‏ Isaiah 10

1Yaye, unune malit un joma loso chike ma ok nikare,
un joma keto chike maricho mathiro ji,
2utamo joma odhier e adieragi
kendo umayo joga ma ochando gik ma onego giyudi,
omiyo umayo mon ma chwogi otho kendo uyako gige nyithind kiye.
3To initim angʼo chiengʼ ngʼado bura,
ka masira nowuog kuma bor?
To en ngʼa manuring udhi ire mondo okonyu?
Mwandu magu to unuwe kanye?
4Onge gima nodongʼ makmana kirni e nyim joma otwe
kata podho e lwet janek.

Kata ka magi duto osetimore,
to mirimbe ok norum kuomgi,
kendo pod odhi nyime mana gikumogi.

Nyasaye ngʼado bura ne jo-Asuria

5Mano kaka unune malit un jo-Asuria,
luth ma agoyogo ji ka akecho,
en e luth ma akumogo ji ka mirima omaka!
6En ema aore, mondo odhi oked gi oganda mokia Nyasaye,
achike mondo omonj joma miya mirima,
mi oketh mwandugi kendo oyakgi,
kendo onyon-gi piny mana ka
chwodho minyono e wangʼ yore.
7To mae ok e gima oparo timo to bende ma ok e gima ni e pache;
to dwarone en ketho kendo tieko ogendini mangʼeny.
8Openjo niya, Donge jotenda duto gin ruodhi?
9Donge Kalno osechalo gi Karkemish?
Donge Hamath chal mana gi Arpad,
kendo Samaria mana ka Damaski?
10Mana kaka asemako pinyruodhi mag nyiseche manono,
ma gin pinyruoth ma kido ma gin-go ngʼeny moloyo mag Jerusalem gi Samaria.
11Donge onego atimne Jerusalem kod nyisechene manono
mana kaka asetimone Samaria kod kido mage manono?

12Ka Ruoth Nyasaye osetieko tijene duto mag kumo Got Sayun gi jo-Jerusalem, enowach niya, “Abiro kumo ruodh Asuria nikech timbene mohero mag sunga gi ngʼayi. 13Nikech owacho niya, “ ‘Kuom teko mar bada kod riekona asetimo ma
nikech an-gi winjo matut.
Ne aketho tongʼ mag pinje, mi ayako mwandugi mathoth;
kendo ka ngʼat maratego ne amako ruodhigo.
14Mana kaka ngʼato kawo tongʼ e od winyo,
e kaka lweta oseyudo kuma mwandu mag pinje nitie;
mana kaka ji choko tongʼ modongʼ kendgi,
e kaka ne achoko pinje duto,
maonge mano mane nyalo kwadho bwombe,
kata ngʼamo dhoge mondo oywagi.’ ”

15To bende le disungre ne ngʼat matongʼo kode,
koso musimeno dinyisre ne ngʼat ma ngʼeto kode?
Bende arungu digo ngʼato kaonge ngʼama odire,
koso okwajo diwuothi kaonge ngʼama osirore kode?
16Kuom mano, Ruoth Nyasaye ma en Jehova Nyasaye Maratego,
biro kelo tuo kuom jolwenj Asuria marateke;
kendo tuo norew ringregi ka mach.
17Ler mar Israel nolokre mach,
Jal Maler margi nolokre mach mangʼangʼni;
ei odiechiengʼ achiel kende nowangʼ motiek
pep kuthe kod pedo mag ruodh Asuria.
18Ber mar bungene kod puothene momewo,
nowangʼ chuth,
mana ka ngʼat matuo ochamo dende motieko.
19Kendo yiende mag bungene
nodongʼ manok,
ma nyathi matin nyalo kwanogi.

Jo-Israel modongʼ

20Chiengʼno jo-Israel manok,
ma nyikwa Jakobo mane odongʼ,
nowe keto genogi kuom
ngʼat mane tiekogi,
to gini gen gi chunygi duto mana kuom Jehova Nyasaye,
Jal Maler mar Israel.
21Nyikwa Jakobo manok mane odongʼ
noduog ir Nyasaye Maratego.
22Yaye jo-Israel kata obedo ni ungʼeny,
ka kwoyo manie dho nam,
to ji manok kuomu kende ema nodwogi.
Nimar oseketo bura makare mabiro tieko ji duto.
23Ruoth Nyasaye, ma en Jehova Nyasaye Maratego,
osechano kelo masira mabiro tieko piny duto.

24Kuom mano, ma e gima Ruoth Nyasaye ma en Jehova Nyasaye Maratego wacho: “Yaye un joga modak Sayun,
kik ubed maluor nikech jo-Asuria,
kata obedo ni gichwadou gi ludhegi kendo gigoyou gi rungegi
kaka jo-Misri ne timo.
25Machiegnini mirimba kodu biro rumo
kendo koro abiro chomogi tir mondo atiekgi.”

26Jehova Nyasaye Maratego nochwadgi gi del,
mana kaka e kinde mane ogoyo jo-Midian,
e lwanda mar Oreb;
kendo enorie ludhe ewi pi
mana kaka ne otimo Misri.
27E kindeno tingʼ mapek mane joga nigo
nogol kuomgi,
jok mag-gi nogol e ngʼutgi;
kendo jok notur
nikech gisebedo machwe.

28Ne aneno ka gidonjo Ayath,
mi gikalo dier Migron;
kendo negikawo gigegi Mikmash.
29Kane giwuotho ka gikalo negiwacho niya,
“Otieno ma kawuono wabiro bworo Geba.”
Jo-Rama kibaji ogoyo;
to Gibea ma jo-dala Saulo joringo dhi.
30Yaye, nyi Galim, gouru nduru!
Yaye, Laish chikuru itu!
Yaye, Anathoth mar midhiero!
31Jo-Madmena ringo;
un jo-Gebim ringuru upondi.
32Kawuono gibiro bworo kambigi Nob;
gibiro kwadho bandera,
e got mar nyar Sayun,
machiegni gi got matin mar Jerusalem.

33Neuru Ruoth Nyasaye ma en Jehova Nyasaye Maratego,
biro tieko wasike gi teko maduongʼ.
Yiende ma yamo yiengo nongʼadi,
to yiende maboyo nolwar piny.
34Obiro ngʼado bunge moyugno kod le;
bende Lebanon biro podho e nyim,
Nyasaye Maratego.