1Ki 15 | Ndebele | STEP | Ngomnyaka wetshumi lesificaminwembili wenkosi uJerobhowamu indodana kaNebati uAbhiyamu wasesiba yinkosi phezu kukaJuda .

‏ 1 Kings 15

Ukubusa kukaAbhiyamu

1 Ngomnyaka wetshumi lesificaminwembili wenkosi uJerobhowamu indodana kaNebati uAbhiyamu wasesiba yinkosi phezu kukaJuda ^a. 2 Wabusa iminyaka emithathu eJerusalema. Lebizo likanina lalinguMahaka indodakazi kaAbishalomu ^b. 3 Wasehamba ezonweni zonke zikayise ayezenze phambi kwakhe, lenhliziyo yakhe yayingaphelelanga kuJehova uNkulunkulu wakhe, njengenhliziyo kaDavida uyise ^c. 4 Kodwa ngenxa kaDavida iNkosi uNkulunkulu wakhe yamnika isibane eJerusalema, ngokubeka indodana yakhe emva kwakhe, langokuqinisa iJerusalema. 5 Ngoba uDavida wenza okulungileyo emehlweni eNkosi, kaphambukanga kukho konke eyamlaya khona insuku zonke zempilo yakhe ^d, ngaphandle kwedabeni lukaUriya umHethi ^e. 6 Kwakukhona-ke impi phakathi kukaRehobhowamu loJerobhowamu zonke izinsuku zempilo yakhe ^f.

7 Ezinye-ke zezindaba zikaAbhiyamu, lakho konke akwenzayo, kakubhalwanga yini egwalweni lwemilando yamakhosi akoJuda ^g? Njalo kwaba lempi phakathi kukaAbhiyamu loJerobhowamu ^h. 8 UAbhiyamu waselala laboyise, bamngcwabela emzini kaDavida. UAsa indodana yakhe wasesiba yinkosi esikhundleni sakhe ⁱ.

Ukubusa kukaAsa

9 Ngomnyaka wamatshumi amabili kaJerobhowamu inkosi yakoIsrayeli uAsa wasesiba yinkosi yakoJuda. 10 Wasebusa iminyaka engamatshumi amane lanye eJerusalema. Lebizo likanina lalinguMahaka indodakazi kaAbishalomu. 11 UAsa wasesenza okulungileyo emehlweni eNkosi njengoDavida uyise ^j. 12 Wasusa izinkotshana elizweni ^k, wasusa zonke izithombe oyise ababezenzile ^l. 13 Laye-ke uMahaka unina ^m wamsusa ekubeni yindlovukazi ⁿ, ngoba wayenze into enengekayo ibe yiAshera; uAsa waseyigamula into yakhe enengekayo, wayitshisela esifuleni ^o iKidroni ^p. 14 Kanti indawo eziphakemeyo kazisuswanga ^q; lanxa kunjalo inhliziyo kaAsa yayiphelele kuJehova insuku zakhe zonke. 15 Wasengenisa izinto ezehlukanisiweyo zikayise kanye lezakhe izinto ezehlukanisiweyo endlini yeNkosi, isiliva legolide lezitsha.

Isivumelwano sikaAsa loBenihadadi

16 Kwakukhona-ke impi phakathi kukaAsa loBahasha inkosi yakoIsrayeli zonke izinsuku zabo. 17 UBahasha inkosi yakoIsrayeli wasesenyuka wamelana loJuda ^r, wakha iRama ^s, ukuze angavumeli muntu ukuphuma lokungena kuAsa inkosi yakoJuda ^t. 18 UAsa wasethatha sonke isiliva legolide okwakusele emagugwini endlu kaJehova lamagugu endlu yenkosi, wakunikela esandleni senceku zakhe ^u; inkosi uAsa yakuthumela kuBenihadadi indodana kaTabirimoni indodana kaHeziyoni, inkosi yeSiriya ^v, owayehlala eDamaseko ^w, esithi: 19 Kulesivumelwano phakathi kwami lawe, phakathi kukababa loyihlo; khangela, ngikuthumezela isipho, isiliva legolide ^x. Hamba, yephula isivumelwano sakho loBahasha inkosi yakoIsrayeli, ukuze enyuke asuke kimi. 20 UBenihadadi waseyilalela inkosi uAsa, wathuma induna zamabutho ayelawo emelene lemizi yakoIsrayeli, watshaya iIjoni ^y leDani ^z leAbeli-Beti-Mahaka ^aa layo yonke iKinerothi lelizwe lonke lakoNafithali ^ab. 21 Kwasekusithi uBahasha ekuzwa wayekela ukwakha iRama ^ac, wahlala eTiriza ^ad. 22 Inkosi uAsa yasisenza isimemezelo kuyo yonke iJuda; kakho owayetshiywe ngaphandle; ukuze basuse amatshe eRama lezigodo zayo, uBahasha ayesakha ngakho. Inkosi uAsa wasesakha ngakho iGeba yakoBhenjamini ^ae leMizipa ^af.

23 Ezinye-ke zazo zonke indaba zikaAsa, lawo wonke amandla akhe, lakho konke akwenzayo, lemizi ayakhayo, kakubhalwanga yini egwalweni lwemilando yamakhosi akoJuda ^ag? Kodwa esikhathini sobudala bakhe wayelomkhuhlane ezinyaweni ^ah. 24 UAsa waselala laboyise, wangcwatshelwa kuboyise emzini kaDavida uyise. UJehoshafathi indodana yakhe wasesiba yinkosi esikhundleni sakhe ^ai.

Ukubusa kukaNadabi

25 UNadabi indodana kaJerobhowamu wasesiba yinkosi phezu kukaIsrayeli ngomnyaka wesibili kaAsa inkosi yakoJuda ^aj; wabusa phezu kukaIsrayeli iminyaka emibili. 26 Wasesenza okubi emehlweni eNkosi, wahamba ngendlela kayise, lesonweni sakhe, enza uIsrayeli one ngaso ^ak.

27 UBahasha indodana kaAhiya, owendlu kaIsakari, wasemenzela ugobe ^al; uBahasha wamtshaya eGibethoni engeyamaFilisti ^am, lapho uNadabi loIsrayeli wonke bevimbezele iGibethoni. 28 UBahasha wambulala-ke ngomnyaka wesithathu kaAsa inkosi yakoJuda, wasesiba yinkosi esikhundleni sakhe. 29 Kwasekusithi ekubuseni kwakhe watshaya yonke indlu kaJerobhowamu, katshiyanga loyedwa ophefumulayo kuJerobhowamu, waze wamqeda, njengelizwi leNkosi ^an eyalikhuluma ngesandla senceku yayo uAhiya umShilo ^ao. 30 Ngenxa yezono zikaJerobhowamu azonayo, lowenza uIsrayeli azone, ngentukuthelo yakhe athukuthelisa ngayo iNkosi, uNkulunkulu kaIsrayeli ^ap.

31 Ezinye-ke zezindaba zikaNadabi, lakho konke akwenzayo, kakubhalwanga yini egwalweni lwemilando yamakhosi akoIsrayeli?

Ukubusa kukaBahasha

32 Njalo kwakulempi phakathi kukaAsa loBahasha inkosi yakoIsrayeli insuku zabo zonke ^aq. 33 Ngomnyaka wesithathu kaAsa inkosi yakoJuda uBahasha indodana kaAhiya waba yinkosi phezu kukaIsrayeli wonke eTiriza ^ar; iminyaka engamatshumi amabili lane. 34 Wasesenza okubi emehlweni eNkosi, wahamba ngendlela kaJerobhowamu, lesonweni sakhe, enza uIsrayeli one ngaso ^as.