Deu 28:15-68, 29:20 | Ndebele | STEP | Kodwa kuzakuthi, uba ungalaleli ilizwi leN kosi uNkulunkulu wakho, ukugcina ukwenza yonke imilayo yayo lezimiso zayo engikulaya zona lamuhla, leziziqalekiso zonke zize phezu kwakho zikufice .

15 Kodwa kuzakuthi, uba ungalaleli ilizwi leNkosi uNkulunkulu wakho, ukugcina ukwenza yonke imilayo yayo lezimiso zayo engikulaya zona lamuhla, leziziqalekiso zonke zize phezu kwakho ^a zikufice ^b.

16 Uzaqalekiswa emzini, uqalekiswe futhi ensimini ^c.

17 Kuzaqalekiswa isitsha sakho lomganu wakho wokuxovela izinkwa.

18 Kuzaqalekiswa isithelo sesizalo sakho, lesithelo somhlaba wakho, umqegu wenkomo zakho, lamazinyane ezimvu zakho.

19 Uzaqalekiswa ekungeneni kwakho, uqalekiswe ekuphumeni kwakho.

20 INkosi izathumela phakathi kwakho isiqalekiso ^d, inhlupheko ^e, lokukhuza ^f, kukho konke obeka isandla sakho kukho ukukwenza, uze uchithwe, njalo uze ubhubhe masinyane, ngenxa yobubi bezenzo zakho, ongidele ngazo ^g. 21 INkosi izanamathelisa kuwe umatshayabhuqe wesifo, aze akuqede usuke elizweni oya kulo ukudla ilifa lalo ^h. 22 INkosi izakutshaya ngesifo esicakisayo ⁱ, langoqhuqho, langokuvuvuka komzimba, langokutshisa okukhulukazi, langenkemba ^j, langokuhanguka ^k, langengumane ^l; njalo kuzakuxotsha uze ubhubhe. 23 Lesibhakabhaka sakho esiphezu kwekhanda lakho sizakuba lithusi, lomhlaba ongaphansi kwakho ube yinsimbi ^m. 24 INkosi izakwenza izulu lelizwe lakho libe lubhuqu lothuli, kwehlele phezu kwakho kuvela emazulwini, uze ubhujiswe. 25 INkosi izakwenza utshaywe phambi kwezitha zakho; uzaphuma umelane lazo ngandlelanye, njalo uzabaleka phambi kwazo ngezindlela eziyisikhombisa ⁿ; uzakuba yinto eyesabekayo kuyo yonke imibuso yomhlaba ^o. 26 Lesidumbu sakho sizakuba yikudla kwenyoni zonke zamazulu lokwezinyamazana zomhlaba ^p, njalo kungabi khona ozethusayo ^q. 27 INkosi izakutshaya ngamathumba eGibhithe ^r, lamaqhubu ^s, loqweqwe, lenkomo, ongelakwelatshwa kukho ^t. 28 INkosi izakutshaya ngobuhlanya langobuphofu ^u langokudideka kwenhliziyo ^v. 29 Njalo uzaphumputha emini njengesiphofu siphumputha emnyameni, ungenzi indlela zakho ziphumelele; ucindezelwe kuphela, uphangwe insuku zonke, kungabi khona osindisayo ^w. 30 Uzagana umfazi, kodwa enye indoda ilale laye ^x; uzakwakha indlu, kodwa ungahlali kuyo; uhlanyele isivini, kodwa ungakhi izithelo zaso ^y. 31 Inkabi yakho izahlatshwa phambi kwamehlo akho, ungadli okwayo; ubabhemi wakho athathwe ngodlakela phambi kobuso bakho, angabuyiselwa kuwe; izimvu zakho zizanikwa izitha zakho, kungabi khona okusindiselayo. 32 Amadodana akho lamadodakazi akho azanikelwa kwesinye isizwe, lamehlo akho azakhangela abalangathe usuku lonke ^z; kodwa kungabi lamandla esandleni sakho ^aa. 33 Isithelo somhlaba wakho, lomsebenzi wakho wonke, isizwe ongasaziyo sizakudla. Uzacindezelwa kuphela, uchotshozwe insuku zonke ^ab, 34 uze uhlanye ngenxa yokubona kwamehlo akho ozakubona ^ac. 35 INkosi izakutshaya emadolweni lemilenzeni ngamathumba amabi angelakwelatshwa, kusukela kungaphansi yonyawo lwakho kuze kube senkanda yakho ^ad. 36 INkosi izakusa wena lenkosi yakho owayibeka phezu kwakho esizweni ongasaziyo wena laboyihlo ^ae, ukhonze lapho abanye onkulunkulu, isigodo lelitshe ^af. 37 Uzakuba yinto eyesabekayo ^ag, isaga ^ah, lenhlekisa phakathi kwazo zonke izizwe ^ai, lapho iNkosi ezakusa khona. 38 Uzaphuma lenhlanyelo enengi uye ensimini, kodwa ubuthelele okulutshwana ^aj, ngoba isikhonyane sizakudla ^ak. 39 Uzahlanyela izivini, uzisebenze, kodwa kawuyikunatha iwayini, kawuyikubutha lutho, ngoba imihogoyi izazidla. 40 Uzakuba lezihlahla zemihlwathi phakathi kwemingcele yakho yonke, kodwa kawuyikugcoba ngamafutha, ngoba imihlwathi izawohloka. 41 Uzazala amadodana lamadodakazi, kodwa kawayikuba ngawakho, ngoba azakuya ekuthunjweni ^al. 42 Zonke izihlahla zakho lezithelo zomhlaba wakho zizakuba ngezesikhonyane. 43 Owemzini ophakathi kwakho uzaphakama phezu kwakho aqonge phezulu, wena-ke uzakwehlela phansi phansi ^am. 44 Yena uzakweboleka, kodwa wena ungameboleki ^an; yena uzakuba yinhloko, kodwa wena ube ngumsila ^ao. 45 Lazo zonke leziziqalekiso zizakwehlela, zixotshane lawe, zikufice, uze ubhujiswe, ngoba ungalilalelanga ilizwi leNkosi uNkulunkulu wakho, ukugcina imilayo yayo lezimiso zayo eyakulaya zona ^ap. 46 Njalo zizakuba phezu kwakho ukuba yisibonakaliso lokuba yisimangaliso, laphezu kwenzalo yakho kuze kube nininini. 47 Njengoba ungayikhonzanga ^aq iNkosi uNkulunkulu wakho ngentokozo langokuhle kwenhliziyo ^ar, ngenxa yobunengi bakho konke ^as, 48 ngakho uzakhonza izitha zakho iNkosi ezazithuma ukumelana lawe, endlaleni, lekomeni, lekuhambenize, lekusweleni konke. Njalo izabeka ijogwe lensimbi entanyeni yakho, ize ikubhubhise. ^at 49 INkosi izakuvusela isizwe esivela khatshana, emkhawulweni womhlaba ^au, njengokuphapha kokhozi, isizwe olimi lwaso ongayikuluzwa ^av, 50 isizwe esilobuso obesabekayo, esingemukeli ubuso bomdala, esingelamusa komutsha ^aw. 51 Sizakudla isithelo sezifuyo zakho lesithelo somhlaba wakho, uze ubhujiswe; okungayikukutshiyela amabele, iwayini elitsha, lamafutha, umqegu wenkomo zakho, lamazinyane ezimvu zakho, size sikuchithe ^ax. 52 Sizakuvimbezela emasangweni akho wonke, ize idilike imiduli yakho ephakemeyo lebiyelwe ngemithangala obuthembela kuyo, elizweni lonke lakho; njalo sizakuvimbezela emasangweni akho wonke elizweni lonke lakho iNkosi uNkulunkulu wakho ekunike lona ^ay. 53 Njalo uzakudla isithelo sesizalo sakho, inyama yamadodana leyamadodakazi akho, iNkosi uNkulunkulu wakho ekunike wona ^az, ekuvinjezelweni lekucindezelweni, izitha zakho ezizakucindezela ngakho ^ba. 54 Indoda ebuthakathaka phakathi kwakho letotoziweyo kakhulu, ilihlo layo lizakuba libi kumfowabo ^bb, lakumkayo wesifuba sayo, lakunsali yabantwana bayo ezabatshiya ^bc; 55 ukuze inganiki lamunye wabo okwenyama yabantwana bayo ebadlayo, ngoba ingasalelwanga lutho ekuvinjezelweni lekucindezelweni, izitha zakho ezizakucindezela ngakho emasangweni akho wonke ^bd. 56 Owesifazana obuthakathaka lototoziweyo phakathi kwakho ongazamanga ukubeka ingaphansi yonyawo lwakhe emhlabathini ngenxa yokutotozwa lobuthakathaka ^be, ilihlo lakhe lizakuba libi endodeni yesifuba sakhe, lasendodaneni yakhe, lasendodakazini yakhe ^bf, 57 lakumnakwabo ophuma phakathi kwenyawo zakhe, lebantwaneni azabazala ^bg; ngoba uzabadla ensitha ngenxa yokuswela konke, ekuvinjezelweni lekucindezelweni, isitha sakho esizakucindezela ngakho emasangweni akho ^bh.

58 Uba ungayikugcina ukwenza wonke amazwi alumlayo abhaliweyo egwalweni lolu, ukwesaba lelibizo elilodumo lelesabekayo, iNkosi uNkulunkulu wakho, 59 iNkosi izakwenza-ke inhlupheko zakho zimangalise, lenhlupheko zenzalo yakho, inhlupheko ezinkulu leziqhubekayo, lemikhuhlane emibi leqhubekayo ^bi. 60 Njalo izabuyisela kuwe zonke izifo zeGibhithe owawuzesaba, zizanamathela kuwe ^bj, 61 lawo wonke umkhuhlane layo yonke inhlupheko engabhalwanga egwalweni lwalumlayo, iNkosi izakwehlisela zona uze ubhujiswe. 62 Njalo lizasala lilabantu abalutshwana ^bk, endaweni yokuthi lalinjengenkanyezi zamazulu ngobunengi, ngoba kawulalelanga ilizwi leNkosi uNkulunkulu wakho ^bl. 63 Kuzakuthi-ke, njengalokhu iNkosi yathokoza ngani ukulenzela okuhle lokulandisa ^bm, ngokunjalo iNkosi izajabula ngani ukulichitha lokuliqeda, lihluthunwe elizweni ongena kulo ukudla ilifa lalo ^bn. 64 INkosi izakuhlakazela-ke phakathi kwezizwe zonke, kusukela komunye umkhawulo womhlaba kuze kube komunye umkhawulo womhlaba ^bo, ukhonze lapho abanye onkulunkulu, wena laboyihlo elingabazanga, isigodo lelitshe ^bp. 65 Laphakathi kwalezozizwe kawuyikuphumula, lengaphansi yonyawo lwakho kayiyikuba lendawo yokuphumula ^bq; kodwa lapho iNkosi izakupha inhliziyo ethuthumelayo ^br, lokufiphala kwamehlo ^bs, lokudangala komphefumulo ^bt. 66 Lempilo yakho izahlala isevalweni phambi kwakho; uzatshaywa luvalo ebusuku lemini, ungabi lethemba lempilo yakho. 67 Ekuseni uzakuthi: Kungathi kungahlwa! Lakusihlwa uzakuthi: Kungathi kungasa! ngenxa yokwesaba kwenhliziyo ozakwesaba ngakho ^bu, langenxa yokubona kwamehlo akho ozakubona ^bv. 68 LeNkosi izakubuyisela eGibhithe ngemikhumbi, ngendlela engatsho ngayo kuwe ukuthi ^bw: Kawusayikuyibona futhi. Lapho lizazithengisa ezitheni zakho libe yizigqili lezigqilikazi, kodwa kakuyikuba lomthengi ^bx.

Deuteronomy 29:20

20 INkosi kayiyikuvuma ukumthethelela, kodwa khona intukuthelo yeNkosi ^by lobukhwele bayo kuzathunqela leyondoda, njalo sonke isiqalekiso esibhaliweyo egwalweni lolu sizalala phezu kwayo ^bz, leNkosi icitshe ibizo layo lisuke ngaphansi kwamazulu. ^ca