Isaiah 25
Pak obed ne Jehova Nyasaye
1Yaye Jehova Nyasaye, in Nyasacha;abiro miyi duongʼ kendo anapak nyingi,
nimar kuom adiera mowinjore
isetimo gik makare,
mago mane osechan chon.
2Isemiyo dala maduongʼ omukore,
modhurore pidhe pidhe, dalano mochiel motegno okethore,
dala maduongʼ ma jopinje mamoko noketoe genogi oserumo;
bende ok nochak ogere kendo.
3Kuom mano joma roteke nomiyi duongʼ;
mier madongo mag ogendini ma jonjore biro miyi luor.
4Isebedo kar pondo ne jochan,
kar gengʼruok ne jodhier manie lit,
kar bwok ka ahiti kudho, kendo kar tipo ka chiengʼ kech.
Nimar muya mar janjore
chalo mana ka ahiti makudho kochomo ohinga,
5kendo mana ka liet manie piny motimo ongoro.
Isetieko koko mar jopinje mamoko mana kaka tipo mar
bor polo gengʼo liet,
e kaka wend jonjore osechung.
6Ewi godni Jehova Nyasaye Maratego biro loso
nyasi mar chiemo mamiyo ne oganda duto,
sawo mar divai mosekan,
kod chiemo mabeyo gi divai molos maber.
7Ewi godni obiro walo law moumo wangʼ ji duto,
law mogengʼo ogendini duto;
8kendo enotiek tho chuth.
Jehova Nyasaye Manyalo Gik Moko Duto biro yweyo pi wangʼ ji duto;
mi nogol ajara kuom joge
e piny duto.
Jehova Nyasaye ema osewacho.
9E kindeno giniwach ni, “Adier ma en Nyasachwa;
ne wageno kuome,
kendo ne oresowa.
Ma en Jehova Nyasaye, ne wageno kuome;
wabeduru gi mor kendo gi ilo kuom warruokne.”
10Lwet Jehova Nyasaye biro yweyo ewi godni,
to Moab nonyon piny gi tiende,
mana kaka inyono lum e dipo.
11Giniyar badgi kuome,
mana kaka ngʼama goyo abal yaro bedene ka kwangʼ.
Nyasaye biro tieko sungagi
kata obedo ni lwetgi riek e yor goyo abal.
12Obiro muko piny kuondeu mochiel motegno
motingʼore gi malo mi oketgi piny,
enotergi e lowo ma gilokre buru.
Copyright information for
LuoMLM