‏ Deuteronomy 14

Ukudla Okuhlanzekileyo Lokungahlanzekanga

1“Lingabantwana bakaThixo uNkulunkulu wenu. Lingabozisika loba liphuce amakhanda enu lizilela abafileyo, 2ngoba lingabantu abangcwele kuThixo uNkulunkulu wenu. Ebantwini bonke abasemhlabeni, uThixo ulikhethile lina ukuthi libe ngabantu bakhe abaligugu.

3Lingadli loba kuyini okunengisayo. 4Nanzi izinyamazana elingazidla: inkomo, imvu, imbuzi, 5umziki, impala, umziki obomvu, imbuzi yeganga, imbuzi mawa, umtshwayeli lemvu yentaba. 6Lingadla zonke izinyamazana ezilenklagu ezivulekileyo lezentshisayo. 7Kodwa-ke kulezo ezilenklagu ezivulekileyo loba lezo ezentshisayo zilani lingadli ikamela, umvundla loba imbila. Zingcolile kini ngokomkhuba. 8Ingulube layo ayihlanzekanga; lanxa ilenklagu ezivulekileyo kayentshisi. Lingabokudla inyama yazo, lingathinti lezidumbu zazo.

9Kuzozonke izidalwa ezihlala emanzini, lingadla zonke lezo ezilempiko lamaxolo. 10Kodwa konke lokho okungelampiko lamaxolo akumelanga likudle; kungcolile kini.

11Lingadla loba yiphi inyoni ehlanzekileyo. 12Kodwa lezi lingazidli: ukhozi, ilinqe elimnyama, 13uhelwane olubomvu, uhelwane olumnyama, loba yiwuphi umhlobo womzwazwa 14loba yiphi imihlobo yamawabayi, 15isikhova esilesicholo, ingabuzane, idada lolwandle, loba wuphi umhlobo wokhozi, 16umandukulo, isikhova esikhulu, isikhova esimhlophe, 17isikhova senkangala, ukhozi lwenhlanzi, itshayamanzi, 18ingabuzane, lawuphi umhlobo welanda, imvenduna lomalulwane.

19Zonke izibungu eziphaphayo zingcolile kini; lingabozidla. 20Kodwa konke okulempiko okuhlanzekileyo kudleni.

21Lingabokudla ingcuba. Lingakunika loba ngubani owezizweni ohlezi loba kukuliphi phakathi kwamadolobho enu, yena angakudla, ulakho njalo ukuthi angathengisela omunye laye owezizweni. Kodwa lina lingabantu abangcwele kuThixo uNkulunkulu wenu.

Lingapheki izinyane lembuzi ngochago lukanina.”

Okwetshumi

22“Wobani leqiniso ukuthi libeka eceleni lokhu okuyingxenye eyodwa yetshumi yesivuno somnyaka. 23Dlanini okwetshumi kwamabele enu, iwayini elitsha lamafutha, kanye lamazibulo emihlambi yenkomo zenu lawezimvu emehlweni kaThixo uNkulunkulu wenu endaweni azalikhethela yona ukuba ibe leBizo lakhe, ukuze lifunde ukumphakamisa uThixo uNkulunkulu wenu ngezikhathi zonke. 24Kodwa nxa leyondawo ikhatshana kakhulu lina libusisiwe nguThixo uNkulunkulu wenu njalo lingenelisi ukuthwala okwetshumi kwenu (ngenxa yokuthi lapho uThixo akhethe ukubeka khona iBizo lakhe kukhatshana kakhulu), 25thengisani okwetshumi kwenu ngesiliva, libe selithatha lihambe lesiliva liye endaweni leyo ezabe ikhethwe nguThixo uNkulunkulu wenu. 26Sebenzisani isiliva lithenge ngaso loba yini elifuna ukuyithenga: inkomo, izimvu, iwayini loba kuyini elikufunayo. Ngakho lina kanye labendlu yenu lizakudla khonapho phambi kukaThixo uNkulunkulu wenu njalo libe lokujabula. 27Njalo lingakhohlwa abaLevi abahlala emadolobheni enu, ngoba abalaso isabelo esingesabo njalo abaphiwanga ilifa.

28Ekupheleni kweminyaka emithathu, lethani okwetshumi kwesivuno salowomnyaka likugcine emadolobheni enu, 29yikho kuzakuthi abaLevi (bona abangelasabelo loba ilifa elingelabo) kanye labezizweni, izintandane ezingelaboyise labafelokazi abahlala emadolobheni enu beze labo bazokudla basuthe, njalo kuze kuthi uThixo uNkulunkulu wenu alibusise kuyo yonke imisebenzi yezandla zenu.”