Psa 88 | LinMNB | STEP | Wuta na buku ya mokambi ya bayembi. Nzembo ya bana ya Kore. Ezali ya koyemba na flite. Nzembo ya Emani, moto ya Ezera.

‏ Psalms 88

Libondeli ya moto oyo akomi pene ya kokufa

1 ^{▼▼88:1 in some Bibles.} Wuta na buku ya mokambi ya bayembi. Nzembo ya bana ya Kore. Ezali ya koyemba na flite. Nzembo ya Emani, moto ya Ezera.

2 ^{▼▼88:1 in most Bibles.} Yawe, ozali Nzambe ;
Yo nde obikisaka ngai !
Butu mpe moyi, nagangaka epai na Yo !
3 ^{▼▼88:2 in most Bibles.} Tika ete losambo na ngai ekoma epai na Yo ;
Yoka koganga na ngai !

4 ^{▼▼88:3 in most Bibles.} Pamba te bomoi na ngai etondi na pasi
mpe nakomi pene ya kokufa.
5 ^{▼▼88:4 in most Bibles.} Batie ngai na molongo ya bato
oyo bazali kokende na kunda ;
nakeseni ata moke te na moto
oyo azali lisusu na makasi te.
6 ^{▼▼88:5 in most Bibles.} Nakomi moko kati na bakufi,
lokola bato oyo basila kokufa na bitumba
mpe bazali sik’oyo kati na kunda,
lokola bato oyo okanisaka lisusu te,
pamba te obatelaka bango lisusu te.

7 ^{▼▼88:6 in most Bibles.} Obwaki ngai na libulu ya mozindo makasi,
kati na mozindo ya molili.
8 ^{▼▼88:7 in most Bibles.} Kanda na Yo ya makasi ekweyeli ngai,
bambonge na yango nyonso ezali konyokola ngai.

9 ^{▼▼88:8 in most Bibles.} Okaboli ngai na balingami na ngai ya motema,
okomisi ngai eloko ya nkele na miso na bango ;
nakomi lokola mokangami kati na boloko,
nakoki kobima te !
10 ^{▼▼88:9 in most Bibles.} Miso na ngai ezali komona lisusu te mpo na pasi ;
nzokande nabelelaka Yo, Yawe,
mikolo nyonso,
natombolaka maboko na ngai epai na Yo !

11 ^{▼▼88:10 in most Bibles.} Boni, okosala bikamwa mpo na bakufi ?
Boni, bakufi bakoki kotelema
mpo na kosanzola Yo ?

12 ^{▼▼88:11 in most Bibles.} Boni, bolingo na Yo etatolamaka kati na kunda,
mpe bosembo na Yo, kati na mboka ya bakufi ?
13 ^{▼▼88:12 in most Bibles.} Boni, bikamwa na Yo eyebani kati na molili,
mpe bosembo na Yo, kati na mokili
ya bato oyo babosana ?

14 ^{▼▼88:13 in most Bibles.} Kasi ngai, nazali kobelela nde Yo, Yawe ;
nabondelaka Yo tongo nyonso.
15 ^{▼▼88:14 in most Bibles.} Yawe, mpo na nini kobwaka ngai
mpe kobombela ngai elongi na Yo ?

16 ^{▼▼88:15 in most Bibles.} Wuta bolenge na ngai,
nazali mobola mpe moto na pasi ;
mpe okweyiselaka ngai makambo na Yo ya somo !
Solo, elikya esili ngai !
17 ^{▼▼88:16 in most Bibles.} Kanda makasi na Yo ebetaka ngai,
minyoko oyo ewutaka epai na Yo
ekomisaka ngai moto pamba.
18 ^{▼▼88:17 in most Bibles.} Ezingelaka ngai mikolo nyonso,
lokola mayi, na bangambo nyonso.
19 ^{▼▼88:18 in most Bibles.} Okaboli ngai na baninga mpe balingami na ngai,
natikali na moninga kaka moko ya motema : molili !