Psa 3 | MarMRCV | STEP | दावीदाचे स्तोत्र. जेव्हा तो त्याचा पुत्र अबशालोम याच्यापासून पळाला. याहवेह, माझ्या शत्रूंची संख्या किती अधिक आहे! कितीतरी लोक माझ्याविरुद्ध उठले आहेत!

‏ Psalms 3

दावीदाचे स्तोत्र. जेव्हा तो त्याचा पुत्र अबशालोम याच्यापासून पळाला.

1 याहवेह, माझ्या शत्रूंची संख्या किती अधिक आहे!
कितीतरी लोक माझ्याविरुद्ध उठले आहेत!
2 पुष्कळजण माझ्याबद्दल म्हणतात,
“परमेश्वर त्याची सुटका करणार नाही.” सेला ^{▼▼सेला या इब्री शब्दाचा अर्थ कदाचित गीत गाताना मध्ये थोडे थांबणे असा आहे.}

3 परंतु याहवेह, तुम्ही माझ्या सभोवती ढाल आहात.
माझे गौरव आणि माझी मान उंचाविणारे तुम्हीच आहात.
4 मी याहवेहचा धावा करतो,
आणि ते त्यांच्या पवित्र पर्वतांवरून मला उत्तर देतात. सेला

5 मी पहुडतो आणि झोप घेतो;
मी पुन्हा उठतो, कारण याहवेह माझे रक्षण करतात.
6 असंख्य मला चहूबाजूंनी वेढतील,
तरी मला मुळीच भीती वाटणार नाही.

7 याहवेह, उठा!
हे माझ्या परमेश्वरा, मला वाचवा!
माझ्या सर्व शत्रूंच्या जबड्यांवर प्रहार करा;
त्या दुष्टांचे दात पाडून टाका.

8 कारण सुटका याहवेहपासूनच आहे.
तुमच्या लोकांवर तुमचा आशीर्वाद असो. सेला