‏ Isaiah 11

Bad Yath moa kuom Jesse

1Nyakwar Jesse moro nowuogi
mana ka bad yath maloth;
Kuom tiende, Bade nonyag olemo.
 2Roho mar Jehova Nyasaye nobi kuome,
en Roho makelo rieko gingʼeyo,
kendo mangʼadone ji rieko kendo miyogi teko,
bende en Roho mapuonjo ji luoro Jehova Nyasaye,
 3kendo enobed mamor gi joma oluoro Jehova Nyasaye.

Ok nongʼad bura kuom gima oneno giwangʼe,
kata chiwo parone kod gima owinjo gi ite;
 4to gi adiera nongʼad bura ne joma odhier,
kendo kuom bura makare enongʼad wach,
mowinjore ni joma ochando manie piny.
Dhoge ema nobed luth mogoyogo piny,
bende wach moa e dhoge ema noneg-go joma timbegi mono.
 5Tim makare nobed okanda mare
kendo adiera nobed misip motweyo e nungone.

6Ondiek nodag kaachiel gi nyirombe,
kwach nonind kaachiel gi diel,
nyaroya kod sibuor nokwa kaachiel,
kendo nyathi matin nokwagi.
 7Dhiangʼ gi ondiek nokwa kaachiel,
kendo nyithindgi nonind kanyakla,
kendo sibuor nocham lum ka rwath.
 8Nyathi madhoth notug machiegni gi dho bur thuond rachier,
kendo rawera noso lwete e bur thuond fu.
 9Ok ginihiny kata ketho gimoro
e godena duto maler,
nimar rieko mar Jehova Nyasaye
nopongʼ piny,
mana ka pi mopongʼo nam.

10Odiechiengno Nyakwar Jesse nochungʼ kaka ranyisi ne ji; mi ogendini nobi ire, kendo kare mar yweyo nobed gi duongʼ. 11Kindeno Ruoth Nyasaye norie bade kendo koresogo joge mane odongʼ e lwet jo-Asuria, koa Misri mamwalo nyaka mamalo, koa Kush, Elam, Babulon, Hamath to gi chula manie ii nam. 12Enochung bandera ne ogendini
mi ochok jo-Israel mane oriembi e pinygi;
kendo enochok jo-Juda kanyakla
ka ogologi e tunge angʼwen mag piny.
 13Nyiego mar jo-Efraim norum
bende jowasik Juda notieki;
kendo jo-Efraim ok nochak obed gi nyiego gi jo-Juda,
kata jo-Juda ok nobed gi ich wangʼ kod jo-Efraim.
 14Ginimonj jo-Filistia kagiwuok yo podho chiengʼ,
kendo giniriwre ka giyako gige ji nyaka yo wuok chiengʼ.
Ginikaw piny Edom kod Moab,
Jo-Amon to nobed wasumbinigi.
 15Jehova Nyasaye nomi nam makwar mar jo-Misri dwon,
eka norie lwete e Aora Yufrate,
mi okel yamo maliet.
Nopog aorano nyadibiriyo,
mondo omi ji ongʼade ka girwako mana pat pat.
 16Wangʼ yo maduongʼ nobedi ne joge manok
mane odongʼ koa e piny Asuria,
mana kaka wangʼ yo nobedone jo-Israel kawuok Misri.
Copyright information for LuoMLM