‏ Job 27

1Ayub nochako wuoyo kendo mowacho niya, 2“Akwongʼora gi nying Jehova Nyasaye
Maratego mosetamore ngʼadona bura makare,
kendo mosemiyo chunya obedo malit,
3bende asingora ni kapod angima
kendo kapod Nyasaye omiya muya ma ayweyo,
4to dhoga ok nowach gimoro marach,
kendo lewa ok nowach miriambo.
5Ok abi yie ngangʼ ni un kare;
ok anasiki mana ka awacho ni aonge ketho nyaka atho.
6Abiro siko mana ka awacho ni an kare ndalona duto;
kendo pacha ler e wachni e ndalo duto.

7“Mad wasika duto mapiem koda,
yud kum mana ka joricho!
8Koso geno mane ma ngʼama ok ongʼeyo Nyasaye dibedgo ka ongʼad ndalone,
kendo ka Nyasaye okawo ngimane?
9Bende Nyasaye chiko ite
ne ywakne ka masira obirone?
10Bende onyalo bedo gi mor kuom Jehova Nyasaye Maratego?
Bende doywagne Nyasaye seche duto?

11“Abiro puonji kaka teko Nyasaye chalo;
ok abi pandoni yore mag Jehova Nyasaye Maratego.
12Un duto ngʼato ka ngʼato useneno ma gi wangʼu
koro weche manonogi to uwacho nangʼo?

13“Chandruok ma Nyasaye ochano ne ngʼama timo timbe mahundu,
kendo girkeni mar ngʼama timo timbe marichogo
yudo koa kuom Jehova Nyasaye Maratego ema:
14Kata ne bed ni nyithinde ngʼeny manade,
to ligangla ema ochomogi;
kendo nyithinde ok noyud chiemo moromogi nyaka chiengʼ.
15Tuo noneg joma otony e lweny,
kendo mon ma chwogi otho ma giweyo ok noywag-gi.
16Kata jaricho chok fedha mangʼeny manade,
kod lewni bende mangʼeny,
17to gik mochokogo joma kare ema biro rwako,
kendo joma onge ketho nopogre mwanduge mag fedha.
18Ot mogero yomyom ka mbuyi mar otiengʼ,
kata ka abila ma jarito ogero.
19Onindo ka en gi mwandu, to ochiewo gi lwete nono;
ka wangʼe yawore nii to mwandune duto oserumo.
20Masiche nomakgi ka ohula motuch apoya;
kendo yamb otieno nokegi mabor.
21Yamb ugwe tingʼe midhi kode, mi olal nono;
oywere mi ogole kare.
22Enogo kuomgi koko matek ma ok oweyonigi thuolo,
kolawogi matek gi tekone maduongʼ.
23Yamo nokudh kuomgi ka giringo
kendo tekone malich nomi kihondko makgi.”