2Ki 21 | NdeIBE | STEP | UManase wayeleminyaka elitshumi lambili eqalisa ukubusa njalo wabusa okweminyaka engamatshumi amahlanu lemihlanu eJerusalema. Ibizo likanina lalinguHefizibha.

‏ 2 Kings 21

UManase iNkosi YakoJuda

1 UManase wayeleminyaka elitshumi lambili eqalisa ukubusa njalo wabusa okweminyaka engamatshumi amahlanu lemihlanu eJerusalema. Ibizo likanina lalinguHefizibha. 2 Wenza ububi emehlweni kaJehova, elandela imikhuba eyenyanyekayo yezizwe uJehova ayezixotshile phambi kuka-Israyeli. 3 Wavuselela izindawo zokukhonzela ezazidilizwe nguyise uHezekhiya, wakha lamaalithare kaBhali wenza lensika ka-Ashera, njengalokhu okwakwenziwe ngu-Ahabi inkosi yako-Israyeli. Wakhothamela zonke izinkanyezi zezulu wazikhonza. 4 Wakha ama-alithare ethempelini likaJehova, lona uJehova ayethe, “EJerusalema ngizabeka khona iBizo lami.” 5 Kuwo womabili amaguma ethempeli likaJehova, wakhela izinkanyezi zezulu ama-alithare. 6 Wenza umhlatshelo ngendodana yakhe emlilweni, wavumisa, wenza imilingo, wasebenza lezanuse labemimoya. Wenza okubi kakhulu emehlweni kaJehova, wamthukuthelisa.

7 Wathatha insika ebaziweyo ka-Ashera ayeyenzile wayifaka ethempelini, lona lelo kanye uJehova ayethe kuDavida lakuSolomoni indodana yakhe, “Kulelithempeli lakulo umuzi waseJerusalema, engiwukhethileyo kuzo zonke izizwana zako-Israyeli, ngizabeka iBizo lami kuze kube nini nini. 8 Angiyi kuphinda ngenze izinyawo zabako-Israyeli zizule elizweni engalinika okhokho babo, nxa bezananzelela balandele yonke imilayo engabanika yona bagcine wonke uMthetho abawunikwa nguMosi inceku yami.” 9 Kodwa abantu abalalelanga. UManase wabalahlekisa, ngakho bona kakhulu ukwedlula izizwe uJehova ayezitshabalalise phambi kokuba u-Israyeli angene.

10 UJehova wakhuluma ngezinceku zakhe abaphrofethi wathi: 11 “UManase inkosi yakoJuda wenzile wonke amanyalala. Wenzile izono lezi ezenyanyekayo. Usenze ububi obukhulu obedlula obama-Amori ayekhona ngaphambi kwakhe, njalo usekhokhelele uJuda esonweni ngezithombe zakhe, 12 ngakho-ke nanku okutshiwo nguJehova uNkulunkulu ka-Israyeli: Ngizakwehlisela phezu kweJerusalema loJuda incithakalo ezakwenza izindlebe zakhe wonke oyizwayo zinkenteze. 13 Ngizakwelula phezu kweJerusalema intambo eyasetshenziswa ekulahleni iSamariya, lentambo eyasetshenziswa ekulahleni indlu ka-Ahabi. Ngizakwesula iJerusalema njengomuntu owesula umganu, awesule awumbokothe.

14 Ngizalahla insalela yabantu bami, ngibanikele ezitheni zabo. Bazathunjwa babe yimpango yezitha zabo zonke, 15 ngoba benzile okubi phambi kwami, bangithukuthelisa, kusukela ekuphumeni kwabokhokho babo eGibhithe kuze kube lamuhla.”

16 Futhi uManase wachitha igazi elinengi kakhulu elingelacala waze waligcwalisa iJerusalema kusukela ekuqaleni kwalo kuze kube sekucineni, ngaphandle kwesono ayebangele uJuda ukuba asenze, ngakho benza isono emehlweni kaJehova.

17 Ezinye izehlakalo ngokubusa kukaManase, lakho konke akwenzayo, kanye lesono asenzayo, akulotshwanga yini egwalweni lwembali yamakhosi akoJuda na? 18 UManase waya ekuphumuleni kubokhokho bakhe, wangcwatshelwa esivadeni sesigodlo sakhe, isivande sika-Uza. U-Amoni indodana yakhe wathatha ubukhosi.

U-Amoni iNkosi YakoJuda

19 U-Amoni waba yinkosi eleminyaka engamatshumi amabili lambili, njalo wabusa eJerusalema okweminyaka emibili. Ibizo likanina lalinguMeshulemethi indodakazi kaHaruzi; owayevela eJothibha. 20 Wenza okubi emehlweni kaJehova, njengalokhu okwakwenziwe nguyise uManase. 21 Walandela konke okwakwenziwe nguyise, wakhonza izithombe ezazikhonzwa nguyise, njalo wazikhothamela. 22 Wamdela uJehova wabokhokho bakhe, njalo kazange ahambe ngendlela kaJehova.

23 Izikhulu zika-Amoni zamelana laye zabumba icebo zambulala esigodlweni sakhe.

24 Abantu bakulelolizwe basebebulala ababecebe ukubulala inkosi u-Amoni, basebebeka indodana yakhe uJosiya waba yinkosi, esikhundleni sakhe.

25 Ezinye izehlakalo ngokubusa kuka-Amoni, lakho konke akwenzayo, akulotshwanga yini egwalweni lwembali yamakhosi akoJuda na?

26 Wangcwatshwa ethuneni lakhe esivandeni sika-Uza. UJosiya indodana yakhe wathatha ubukhosi.