Psa 95 | LuoMLM | STEP | Biuru wawer gimor ne Jehova Nyasaye; wagouru koko matek ne lwanda mar warruokwa.

‏ Psalms 95

1 Biuru wawer gimor ne Jehova Nyasaye;
wagouru koko matek ne lwanda mar warruokwa.
2 Wabiuru e nyime gi erokamano
kendo wami nyinge duongʼ ka wawer kendo wakok gi mor.

3 Nimar Jehova Nyasaye e Nyasaye maduongʼ,
en e Ruoth maduongʼ moloyo nyiseche duto.
4 Otingʼo kuonde matut duto mag piny e lwete,
kendo wi gode ma roboche bende mage.
5 Nam mare, nimar en ema nolose,
kendo lwetene ema noloso lowo motwo.

6 Biuru wakulrene ka walame,
biuru wago chongwa e nyim Jehova Nyasaye ma Jachwechwa;
7 nimar en e Nyasachwa
kendo wan e joge mokwayo,
wan e jambe morito.

Kawuono ka uwinjo dwonde,
8 to kik chunyu bed mapek kaka ne utimo Meriba,
kata kaka ne utimo chiengʼ cha Masa manie thim,
9 kama kwereu noteme gi tem,
kata obedo ni ne giseneno gima ne atimo.
10 Kuom higni piero angʼwen iya nowangʼ gi tiengʼno;
kendo nawacho niya, “Gin joma chunygi ohero rwenyo,
kendo pok gingʼeyo yorena.”
11 Omiyo mirima nomaka kodgi mi nasingora ka akwongʼora ni,
“Ok ginidonji e yweyona ngangʼ.”