‏ Psalms 105

Nzambe azali sembo

1 Bozongisa matondi na Yawe, bobenga kombo na ye ;
boyebisa na kati na bikolo oyo ye asalaki.

2 Boyembela ye, boyemba masanzoli epai na ye ;
bolobela misala na ye nyonso ya kokamwa.

3 Nkembo kati na kombo na ye ya bosantu ;
tika ete mitema ya
baoyo balukaka Yawe esepeka.

4 Botala epai ya Yawe mpe epai na makasi na ye ;
boluka tango nyonso elongi na ye.

5 Bokanisa misala ya kokamwa oyo ye asalaki,
makamwisi na ye,
mpe kosambisa oyo alobaki ;

6 e bana ya bana ya Abraham, mosali na ye ;
e bana ya Zakobi, bato oyo ye apona.

7 Ye azali Yawe Nzambe na biso ;
kosambisa na ye ezali na mokili mobimba.

8 Akanisaka tango ya Boyokani na ye ; libela na libela ;
liloba oyo apesaki mitindo mpo na bato ya batango nkoto ;

9 Boyokani oyo osalaki na Abraham,
ndayi oyo alapaki na Izaki.

10 Alendisaki yango mpo Zakobi lokola ekateli,
mpo na Isayele lokola Boyokani ya libela :

11 “na yo nakopesa mabele ya Kanana ;
tokola ndambo ya libula oyo okozwa !”

12 Tango bazalaki talo moke,
moke penza, mpe bapaya na mokili yango ;

13 bazalaki koyenga-yenga na ekolo na ekolo
wuta na bokonzi moko na oyo mosusu.

14 Apesaki nzela na moto ata moko te
mpo aniokola bango ;
mpo na bango apamelaki bakonzi :

15 “Bosimba te bapakolami na ngai
bosala baprofeta na ngai mabe te !”

16 Abengisaki nzala monene na mabele,
mpe abebisaki biloko na bango nyono ya kolia
oyo babombaki

17 Mpe atindaki moto moko liboso na bango,
Zozefi, oyo batekaki lokola mowumbu.

18 Bakangaki makolo na ye na minyololo
kingo na ye batiaki na bibende

19 kino tango makambo oyo ye alobaki ekokaki ;
kino tango maloba ya Yawe emonisaki polele
ete Zozefi alobaki solo.

20 Mokonzi atindaki mpe bafungolaki ye,
mokambi atikaki ye na bonsomi.

21 Atiaki ye mokonzi ya ndako na ye,
mokambi likolo ya nyonso oyo azalaki na yango ;

22 mpo alakisa bana ya bakonzi na ye
ndenge ye moko alingi ;
mpe ateya bampaka na ye bwanya.

23 Bongo Isayele akotaki na Ezipito ;
Zakobi avandaki lokola mopaya
na mabele ya Sham.

24 Yawe asalaki ete bato na ye babotama mingi,
akomisaki bango mingi koleka bayini na bango.

25 Oyo mitema abalusaki mpo bayina bato na ye.
Mpo na kosalela basali na ye likita.

26 Atindaki Moyize, mosali na ye,
mpe Aron oyo ye apona.

27 Basalaki bilembo ya kokamwa na kati na bango,
makambo ya kokamwa na ye na mabele ya Sham.

28 Atindaki molili, mpe akomisaki mabele molili ;
mpo batombokelaki maloba na ye te ?

29 Abongolaki mayi na bango na makila,
abomaki bambisi na bango.

30 Mabele na bango etondaki na magorodo,
oyo ekotaki kino na basambele ya bakambi na bango.

31 Alobaki,
mpe banzinzi oyo ezali na puazo eyaki,
mpe bangungi na mboka mobimba.

32 Abulusaki mbulana bango na mbula ya mabanga
na kake na mabele na bango ;

33 Akweyisaki banzete na bango ya vino
mpe banzete na bango ya figi ;
mpe abukaki banzete ya mboka na bango.

34 Alobaki, mpe mankonko eyaki,
oyo bakoki kotanga te.

35 Eliaki matiti nyonso ya mobesu ya mokili na bango,
eliaki bambuma ya mabele na bango.

36 Bongo abomaki bana nyonso ya liboso na mokili na bango,
bambuma ya liboso ya makasi na bango.

37 Abimisaki Isayele, na mokumba ya bapalata mpe ya wolo ;
mpe wuta na mabota na bango moko te atiaki tembe.

38 Ezipito ezalaki na esengo
tango babimaki ;
pamba te bazalaki na somo mingi
mpo na Isayele.

39 Atandaki lipata mpo na kozipa bango,
mpe moto mpo na kotia mwinda na butu.

40 Basengaki, mpe amemelaki bango bandeke “Kayi”
mpe atondisaki bango na mapa ya Likolo.

41 Afungolaki libanga, mpe mayi ebimaki ;
lokola ebale
yango etiolaki kati na esobe.

42 Pamba te akanisaki elaka na ye ya bosantu,
oyo apesaki na mosali na ye Abraham.

43 Abimisaki bato na ye,
na esengo nyonso ;
bato na ye apona,
na makelele ya esengo ;

44 Apesaki bango mabele ya bikolo ;
mpe bazwaki libula bamisusu basalaki ;

45 mpo ete bakokaki kobatela makebisi na ye,
mpe kotosa Mibeko na ye.
Sanzola Yawe !