‏ Isaiah 42

Jatich Jehova Nyasaye

1“Ma e jatichna masemiyo teko,
en e ngʼat ma aseyiero, kendo ma chunya morgo,
abiro keto Roho mara Maler
kendo obiro kelo adiera ne ogendini.
2Ok obi goyo koko kata nduru,
dwonde bende ok nowinji e wangʼ yore.
3Kata obedo ni onenore kaka odundu mayom yom ok notur
kendo kata obedo ni oliel ka taya ma mirimiri to ok notho.
Enongʼad bura gadiera;
4ok nochwanyre kata chunye bende ok nonyosre,
nyaka okel adiera e piny duto.
Pinje duto manie chula mag dier nam biro keto genogi kuom chikene.”

5Nyasaye ma en Jehova Nyasaye,
kendo ma Jachwech polo malach,
gi piny kod gik moko duto manie iye.
En ema ochiwo muya ne dhano
kod ngima ne joma wuotho e piny.
Owacho kama:
6“An Jehova Nyasaye, aseluongi mondo anyisi adierana;
abiro mako lweti.
Abiro riti kendo ibiro keti gir singruok e kinda gi ji
kendo abiro keti ler mar ogendini duto,
7mondo iyaw wenge muofni,
kendo igol joma oketi e od twech,
kendo igony joma otwe mobetie mudho.

8“Nyinga ma ongʼeyago en; Jehova Nyasaye!
Ok anawe duongʼ mara ne nyasaye moro,
bende pak ma ipakago ok nopakgo nyiseche mopa.
9Koro ne, gik machon osetimore
bende anyisou gik manyien mabiro timore,
to kapok gitimore
to ahulonugi.”

Wend pak ne Jehova Nyasaye

10Werneuru Jehova Nyasaye wer manyien,
kupako nyinge e piny duto,
un joma kwangʼ e nam kaachiel gi gik manie yie
gi pinje mag chula mar nam kod ji duto modak.
11Weuru kuonde motimo ongoro gi miechgi mondo ogo koko;
kendo weuru joma odak e gwenge mag Kedar obed mamor.
Weuru joma odak Sela ower gi mor,
ka gikok ewi got malo.
12Weuru gimi nying Jehova Nyasaye duongʼ
kendo giland pakne e pinje manie chula.
13Jehova Nyasaye biro wuok oko ka thuon maratego,
enobed gi mirima mager mana ka jalweny;
kendo enokogi ka ogiyo sigich lweny,
mi olo wasike.

14Nimar kuom kinde mangʼeny aselingʼ,
asehora kendo aseterora mos.
To koro sani, abiro chalo mana ka dhako mamuoch kayo,
maywak ka gamo yweyo matek.
15Abiro tieko gode madongo gi gode matindo
kendo anami gik motwi kuome two;
bende anami aore lokre pinje manie chula
kendo nami yewni dwon.
16Anatel ne muofni mondo owuothi e yore mane ok gingʼeyo,
kuonde mapok giwuothoe ema anatagie;
kendo anami mudho olokrenegi ler,
kendo analos kuonde bugni bed mopie.
Magi e gik ma abiro timo;
kendo ok najwangʼ-gi.
17To jogo ma oketo genogi kuom nyiseche mopa,
mawacho ni kido mopa niya, Un e nyisechewa,
jogo nokwed magiyud wichkuot.

Israel muofu kendo ite odino

18“Winjuru un joma itgi odino
un muofni ngʼiuru mondo une!
19En ngʼa ma muofu makmana jotichna,
kendo ma ite odino ka jaote maoro?
Koso en ngʼa ma muofu maloyo ngʼat mochiworena,
kata ma muofu maloyo jatich Jehova Nyasaye?
20Iseneno gik mangʼeny, to ok isedewo;
iti to oyawore, to gima iwinjo ema onge.”
21Jehova Nyasaye ne mor
mondo chikne obed gi teko kod duongʼ,
mondo adiera mare olandre.
22To jogi gin joma oyaki kendo omaa,
giduto gisenyumore ma gimoko e bugni,
kendo opandgi e ute mag twech.
Gisebedo gik moyaki
maonge ngʼama nyalo resogi;
bende gichalo gik moyaki
maonge ngʼama nyalo wacho niya, “Dwokgi.”

23En ngʼa kuomu manyalo winjo wachni
kata chiko ite malongʼo e ndalo mabiro?
24En ngʼa mane ochiwo Jakobo mondo obed gima oyaki,
kendo jo-Israel e lwet joyeko?
Donge en Jehova Nyasaye
ma wasetimo richo e nyime?
Nimar ne ok ginyal luwo yorene;
bende ne ok girito chikene.
25Omiyo noolo mirimbe mager
mar lweny kuomgi.
Ne olworogi gi mach mawengʼo to ne ok gidewe;
bende majno ne owangʼogi to ne ok gidewe.