Exo 35 | Ndebele | STEP | UMozisi wasebuthanisa inhlangano yonke yabantwana bakoIsrayeli, wathi kubo: La ngamazwi iN kosi ewalayileyo ukuthi li wenze .

1 UMozisi wasebuthanisa inhlangano yonke yabantwana bakoIsrayeli, wathi kubo: La ngamazwi iNkosi ewalayileyo ukuthi liwenze ^a. 2 Insuku eziyisithupha kuzakwenziwa umsebenzi ^b, kodwa ngosuku lwesikhombisa kuzakuba yibungcwele kini, isabatha lokuphumula eNkosini; loba ngubani owenza umsebenzi ngalo uzabulawa. 3 Lingabasi umlilo ngosuku lwesabatha kuyo yonke imizi yenu ^c.

Ukunikela umnikelo eNkosini

4 UMozisi wasekhuluma kunhlangano yonke yabantwana bakoIsrayeli esithi: Yile into iNkosi eyilayileyo isithi ^d: 5 Thathani phakathi kwenu umnikelo ube ngoweNkosi; loba ngubani olenhliziyo evumayo kawulethe, umnikelo weNkosi, igolide lesiliva lethusi, 6 lokuluhlaza okwesibhakabhaka lokuyibubende lokubomvu, lelembu elicolekileyo kakhulu, loboya bembuzi, 7 lezikhumba eziphendulwe zababomvu zezinqama, lezikhumba zikamantswane, lezihlahla zesinga, 8 lamafutha ezibane, lamakha amafutha okugcoba lempepha elephunga elimnandi, 9 lamatshe ama-onikse*, lamatshe okubekwa awe-efodi lawesembatho sesifuba. 10 Labo bonke abalenhliziyo ehlakaniphileyo phakathi kwenu ^e kabeze benze konke iNkosi ekulayileyo; 11 ithabhanekele ^f, ithente lalo, lesifulelo salo, ingwegwe zalo, lamapulanka alo, imithando yalo, insika zalo, lezisekelo zalo; 12 umtshokotsho, lemijabo yawo, isihlalo somusa ^g, leveyili lesembeso ^h; 13 itafula, lemijabo yalo, lezitsha zalo zonke ⁱ, lezinkwa zokubukiswa ^j; 14 loluthi lwesibane sesikhanyiso, lezitsha zalo, lezibane zalo ^k, lamafutha esikhanyiso ^l; 15 lelathi lempepha, lemijabo yalo ^m, lamafutha okugcoba ⁿ, lempepha elephunga elimnandi ^o, lesilenge somnyango emnyango wethabhanekele ^p; 16 ilathi lomnikelo wokutshiswa ^q, lesihlengo sethusi elilaso, imijabo yalo, lazo zonke izitsha zalo, inditshi yokugezela lonyawo lwayo ^r; 17 amakhetheni eguma, insika zalo, lezisekelo zazo, lesilenge sesango leguma ^s; 18 izikhonkwane zethabhanekele, lezikhonkwane zeguma ^t, lentambo zazo ^u; 19 izembatho ezifekethisiweyo zokukhonza endaweni engcwele, izembatho ezingcwele zikaAroni umpristi ^v, lezembatho zamadodana akhe, ukusebenza njengabapristi.

Abantu banikela umnikelo wabo

20 Lenhlangano yonke yabantwana bakoIsrayeli yaphuma phambi kukaMozisi. 21 Beza-ke, wonke onhliziyo yakhe eyamvusayo ^w, laye wonke omoya wakhe owamenza wavuma, baletha umnikelo eNkosini emsebenzini wethente lenhlangano lowenkonzo yonke yalo lowezembatho ezingcwele. 22 Beza-ke abesilisa kanye labesifazana, bonke abavumayo ngenhliziyo, baletha iziceco ^x lamacici ^y lendandatho lamasongo ^z, zonke izinto zegolide; laye wonke owazunguza umnikelo wokuzunguzwa wegolide eNkosini. 23 Laye wonke okwatholakala kuye ^aa okuluhlaza okwesibhakabhaka lokuyibubende lokubomvu ^ab lelembu elicolekileyo kakhulu loboya bembuzi lezikhumba eziphendulwe zababomvu zenqama lezikhumba zikamantswane bakuletha. 24 Wonke owanikela umnikelo wokuzunguzwa wesiliva lowethusi bakuletha kungumnikelo wokuzunguzwa weNkosi; laye wonke okwatholakala kuye izihlahla zesinga ezawo wonke umsebenzi wenkonzo baziletha. 25 Labo bonke abesifazana ababehlakaniphile ^ac ngenhliziyo baphotha ngezandla zabo, baletha okuphothiweyo ^ad, okuluhlaza okwesibhakabhaka, lokuyibubende, okubomvu, lelembu elicolekileyo kakhulu. 26 Labo bonke abesifazana abanhliziyo zabo zabavusa ^ae enhlakanipheni baphotha uboya bembuzi ^af. 27 Lezinduna zaletha ^ag amatshe ama-onikse* ^ah lamatshe okubekwa, awe-efodi lawesembatho sesifuba, 28 lamakha ^ai lamafutha ^aj awesibane, lawamafutha okugcoba, lawempepha elephunga elimnandi. 29 Abantwana bakoIsrayeli bawuletha umnikelo wesihle eNkosini ^ak. Bonke abesilisa labesifazana abanhliziyo zabo zabenza bavuma ukulethela wonke umsebenzi iNkosi eyayiwulayile ukuthi wenziwe ngesandla sikaMozisi.

Ukubizwa kukaBhezaleli loOholiyaba

30 UMozisi wasesithi ebantwaneni bakoIsrayeli: Bonani, iNkosi imbizile ngebizo uBhezaleli indodana kaUri, indodana kaHuri owesizwe sakoJuda ^al; 31 imgcwalisile ngoMoya kaNkulunkulu enhlakanipheni, ekuqedisiseni, lelwazini, lemisebenzini yobungcitshi yonke, 32 lokuthi acebe ubungcitshi ukusebenza ngegolide langesiliva langethusi, 33 lekubazeni amatshe okufakwa, lekubazeni izigodo, ukusebenza emisebenzini yonke yeminwe ngobungcitshi. 34 Ifakile laye enhliziyweni yakhe ukufundisa, yena loOholiyaba indodana kaAhisamaki owesizwe sakoDani. 35 Ibagcwalisile ngokuhlakanipha kwenhliziyo ^am, ukwenza wonke umsebenzi wombazi, lowengcitshi, lowomfekethisi ngenalithi ^an, ngokuluhlaza okwesibhakabhaka langokuyibubende, ngokubomvu langelembu elicolekileyo kakhulu, lowomeluki ^ao; besenza wonke umsebenzi beceba ubungcitshi.