‏ Isaiah 60

Duongʼ mar Sayun

1Aa malo mondo irieny nikech lerni osechopo,
kendo duongʼ mar Jehova Nyasaye oserieny kuomi.
2Neye mudho okwako piny,
kendo ogendini ni e mudho mandiwa,
to Jehova Nyasaye oserieny kuomi
kendo duongʼne osenenore kuomi.
3Ogendini nobi, e lerni,
kendo ruodhi nobi koneno lerni mar okinyi.

4Tingʼ wangʼi malo kingʼiyo koni gi koni:
Gik moko duto ochokore kendo gibiro iri;
yawuoti biro koa mabor
kendo nyigi ikelo kotingʼ e bat.
5Eka inine mano mi inibed mamor
ka chunyi opongʼ gi ilo,
mwandu mogundho nokelni kokalo nam,
kuomi ema mwandu mag ogendini noae.
6Kweth mag ngamia nopongʼ pinyi,
ma gin ngamia matindo moa Midian gi Efa.
Jogo duto moa Sheba ka gikelo dhahabu kod ubani,
nobi ka gipako Jehova Nyasaye gi wer.
7Jamni duto mag Kedar nochokni,
imbe mag Nebayoth nobed mitimogo misango;
ginibed gigo mitimonago misango e
kendona mar misango,
mi duongʼ maler mar hekalu mara nenre.

8Magi to gin angʼo mafuyo ka boche polo,
kata ka akuche maduogo e utegi?
9Kuom adiera pinje manie dho nembe ngʼiya,
motelonegi kabiro gin yiedhi mowuok Tarshish,
makelo yawuotu koa mabor ka gitingʼo fedha kod dhahabu,
magi biro miyogo nying Jehova Nyasaye duongʼ,
Jal Maler mar Israel, nikech oseumi gi duongʼne.

10Jopinje mamoko nochak oger ohinga maru
kendo ruodhigi nobed jotichu.
Kata obedo nine akumogi gi mirima,
to kuom ngʼwonona koro abiro nyiso kechna mangʼeny.
11Dhorangeyeni biro siko ka oyaw,
ok nochieg-gi odiechiengʼ kata otieno,
mondo owe thuolo ogendini okelni
mwandu moa e pinje ka ruodhigi otelonegi.
12Nimar ogendini kata pinjeruodhi ma ok notini norum;
adier ibiro tiekgi chuth.

13Duongʼ mar Lebanon nobini,
yien mabeyo duto mag obudo kod saipras nokelni,
mondo olosgo kara maler mar lemo
kendo abiro miyo kar yweyo mar tienda duongʼ.
14Yawuot joma ne osandi nobi iri kakulore e nyimi;
jogo duto mane ojari biro kulore e tiendi,
kendo giniluongi ni Dala Maduongʼ ma en mar Jehova Nyasaye,
ma en Sayun mar Jal Maler mar Israel.

15Kata obedo ni osejwangʼi kendo osechayi,
maonge ngʼama limi,
abiro miyo ibed dala man-gi duongʼ mosiko
kendo mor mar tiengʼ mabiro mangʼeny.
16Ibiro madho chak mag pinje mi
nopiri gi thuno mar joka ruoth.
Eka iningʼe ni An e Jehova Nyasaye,
ma Jawarni, Jaresni, Nyasaye Maratego mar Jakobo.
17Kar mula anakelni dhahabu
kendo fedha kar nyinyo.
Kar yien anakel mula kendo nyinyo kar kite.
Kwe ema nobed jaritni kendo tim makare ema notelni.
18Timbe mahundu ok nochak owinji e pinyu,
tuo kata kethruok moro marach ok nochak owinji machiegni gi tongʼ magu,
to iniluong ohinga magi ni Warruok
kendo dhorangeyeni ni Pak.
19Wangʼ chiengʼ ok nobed lerni mar odiechiengʼ
kata mana ler mar dwe ok nomenyi,
nimar Jehova Nyasaye ema nobed ler mari
kendo Nyasachi ema nobed duongʼ mari.
20Wangʼ chiengʼ ok nochak opodhi
bende dwe ok nochak olal kendo;
Jehova Nyasaye ema nobed lerni manyaka chiengʼ
kendo ndalogi mag kuyo norum.
21Omiyo jogi duto nobed joma kare
kendo piny nobed margi nyaka chiengʼ.
Ginichal gi bad yath ma an ema
apidho gi lweta awuon mondo omiya duongʼ.
22Ngʼat matinie kuomu nolokre oganda mangʼeny,
kendo oganda matin nolokre piny maduongʼ man-gi teko.
An Jehova Nyasaye ema nami
gino timre piyo piyo ka kinde ochopo.