‏ Psalms 31

Kuom jatend wer. Zaburi mar Daudi.

1Kuomi ema aseponde, yaye Jehova Nyasaye,
kik iwe ayud wichkuot;
gola e chandruok nikech timni makare.
2Winj ywakna,
kendo bi piyo mondo iresa;
bed lwandana mar pondo,
kendo ohinga motegno manyalo resa.
3Kaka in lwandana kendo ohingana,
telna kendo itaya nikech nyingi.
4Gola oko e obadho mopondo mochikna
nikech in e kar pondona.
5Aketo chunya e lweti;
resa, yaye Jehova Nyasaye, ma Nyasaye mar adiera.

6Asin gi joma lamo nyiseche manono ma dhano oloso;
an to aketo genona kuom Jehova Nyasaye.
7Abiro bedo mamor kendo moil kuom herani,
nikech ne ineno chandruokna,
kendo ne ingʼeyo lit mar chunya.
8Ok iseketa e lwet jawasigu
to iseguro tiendena kama lach.

9Kecha, yaye Jehova Nyasaye, nikech an e chandruok;
wengena ojony nikech ywak,
kendo chunya gi ringra bende nigi lit.
10Ngimana rem chamo
kendo higni maga opongʼ gi chur;
tekona rumo nikech lit ma an-go
kendo chokena doko mayom yom.
11Nikech wasigu olwora mangʼeny,
joma odak koda koro ochaya gi chunygi;
alich kata mana ni osiepena
kendo joma onena e wangʼ yo ringa.
12Wigi owil koda mana ka gima ne asetho chon
bende koro achalo mana gi agulu motore.
13Nikech awinjo ayany mangʼeny ma ji yanyago,
kihondko olwora koni gi koni;
gikuodho kaka digitimna marach
kendo gichano mar kawo ngimana.

14To an aketo mana genona kuomi, yaye Jehova Nyasaye;
kendo awacho niya, “In e Nyasacha.”
15Ndalona ni e lweti;
resa e lwet wasika,
kendo kuom joma lawa.
16Mad ibed mamor gi jatichni;
resa gi herani ma ok rum.
17Kik iwe wiya kuodi, yaye Jehova Nyasaye,
nikech aseywakni ka alemo;
to we joma timbegi richo oyud wichkuot
kendo ginindi ka gilingʼ thi ei liel.
18Mi dhogi mawacho miriambo mondo olingʼ;
nikech sungagi kod chuny marach ma gin-go,
omiyo giwuoyo gi wich teko kuom joma kare.

19Mano kaka berni duongʼ,
ber mikano ne joma oluori,
mimiyo joma opondo kuomi
ka ji duto neno.
20Ipandogi e bwombi iwuon
mondo joma richo kik hinygi;
iritogi maber e kar dak mari
kuom lew joma hangonigi wach.

21Pak obed ni Jehova Nyasaye,
nikech ne onyisa herane maduongʼ,
kane an e dala ma wasigu ogoyona agengʼa.
22Kane chandruok omaka to ne awacho ni,
“Opoga kodi!”
Kata kamano ne iwinja ka aywakni
mondo ikecha kane aluongi mondo ikonya.

23Heruru Jehova Nyasaye un joge maler duto!
Jehova Nyasaye rito ngima joma jo-adiera,
to josunga to ochulo moromo chuth.
24Beduru motegno kendo jiwuru chunyu,
un duto mugeno kuom Jehova Nyasaye.