‏ Isaiah 3

Kum ne Jerusalem kod Juda

1Neuru koro Ruoth Nyasaye,
ma en Jehova Nyasaye Maratego,
biro tieko mich kod kony
mikelo ne Jerusalem kod Juda.
Notiek kit chiemo duto kod pi
2thuondi maroteke kod jolweny,
gi jongʼad bura gi jonabi
gi jokor wach kod jodongo,
3jatend lweny morito ji piero abich gi joma ogen,
jongʼad rieko, jopecho molony kod joma olony e wach.

4Anaket mana yawuowi obed jotendgi,
to rawere matindo noritgi.

5Ji nosandre kendgi giwegi,
ka ngʼato sando mana wadgi owuon
bende jogo modak mokiewo nosandre kendgi giwegi.
Jomatindo notug lweny gi jomadongo,
kendo ji ajiya nocha joma ogen.

6Ngʼato nochun achiel kuom owetene
manie dala wuon-gi kowacho niya,
“In ema in-gi lep loch, koro telnwa;
kendo ibed gi teko ewi pinywa mokethoreni.”
7To e kindeno ngʼatno nodwoki niya,
“Ooyo ok dabed ruodhu,
nimar aonge gi chiemo kata lewni e oda
madimi uketa abed jatend ogandani.”

8Jerusalem yiengni,
bende Juda mukore;
wechegi kod timbegi opogore gi dwach Jehova Nyasaye,
nimar ok omi duongʼne nenre e diergi.
9Wangʼ-gi nyiso ni gin joricho
kendo richogi oyangore e lela mana ka richo mane ni Sodom,
bende gionge gi wichkuot.
Yaye, mano kaka ginine malit
nikech gisekelo masira kuomgi giwegi.

10Kone joma kare ni gin johawi,
nimar giniyud pok kuom tichgi matek.
11Yaye, mano kaka nobed malit ne joricho nikech masira nobed kuomgi.
Enokumgi kuom gik maricho ma lwetgi osetimo.

12Jomatindo ema thiro joga
kendo mon ema jotendgi.
Yaye joga, jotendu osewuondou,
momiyo ubaro uweyo yo.

13Jehova Nyasaye osebedo e kom bura
mondo ongʼad bura ne oganda.
14Sa ngʼado bura mar Jehova Nyasaye
kuom jodongo kod jotend joge osechopo,
kowacho niya, “Un ema useketho puotha mar mzabibu
kendo gik ma uyako kukawo e ut joma odhier opongʼo uteu.
15En angʼo momiyo usando
kendo uthiro joga modhier?”
Ruoth Nyasaye, ma en Jehova Nyasaye Maratego ema owacho.

16Jehova Nyasaye wacho niya,
“Mond Sayun sungore kendo kawore, gingʼayo ngʼutgi malo,
kendo giningʼo wengegi.
Bende giwuotho ka gingʼadore,
ka gara manie tiendgi ywak.
17Kuom mano Ruoth Nyasaye biro kelo adhonde ewi mond Sayun,
kendo Jehova Nyasaye nomi timbegi mamono nenre ratiro.”

18Odiechiengʼno Ruoth Nyasaye biro mayogi gik ma gilichorego kaka: bangli gi kitembini mag wich kod tigo mag ngʼut, 19gi tigo miliero e it gi bangli mag lwetgi kod kitamba miliero e ngʼut, 20gi kitembini mag wich, gi thiwni mag ofunj tielo, gi misip gi chupni motingʼo gik mangʼwe ngʼar kod ris, 21gi tere mag lwedo gi mag um, 22lewni mayom gi kode gi mifuke mag lwedo, 23kod kio, gi lewni mabeyo gi lewni miliero e ngʼut kod mago miumogo wangʼ. 24Kar winjo tik mangʼwe ngʼar to unuwinj mana tik madungʼ marach;
kar bedo gi okanda to tol ema nutwerugo;
kar bedo gi yie wich molos maber to bondo ema unudongʼ-go;
kar bedo gi lewni mabeyo to unurwak mana pien gugru,
kar bedo gi wangʼ man-gi chia to adhonde nopongʼ dendu.
25Chwou notiek gi ligangla
kendo jolweny magu norum e lweny.
26Nduru gi ywak mag dengo nopongʼ dhorongeye mag Sayun,
kendo dalano nodongʼ nono kokethore.