‏ Isaiah 23

Wach mokor kuom Turo

1Ma e wach mokor kuom Turo: Ywaguru, yaye yiedhi mag Tarshish!
Nimar Turo osekethi,
kendo oweye maonge ot kata dho wath!
Wach osechoponegi koa e piny Saipras.

2Lingʼuru thi un joma odak e chula,
kendo un jo-ohala madongo man Sidon,
un ma jokwangʼ ji osemiyo umewo.
3Nam maduongʼ ema cham mag Shihor ngʼado,
mwandu mokaa kowuok Nael ema osebedo girkeni mar Turo,
kendo osebedo kar ohala mar ogendini.

4Ininwangʼ wichkuot, yaye Sidon,
yaye in, ma in ohinga mar nam,
nimar nam osewuoyo niya,
“Ok asewinjo rem mar muoch bende pok anywol,
ok asepidho yawuowi kata nyiri pok abedogo.”
5Jo-Misri nobed gi kuyo
ka wach nochopnegi koa Turo.

6Ngʼaduru udhi Tarshish denguru,
un joma odak e chula.
7Bende ma e dalau maduongʼ
machon mane opongʼ gi mor kod ilo
masani koro oke e pinje man kuonde maboyo.
8En ngʼa mosechano kelo masirani kuom Turo,
wuon loch, ma jo-ohala mage ogen,
ma bende jongʼiewo mage ongʼere e piny duto?
9Jehova Nyasaye Maratego osechano tieko sunga duto mar joma nigi duongʼ
kendo obiro kuodo wi ji duto moluor ahinya e piny.

10Pururu lowo manie bath aora Nael,
yaye Nyar Tarshish,
nikech koro uonge gi dho wath.
11Jehova Nyasaye oserieyo bade e nam
kendo osemiyo pinyruodhi tetni,
bende osegolo chik ne Foenikia
mondo otiek gik ma gineno kuomgi.
12Nowacho niya, “Ok unuchak ubed gi mor kod ilo,
yaye Nyar Sidon Mangili ma osekethi!

“Kata bed mana ni ungʼado nam ma udhi Saipras
to kuno bende ok unuyudie yweyo.”
13Neuru piny jo-Babulon,
jogi makoro ikwano ka nono!
Jo-Asuria osemiyo odongʼ kar le mag thim;
kendo negigero kargi mar ngʼicho motingʼore gi malo,
ka gilworo dala bende negimuko ohingane duto
mi giweye gunda.

14Denguru un yiedhi moa Tarshish,
nikech karu mochiel motegno osemuki!

15E kindeno wich nowil gi Turo kuom higni piero abiriyo, marom kod ngima mar ruoth achiel, to giko mar higni piero abiriyogi, nobed ne Turo mana kaka wend nyako mochot mawero niya: 16“Kaw thumi ilworgo dala maduongʼ,
yaye nyako ma jachode makoro wich osewilgo,
go thumino mamit, wer wende mangʼeny
mondo kanyalore to opari.”

17To bangʼ higni piero abiriyo Jehova Nyasaye biro kecho Turo mirese. To bangʼe nodogi e tije machon mar chode kendo notim timbene machon mag chode gi pinjeruodhi duto mag piny ngima. 18To koro ohala moyudo kod chudo kuom tije noket tenge ne Jehova Nyasaye; ok nokan-gi kata kungogi ne en owuon. Ohala moyudo biro dhiyone jogo matiyone Jehova Nyasaye mondo ongʼiewgo chiemo mangʼeny kod lewni mabeyo.