‏ Ecclesiastes 3

Gimoro amora nigi kindene

1Nitiere kinde mar gimoro amora,
kod thuolo mitimoe tich moro ka moro e bwo polo:

2kinde mar nywol kod kinde mar tho,
kinde mar pitho kod kinde mar putho,
3kinde mar nek kod kinde mar chang,
kinde mar muko kod kinde mar gero,
4kinde mar kuyo kod kinde mar mor,
kinde mar ywak kod kinde mar miel,
5kinde mar keyo kite kod kinde mar chokogi,
kinde mar kwakruok kod kinde mar weyo kwakruok,
6kinde mar dwaro gimoro kod kinde ma gimoro lalie,
kinde mar kano gimoro kod kinde mar wito gimoro,
7kinde mar yiecho gimoro kod kinde mar twangʼo,
kinde mar lingʼ kod kinde mar wuoyo,
8kinde mar hera kod kinde mar sin,
kinde mar lweny kod kinde mar kwe.

9En ohala mane ma jatich yudo kuom tich matek? 10Aseneno tingʼ mapek ma Nyasaye oseketo kuom ji. 11Oseketo gik moko duto obedo maber e kindegi. Oseketo ngima mochwere e chuny ji; kata kamano ok ginyal paro matut gima Nyasaye osetimono aa chakruok nyaka giko. 12Angʼeyo ni onge gino maber ne ji moloyo bedo mamor kendo mondo gitim maber kapod gingima. 13Wan duto wanyalo chiemo kendo metho, kendo wabed mamor e tijewa. Ma en mich moa kuom Nyasaye. 14Angʼeyo ni gimoro amora ma Nyasaye timo osiko manyaka chiengʼ, onge gima inyalo mede kata inyalo gol kuome. Nyasaye timo kamano mondo omi ji oluore. 15Mantiere sani nosebedo,
kendo mano mabiro bedo nosebedo chon;
kendo Nyasaye biro kelo gik machon e kar ngʼado bura.

16Kendo ne aneno gimachielo e bwo wangʼ chiengʼ: Kama adiera gi ngʼado bura makare onego bedie,
to richo ema bedoe.

17Ne aparo e chunya niya, “Nyasaye biro ngʼado bura ni jo-ratiro
kaachiel gi joma richo,
nikech gimoro ka gimoro
ni kod sane.”

18Bende ne achako aparo niya, “Nyasaye temo dhano mondo gine ni gichalo gi le. 19Giko mar dhano gi le en ni gimoro achiel ochomogi duto machalre. Kaka achiel tho e kaka machielo bende. Giduto giyweyo machalre; dhano ok winj maber maloyo le. Gik moko duto onge tiendgi. 20Giduto gidhi kamoro achiel; giduto gia e lowo, kendo giduto gidok e lowo. 21En ngʼa mongʼeyo ka chuny dhano dum dhi malo to chuny le ridore dhi e lowo?”

22Omiyo ne aneno ni onge gima ber ni dhano moloyo tichne, nikech mano e pokne. Kare en ngʼa manyalo keche mondo one gima biro timorene bangʼe kosetho?