‏ Isaiah 34

Ukwahlulelwa Kwezizwe

1Sondelani lina zizwe, lilalele;
zwanini lina bantu!
Umhlaba kawulalele, lakho konke okukiwo,
umhlaba, lakho konke okuvela kuwo!
2 UThixo uthukuthelele izizwe zonke,
ulaka lwakhe luphezu kwezitha zabo zonke.
Uzazibhubhisa ngokupheleleyo,
uzazinikela ekubulaweni.
3Ababuleweyo bakibo bazaphoselwa ngaphandle,
izidumbu zabo zizanuka;
izintaba zizacwila egazini labo.
4Zonke izinkanyezi zasemazulwini zizanyamalala,
umkhathi ugoqwe njengomqulu;
wonke amaxuku ezinkanyezi
azakuwa njengamahlamvu abunileyo evinini
lanjengomkhiwa oswabileyo usiwa esihlahleni somkhiwa.

5Inkemba yami isinathe yanela emazulwini;
khangelani yehlela phezu kwe-Edomi ukulahlulela,
abantu esengibabhubhise baphela.
6Inkemba kaThixo igxanyuzwe egazini,
igcwele amafutha
igazi lezimvu lelembuzi,
amafutha ezinso zenqama.
Ngoba uThixo ulomhlatshelo eBhozira
lokubulawa okukhulu kwezifuyo e-Edomi.
7Inyathi zizakufa kanye lazo,
amathole azinkunzi kanye lenkunzi ezinkulu.
Ilizwe labo lizagcwala igazi,
umhlabathi uzakuba manzi ngamafutha.

8Ngoba uThixo ulosuku lokuphindisela,
umnyaka wokujezisa, ukuqinisa injongo yeZiyoni.
9Izifula zase-Edomi zizaphendulwa zibe yingcino,
umhlabathi wakhona ube ngumlilo wesolufa,
ilizwe lakhona lizakuba yingcino etshayo!
10Aliyikucitshwa ebusuku lemini;
intuthu yalo izathunqa kokuphela.
Lizakuba ngelichithiweyo
kusukela kusizukulwane kusiya kwesinye;
kakho ozadabula phakathi kwalo futhi.
11Isikhova senkangala lomandukulo kuzakwakha kulo;
isikhova esikhulu lewabayi kuzakwakha izidleke zakho kulo.
UNkulunkulu uzakwelulela phezu kwe-Edomi
intambo yokulinganisa incithakalo
lentambo yokulinganisa ukutshabalala.
12Izikhulu zalo kaziyikuba lalutho olungathiwa ngumbuso,
wonke amakhosana alo azanyamalala.
13Izinqaba zalo zizagcwala ameva,
imbabazane lokhula kugcwale kuziphephelo zalo.
Lizakuba yindawo yamakhanka,
lomuzi wezikhova.
14Izinyamazana zenkangala zizahlangana lezimpisi,
amagogo azakhalelana;
izidalwa zebusuku zizalala khona
zizifunele izindawo zokuphumula.
15Isikhova sizakwakha isidleke khona sibekele amaqanda,
sizawachamisela, sifukamele abantwana baso
ngaphansi komthunzi wempiko zaso,
lemizwazwa izabuthana khonapho,
yilowo lalowo lomngane wawo.
16Khangelani encwadini kaThixo lifunde okuthi:

Akukho lakunye kwalokhu okuzasweleka;
akukho okuzaswela umngane wakho.
Ngoba nguThixo onike umlayo,
loMoya wakhe uzazigoqela ndawonye.
17Uzakwahlukanisela izabelo zakho;
isandla sakhe sizakwabela ngesilinganiso.
Isabelo sizakuba lilifa lakho kokuphela,
njalo sizahlala khona kusukela kusizukulwane kusiya kusizukulwane.