‏ Mark 13

Ukubhidlizwa KweThempeli Lezibonakaliso Zokucina Kwesikhathi

1Wathi esuka ethempelini omunye wabafundi wathi kuye, “Khangela, Mfundisi! Amatshe anganani! Bona ubuhle bezindlu!”

2UJesu waphendula wathi, “Liyazibona yini zonke lezi izindlu ezinkulu kangaka? Kakuyikusala litshe phezu kwelinye; wonke azaphoselwa phansi.”

3Kwathi uJesu ehlezi eNtabeni yama-Oliva malungana lethempeli uPhethro, loJakhobe, loJohane lo-Andreya bambuza ngasese bathi, 4“Sitshele, zizakwenzakala nini izinto lezi? Njalo kuzakuba lesibonelo bani ukuthi sezizagcwaliseka?”

5UJesu wathi kubo: “Qaphelani ukuze lingakhohliswa muntu. 6Banengi abazakuza ngebizo lami, besithi, ‘Nginguye,’ bakhohlise abanengi. 7Nxa lisizwa ngezimpi lamahungahunga ngezimpi, lingaze lethuka. Lezozinto kumele zenzakale, kodwa ukucina kulokhu kuseza. 8Isizwe sizavukela isizwe, lombuso uvukele umbuso. Kuzakuba lokuzamazama komhlaba ezindaweni ezinengi, lezindlala. Lezi ziyikuqala kokuhelelwa.

9 Libohlala liqaphele. Bazalimangalela ezinkundleni zamacala njalo balibhaxabule emasinagogweni abo. Ngenxa yami lizamiswa phambi kwababusi lamakhosi libe ngofakazi kubo. 10Njalo ivangeli kufanele liqale litshunyayelwe ezizweni zonke. 11Lapho libotshwa njalo lilethwa emthethwandaba lingaze lazihlupha ngokuthi lizakuthini phambi kwabo. Khulumani ingqe yini eliyiphiwa ngalesosikhathi, ngoba kakusini elikhulumayo, kodwa nguMoya oNgcwele.

12 Umfowabo uzanikela umfowabo ukuthi abulawe, loyise anikele umntanakhe. Abantwana bazahlamukela abazali babo bababulalise. 13Bonke abantu bazalizonda ngenxa yami, kodwa lowo oma aqine kuze kube sekupheleni uzasindiswa.

14 Kodwa nxa libona ‘amanyala aletha incithakalo’ ▼

▼ UDanyeli 9.27; 11.31; 12.11

kumi lapho okungesikwakhona, ofundayo kezwisise, lapho-ke akuthi labo abaseJudiya babalekele ezintabeni. 15Akungabikhona osephahleni lwendlu yakhe ozakwehla loba angene endlini ukuthatha ulutho. 16Akungabi loyedwa osensimini ozabuyela emuva ukuyathatha ijazi lakhe. 17Yeka ubulukhuni obuzakuba khona ngalezonsuku kwabesifazane abakhulelweyo labangabadlezane! 18Khulekani ukuthi lokhu kungenzakali ebusika, 19ngoba lezo zizakuba yizinsuku zokuhlukuluzeka okungakaze kube khona kwasekuqaleni, lapho uNkulunkulu adala umhlaba, kuze kube manje, njalo kakuzukubuye kube khona.

20 Nxa iNkosi yayingaziphungulanga lezinsuku, kwakungeyi kuphepha muntu. Kodwa ngenxa yabakhethiweyo, eyabakhethayo, iziphungulile. 21Ngalesosikhathi nxa umuntu esithi kini, ‘Khangelani, nangu uKhristu!’ loba ‘Khangelani, nanguya,’ lingamkholwa. 22Ngoba oKhristu bamanga labaphrofethi bamanga bazavela benze izibonakaliso lezimangaliso ukukhohlisa abakhethiweyo, nxa lokho kungenzeka. 23Ngakho lilimuke; sengilitshelile konke ngaphambili.

24 Kodwa ngalezonsuku, kulandela lokho kuhlukuluzeka,

‘ilanga lizafiphala,
lenyanga kayiyikukhanya;
25 izinkanyezi zizakuwa esibhakabhakeni,
lezisekelo zasezulwini zizazanyazanyiswa.’ ▼

▼ U-Isaya 13.10; 34.4

26 Ngalesosikhathi abantu bazayibona iNdodana yoMuntu isiza emayezini ilamandla amakhulu lobukhosi. 27Izathuma izingilosi zayo ziqoqe abakhethiweyo bayo kumagumbi womane omhlaba, kusukela emikhawulweni yomhlaba kusiya emikhawulweni yamazulu.

28 Manje-ke, fundani lesisifundo esihlahleni somkhiwa: Amahlumela aso angaqalisa ukuba buthakathaka lamahlamvu aso ahlume, lihle lazi ukuthi ihlobo selisondele. 29Kanjalo-ke nxa lingabona lezizinto sezisenzakala, lazi ukuthi sekusondele, khonapho emnyango. 30Ngilitshela iqiniso, lesisizukulwane kasiyikudlula zize zenzakale zonke lezizinto. 31Izulu lomhlaba kuzedlula, kodwa amazwi ami kawayikwedlula lanini.”

Usuku Lesikhathi Kakwaziwa

32 “Kodwa kakho olwaziyo lolosuku lehola, loba izingilosi zasezulwini, kumbe iNdodana, kodwa uBaba kuphela. 33Lindani! Qaphelani! Kalikwazi ukuthi sizafika nini lesosikhathi. 34Kunjengomuntu ezathatha uhambo: utshiya indlu yakhe ayinikele izisebenzi zakhe ukuba ziyilinde, yileso sabelwe owaso umsebenzi, atshele lowo olinda emnyango ukuthi aqaphele.

35 Ngakho lindani ngoba kalikwazi ukuthi umninindlu uzabuya nini, mhlawumbe kusihlwa, kumbe phakathi kwamabili, loba inkukhu sezikhala kumbe emathathakusa. 36Nxa efika masinyane, akangalifici lilele. 37Engikutshoyo kini ngikutsho emuntwini wonke: ‘Lindani!’ ”