Amo 2 | LuoMLM | STEP | Jehova Nyasaye wacho niya, “Nikech richo adek ma jo-Moab osetimo, kata richo angʼwen, omiyo ok abi weyo ma ok akumogi. Nikech ne giwangʼo choke mag ruodh Edom molokore buru,

‏ Amos 2

1 Jehova Nyasaye wacho niya, “Nikech richo adek ma jo-Moab osetimo, kata richo angʼwen,
omiyo ok abi weyo ma ok akumogi.
Nikech ne giwangʼo
choke mag ruodh Edom molokore buru,
2 kuom mano abiro oro mach e piny Moab
mondo owangʼ kuonde mochiel motegno mag Kerioth.
Jo-Moab biro tho ei lweny mager,
ka jolweny giyo sigich lweny kendo tungʼ ywak.
3 Abiro nego ruodh Moab
kaachiel gi jotend pinyno duto,”
Jehova Nyasaye owacho.

4 Jehova Nyasaye wacho niya, “Nikech richo adek ma jo-Juda osetimo, kata richo angʼwen,
omiyo ok abi weyo ma ok akumogi.
Nikech gisetamore rito chike Jehova Nyasaye
kod buchene,
kendo osewuondgi
mi gisebaro giluwo bangʼ nyiseche manono mag kweregi,
5 kuom mano abiro oro mach e piny Juda,
kod kuonde mochiel motegno mag Jerusalem.”

Bura ma ibiro ngʼadne jo-Israel

6 Jehova Nyasaye wacho niya, “Nikech richo adek ma jo-Israel osetimo, kata richo angʼwen,
omiyo ok abi weyo ma ok akumogi.
Nikech ungʼiewo joma kare gi fedha,
to joma odhier ma ok nyal chudo, to ungʼiewo gi pat pat.
7 Unyono jochan piny mana ka buru
kendo ok ungʼad bura makare,
ne joma odhier.
Wuowi gi wuon mare terore gi nyako achiel
kendo udwanyo Nyinga Maler.
8 Ginindo piny
e lewni mosing but kende mag misango.
Divai ma gikawo kuom joma gigoyo faini
gimadho e od nyasachgi.

9 “Ne atieko jo-Amor mana ka gineno,
kata obedo nine gin roboche ka yiend sida,
kendo roteke ka yiend ober.
Ne aketho olembene
kod tiendene!
10 Ne agolou e piny Misri,
mi atelonu higni piero angʼwen e thim,
ni mondo amiu piny jo-Amor.

11 “Ne awalo yawuotu mondo obed jonabi,
to moko e dieru naketo mondo obed jo-Nazir.
Donge mano en adier, yaye jo-Israel?”
Jehova Nyasaye owacho.
12 “Ne umiyo jo-Nazir omadho divai,
kendo nukwero jonabi ni kik gikor wach.

13 “Sani koro abiro diyou piny kama untie,
mana ka cham mopongʼo gari mayiecho gari.
14 Joma ongʼeyo ngʼwech sani koro ok bi tony,
joma rateke abiro keto bedo mool,
bende nyaka jalweny manenore ni ger ok bi konyo ngimane.
15 Kata jadir asere ok noyud thuolo mar ringo,
kendo jangʼwech ma jalweny ok noresre,
kaachiel gi jalweny moidho faras bende ok notony.
16 To kata mana jolweny mathuondi moloyo
noring duge chiengʼno,”
Jehova Nyasaye owacho.