Song of Solomon 6
Osiepe 1Jaherani olal kune,yaye jaber mogik e dier nyiri mabeyo?
Jaherani ne oluwo kanye,
mondo wakonyi manye?
Nyako 2Jaherana osedhi e puothe,
kama gik mangʼwe ngʼar dongoe,
mondo omeny ei puothe
kendo ochok ondanyo.
3Jaherana en mara kendo an bende an mare;
omiyo omenyo e dier ondanyo.
Wuowi 4Jaherana, ijaber mana ka Tirza,
ilongʼo mana ka Jerusalem,
ichanori mana ka jolweny motingʼo bendeche.
5Gol wengegi kuoma;
nikech giberna.
Yie wiyi chalo kweth mag diek,
malor koa e got Gilead.
6Lekeni tar mana ka kweth mag rombe
mowuok kar luok.
Moro ka moro wuotho gi nyithinde ma rude
kendo onge moro man kende.
7Lembi ma iumo gi nanga
chalo gi olemo mongʼinore mochiek makwar.
8Ruoth nigi mon piero auchiel
gi mon mamoko piero aboro,
kod nyiri mapok ongʼeyo chwo mokadho akwana.
9To an ahero mana nyako achiel kende,
ma jaber ka akuru, en e nyar min kende,
mohero malich.
Jotich ma nyiri konene, to luonge ni nyako mogwedhi,
to mond ruoth kod mon mamoko konene to pake.
Osiepe 10Ma to en ngʼa mabiro apoya ka piny madwa ru?
Adier, ober ka dwe kendo ongʼangʼni ka wangʼ chiengʼ,
bende ochanore ka sulwe moriedo.
Wuowi 11Ne alor mwalo nyaka e puoth mananas,
mondo ane kaka gidongo e holo,
kendo mondo ane ka mzabibu osechako golo maua
kata ka olemo mongʼinore osechako chiek makwar.
12Apoya nono, kapok angʼeyo,
gombona notingʼa motera nyaka dier geche joka ruoth.
Osiepe 13Yie iduogi, yie iduogi, yaye nyar jo-Shulam;
yie iduogi, yie iduogi, mondo waneni!
Wuowi Ere gima omiyo ungʼiyo nyar jo-Shulam kamano,
mana ka gima omielo miend Mahanaim?
Copyright information for
LuoMLM