Psa 41 | LuoMLM | STEP | Ngʼama paro joma ok nyal en jahawi; Jehova Nyasaye rese ka chandruok omake.

‏ Psalms 41

Kuom jatend wer. Zaburi mar Daudi.

1 Ngʼama paro joma ok nyal en jahawi;
Jehova Nyasaye rese ka chandruok omake.
2 Jehova Nyasaye biro rite kendo biro miyo obed mangima;
Jehova Nyasaye biro gwedhe e piny,
kendo ok obi jwangʼe e lwet wasike.
3 Jehova Nyasaye biro rite e kitandane mar tuo midekre
kendo obiro miyo oa malo e kitandane ka ohewore.

4 Ne awacho niya, “Yaye Jehova Nyasaye, kecha;
changa, nikech aseketho e nyimi.”
5 Wasika wuoyo kuoma ka chunygi rach koda, kagiwacho niya,
“Obiro tho karangʼo mondo nyinge olal chuth?”
6 Sa asaya ma ngʼato obiro nena,
to owuondore ni owuoyo kuoma maber,
to ei chunye to ofwambo weche,
mondo okethgo nyinga eka oa odhi kendo okeyo wechego ne ji.

7 Wasika duto kuodho wach kuoma kaachiel kaka ginyalo hinya,
chunygi paro gik maricho mogik mondo ohinya,
kagiwacho niya,
8 “Tuo marach osekete piny;
ok obi aa malo kama oninde.”
9 Koda ka osiepna mane ageno kuome,
ngʼat mane chiemo koda,
bende osendhoga.

10 To in, yaye Jehova Nyasaye, yie ikecha;
chunga malo, mondo achulgi.
11 Angʼeyo ni chunyi mor koda,
nimar jowasika ok loya.
12 Itingʼa malo nikech timna makare
kendo ichunga e nyimi nyaka chiengʼ.

13 Pak ne Jehova Nyasaye, ma Nyasach Israel,
nyaka chiengʼ kendo nyaka chiengʼ.
Amin kendo Amin.