‏ Psalms 139

Kuom jatend wer. Zaburi mar Daudi.

1Yaye Jehova Nyasaye, isenona
kendo ingʼeya.
2Ingʼeya sa ma abet piny nyaka sa ma aa malo;
adier, ingʼeyo parona gi kuma bor.
3Bende ingʼeyo yorega ma aluwo kod kuonde ma ayweyoe;
yorena duto oyangoreni maber.
4Kata kapok wach moro owuok e dhoga
to ingʼeye malongʼo, yaye Jehova Nyasaye.
5Ilwora koni gi koni mi iketa diere;
adier, iseuma duto gi lweti.
6Rieko ma kamano lichna miwuoro,
kendo otutna moyombo pacha.

7Dadhi kure eka apond ne Roho mari?
Koso kanye ma daring adhiye mondo apondni?
8Ka aidho e polo, to in kuno;
ka aloso kitandana e bur matut, to in kuno.
9Ka aidho yamb kogwen
mondo otera e tok nam komachielo,
10to kata kuno bende lweti biro telonae,
kendo lweti ma korachwich biro maka motegno.
11Ka awacho niya, “Mudho biro ima adier
kendo ler biro lokorena otieno,”
12to in mudho ok timni mudho
kendo otieno rienyni ka odiechiengʼ,
nimar mudho chaloni ler.

13In ema ne ichweyo dhanda maiye,
adier, ne ingʼina maber gi ei minwa.
14Apaki nikech ne ichweya mongʼith kendo malich miwuoro;
tijeni misetimo lich,
kendo angʼeyo mano maber.
15Fuonde mag ringra ne ok opondoni,
kane ochweya ei minwa,
kane ochwe ringra e kama opondo,
16wangʼi ne oneno ringra ei minwa;
ndalona duto e piny-ka ne ondiki chon gi lala,
e kitabu mari kane pok kata achiel kuomgi obetie.
17Mano kaka pachi tutna, yaye Nyasaye!
Mano kaka gingʼeny mokalo akwana kargi duto!
18Ka dine bed ni anyalo kwanogi,
to dine giloyo kuoyo gi ngʼeny.
Sa ma achiew to ayudo
ni pod an mana kodi.

19Yaye Jehova Nyasaye, mad iyie ineg joma timbegi richo!
Ayiuru buta, un joma rich chwero remb ji omakogi!
20Giwuoyo kuomi gi paro marach;
adier, wasiki tiyo gi nyingi e yo marach.
21Donge amon gi jomamon kodi, yaye Jehova Nyasaye,
koso donge ok awinjra gi joma chungʼ mondo oked kodi?
22Achayogi kendo aonge kodgi gi tich
adier akwanogi kaka wasika.
23Nona, yaye Jehova Nyasaye, mondo ingʼe chunya;
tema, mondo ingʼe pacha.
24Tim kamano mondo ineane ka nitie gimoro marach kuoma,
mondo itera e yor ngima mochwere.