‏ Hosea 9

Kum ne jo-Israel

1Kik umor, yaye Israel;
bende kik ubed gi ilo kaka ogendini mamoko.
Nimar ok usebedo jo-adiera ne Nyasachu;
usehero chudo mar ochot michulougo,
e kuonde dino cham.
2Kuonde ma idinoe cham kod kuonde mibiyoe divai ok nopidh ji;
kendo divai manyien ok nokonygi.
3Ok ginidongʼ e piny Jehova Nyasaye;
Efraim nodog Misri,
kendo ginicham chiemo ma ok opwodhi e piny Asuria.
4Ok gini olne Jehova Nyasaye misango mar divai,
bende misengini ma gichiwo ok nomor Jehova Nyasaye ngangʼ.
Misengini machalo kamano nochal negi mana kaka chiemb joma ywak;
kendo jogo mochamogi nobed mogak.
Chiemoni nobed margi giwegi;
omiyo ok nokele e hekalu mar Jehova Nyasaye.

5Unutim angʼo e odiechiengu mowal mar nyasi,
kata ka odiechienge nyasi mar Jehova Nyasaye ochopo?
6Kata ka gitony e kethruok,
Misri nochokgi,
kendo Memfis noikgi.
Mwandu mag fedha noum gi pedo
kendo kuthe noum hembegi.
7Kinde mag kum biro
kendo kinde mag ngʼado bura osechopo.
Omiyo jo-Israel nyaka ngʼe wachni.
Nikech richou ngʼeny
kendo kinyou lich miwuoro,
janabi ikwano ka ngʼama ofuwo,
to ngʼat matiyo gi much Nyasaye ka janeko.
8Janabi, kaachiel gi Nyasacha
e jarit mar Efraim,
kata kamano obadho rite e yorene duto,
kendo akweda bende rite e od Nyasache.
9Gisedonjo matut e timbe mag miganga
mana ka ndalo mag Gibea.
Nyasaye nopar timbegi mamono
kendo enokumgi e richogi.

10“Kane ayudo Israel
ne ochalo mana kayudo olemb mzabibu e piny motwo,
kane aneno kwereu,
ne chalo mana ka gima aneno olemo monyak mokwongo mar ngʼowu.
To kane gibiro Baal Peor,
negichiwore lamo nyiseche manono makwodo wich,
kendo negibedo modwanyore mana ka gima ne giherono.
11Duongʼ mar Efraim noweye mana ka winyo ma huyo mi lal nono,
omiyo ok ginichak ginywol nyithindo,
mondegi ok nobed ma yach kendo onge nyathi manomak ichne.
12Kata ka gipidho nyithindo,
to namigi gibed gi kuyo kuom moro ka moro.
Okwongʼ-gi,
ka alokora mi ajwangʼogi!
13Aseneno Efraim, mana kaka ne aneno Turo,
ka opidhi kama omiyo,
to Efraim nokel nyithinde
ni janek.”

14Chiwnegi, yaye Jehova Nyasaye,
en angʼo ma dimigi?
Migi mana iye magore piny
kendo thunde motwo.

15“Nikech timbegi mag anjawo e Gilgal,
ne ok aherogi kanyo.
Nikech timbegi mag richo,
abiro riembgi oko e oda.
Ok anachak ahergi;
jotendgi duto gin joma timbegi richo.
16Midekre osemako Efraim,
kendo tiendene ner,
ok ginyag olemo.
Kata ka ginywolo nyithindo,
to ananeg nyithindgi ma gihero ahinyago.”

17Nyasacha nokwedgi
nikech ok gisewinje,
ginibedi joma tangni e dier ogendini.