in most Bibles.} Natalaki Yo kati na Esika ya bule
mpo na komona makasi mpe nkembo na Yo.
4 ^{▼▼63:3 in most Bibles.} Pamba te bolingo na Yo ezali malamu koleka bomoi,
bibebu na ngai ekosanzola Yo.
5 ^{▼▼63:4 in most Bibles.} Boye, nakopambola Yo bomoi na ngai mobimba,
nakotombola maboko na ngai
mpo na lokumu ya Kombo na Yo.
6 ^{▼▼63:5 in most Bibles.} Nakotonda lokola moto oyo asili kolia
misuni kitoko mpe mafuta ;
bibebu na ngai ekoganga na esengo
mpe monoko na ngai ekokumisa Yo.

7 ^{▼▼63:6 in most Bibles.} Soki nakanisi Yo na mbeto na ngai,
nasambelaka Yo na butu ;
8 ^{▼▼63:7 in most Bibles.} pamba te ozali lisungi mpo na ngai,
mpe nagangaka na esengo
wana nazali na se ya elili ya mapapu na Yo.
9 ^{▼▼63:8 in most Bibles.} Nakangami na Yo ;
loboko na Yo ya mobali esimbi ngai makasi.

10 ^{▼▼63:9 in most Bibles.} Bato oyo balukaka koboma ngai
bakozinda na mabele
11 ^{▼▼63:10 in most Bibles.} Bakoboma bango na mopanga
mpe bakokoma bilei ya bambwa ya zamba.

12 ^{▼▼63:11 in most Bibles.} Kasi mokonzi akosepela kati na Nzambe ;
moto nyonso oyo alapaka ndayi
na Kombo ya Nzambe
akomikumisa mpo na yango,
pamba te minoko ya bakosi ekokangama.