‏ Isaiah 9

Osenywolnwa nyathi

1Kata kamano, joma ne nigi chandruok ok nochak obed gikuyo kendo. E ndalo mosekadho Nyasaye nomiyo piny Zebulun gi piny Naftali odoko pinje michayo, to e ndalo mabiro Jehova Nyasaye notingʼ malo Galili mar ogendini man yo nam modak e tiend aora Jordan: 2Joma wuotho e mudho
oseneno ler maduongʼ;
jogo modak e piny man-gi mudho mandiwa,
ler oserienynegi.
3Isemiyo piny oyarore
kendo isemedo morgi,
mi gibedo gi ilo e nyimi
mana kaka oganda bedo gi mor e ndalo keyo,
kendo mana kaka ji bedo gi mor
ka gipogo gik ma oyaki.
4Mana kaka e kinde mane olo jo-Midian e lweny,
iseturo jok mane turogi,
kaachiel gi lodi mane gitingʼo e gokni,
ma gin ludh ngʼama sandogi.
5Wuoch duto mag lweny
kaachiel gi lewni motimo remo mag jolweny,
ibiro ter e mach,
ginibedi ramoki mar mach.
6Nimar osenywolnwa nyathi,
adier osemiwa wuowi,
kendo loch nobedi e lwete.
Noluong nyinge ni
Jabura Mahono, Nyasaye Maratego,
Wuoro Manyaka Chiengʼ kendo Ruodh Kwe.
7Lochne gi kwe mare nobed
maonge giko.
Enobed e kom loch mar Daudi
kendo e pinyruodhe,
bende enogure motegno
ka orite gi adiera kod tim makare,
chakre kawuono nyaka chiengʼ.
Jehova Nyasaye Maratego
notim ma kuom tekone owuon.

Mirimb Jehova Nyasaye kuom jo-Israel

8Jehova Nyasaye oseoro wach ni okecho gi joka Jakobo,
kendo wachno osechopo ne jo-Israel.
9Ji duto biro winjo wachno
jo-Efraim kod joma odak Samaria duto,
ma wuoyo gi sunga
kod wangʼ teko kawacho niya,
10“Ute mag matafare osepodho,
to wabiro gedo kendo kod kite mopa,
bende kata obedo ni yiend ngʼowu osetongʼ
to wabiro pidho yiend sida kargi.”
11To Jehova Nyasaye biro miyo wasik Rezin teko mondo oked kodgi,
adier obiro thuwogi kod wasigu.
12Jo-Aram mane oa yo wuok chiengʼ kod jo-Filistia mane oa yo podho chiengʼ;
osetieko jo-Israel pep.

Kata ka magi duto osetimore,
to mirimbe pod ok orumo kuomgi
kendo pod odhi nyime mana gikumogi.

13Kata obedo ni osekumogi kamano to ji pok odwogo ire
bende pok gimanyo wangʼ Jehova Nyasaye Maratego.
14Omiyo Jehova Nyasaye biro ngʼado joma ogen kod ji ajia mag Israel,
othith kod odundu e odiechiengʼ achiel;
15jodongo kod joma ogen e wich jo-Israel,
to jonabi mapuonjo miriambo e iwe.
16Jotend ogandani osemiyo gilal
kendo joma otelnegi bende oserwenyo.
17Kuom mano Ruoth Nyasaye ok nobed mamor gi jomatindo
bende ok nokech nyithi kiye kod mon ma chwogi otho,
nikech ji duto opongʼ gi richo kendo timo timbe mamono
bende dhogi opongʼ gi weche mochido.

To Kata ka magi duto osetimore to mirimbe ok orumo kuomgi
kendo pod odhi nyime mana gikumogi.

18Adier timbe mamono chalo gi mach maliel;
ma wangʼo pedo kod kuthe,
kendo omiyo bungu modinore wangʼ
mi dhuol iro maduongʼ mochomo malo.
19Mirimb Jehova Nyasaye Maratego
biro wangʼo piny,
kendo ji ema nobed ramoki mar mach,
kendo onge ngʼat mano ngʼwon-ne nyawadgi.
20E bathe korachwich gibiro mecho
to pod gidenyo adenya;
to e bathe koracham gibiro chiemo
to ok giniyiengʼ.
Ngʼato ka ngʼato nocham mana ringre nyathine owuon.
21Manase biro chamo Efraim kendo Efraim nocham Manase;
giduto ginibed wasik Juda.

Kata ka magi duto osetimore,
to mirimbe pod ok orumo kuomgi
kendo pod odhi nyime mana gikumogi.