Isa 16 | LuoMLM | STEP | Kawuru rombe koa Sela kungʼadogo thim mondo uterne ruodh piny, modak e got mar Nyar Sayun kaka gir chiwo.

‏ Isaiah 16

1 Kawuru rombe koa Sela
kungʼadogo thim mondo uterne ruodh piny,
modak e got mar Nyar Sayun kaka gir chiwo.
2 Mana kaka nyithind winy
moketh odgi mafuyo koni gi koni,
e kaka mond jo-Moab nodongʼ
e kar otuodo manie Aora Arnon.

3 “Ngʼadnwauru rieko,
nyiswa gima onego watim.
Pandwauru mondo kik yudwa
kendo panduru jowa moringo lweny,
kendo kik uyie mondo omaki joma oseringo.
4 We jo-Moab moringo lweny odag kodu
kendo bednegi ragengʼ kuom jakethgi.”

Ngʼatno masandogi tekone norum,
kendo kethruok notieki;
mi jathir ji nolal nono e piny.
5 Kuom hera, loch nogur;
kuom adiera ngʼato nobedie lojno,
ngʼatno nowuogi e od Daudi,
ma en ngʼat mangʼado bura kare,
kendo ojiwo timbe mag adieri.

6 Wasewinjo sunga mar Moab,
kaka otingʼore malo gi wuondruok,
kopongʼ gi sunga kod achaya,
to dhialruokneno en kayiem nono.
7 Kuom mano jo-Moab dengo,
gidengo kaachiel nikech Moab.
Ywaguru kendo ubed gi lit nikech jo-Kir Hareseth.
8 Puothe mag Heshbon ner,
kaachiel gi mzabibu mag Sibma.
Jotelo mag ogendini oseketho divai mane berie moloyo,
mane ndalo moro ochopo nyaka Jazer,
kendo olandore nyaka kar ongoro.
Bedene nolawore malach mochopo nyaka nam.
9 Omiyo aywak mana kaka Jazer ywak
nikech mzabibu mag Sibma.
Yaye Heshbon, yaye Eleale,
analuoku gi pi wangʼ.
Mor ma un-go nikech olembeu mosechiek
kendo nikech keyo maru osetieki.
10 Mor kod ilo norum chuth e puotheu mag olemo
kendo onge wer mano wer kata koko manogo e puotheu mag mzabibu;
bende onge ngʼato angʼata manochak obi mzabibu e kuonde mag bicho,
nimar asetieko mahu mar mor ma un-go.
11 Chunya ywago Moab mana kaywak mar nyatiti,
kendo chunya ma iye ywago Kir Hareseth.
12 Ka Moab ochopo kuonde hembko mag misengini,
to ochandore achanda nono;
to kata ka odonjo e kare mar lemo,
to en mana kayiem nono.

13 Ma e wach ma Jehova Nyasaye nosewacho kuom Moab. 14 To sani Jehova Nyasaye wacho niya: Kapok okadho higni adek, mana kaka ja-otongʼo tiyo kaparo hignige adek ma tije rumogo e kaka duongʼ mar Moab kaachiel gi joge mangʼeny duto none achaya, bende joge ma notony nobed manok kendo mayom yom.