Gen 5:0-6:9, 18:26-19:16 | Ndebele | STEP | Lolu lugwalo lwezizukulwana zikaAdamu. Mhla uNkulunkulu edala umuntu, wamenza ngokomfanekiso kaNkulunkulu .

Genesis 5

Inzalo kaAdamu

1 Lolu lugwalo lwezizukulwana zikaAdamu. Mhla uNkulunkulu edala umuntu, wamenza ngokomfanekiso kaNkulunkulu ^a. 2 Wabadala owesilisa lowesifazana, wasebabusisa, wasebiza ibizo labo wathi ngabantu, mhla bedalwa.

3 UAdamu wasephila iminyaka elikhulu lamatshumi amathathu; wasezala indodana efuzweni lwakhe njengokomfanekiso wakhe, wabiza ibizo layo wathi nguSeti ^b. 4 Njalo izinsuku zikaAdamu esezele uSeti zaba yiminyaka engamakhulu ayisificaminwembili ^c; wasezala amadodana lamadodakazi. 5 Zonke-ke izinsuku zikaAdamu, aziphilayo, zaba yiminyaka engamakhulu ayisificamunwemunye lamatshumi amathathu, wasesifa ^d.

6 USeti wasephila iminyaka elikhulu lanhlanu; wazala uEnosi ^e. 7 USeti wasephila esezele uEnosi iminyaka engamakhulu ayisificaminwembili lesikhombisa; wazala amadodana lamadodakazi. 8 Zonke-ke izinsuku zikaSeti zaziyiminyaka engamakhulu ayisificamunwemunye letshumi lambili; wasesifa.

9 UEnosi wasephila iminyaka engamatshumi ayisificamunwemunye, wazala uKenani. 10 UEnosi wasephila, esezele uKenani, iminyaka engamakhulu ayisificaminwembili letshumi lanhlanu; wazala amadodana lamadodakazi. 11 Zonke-ke izinsuku zikaEnosi zaziyiminyaka engamakhulu ayisificamunwemunye lanhlanu; wasesifa.

12 UKenani wasephila iminyaka engamatshumi ayisikhombisa, wazala uMahalaleli. 13 UKenani wasephila, esezele uMahalaleli, iminyaka engamakhulu ayisificaminwembili lamatshumi amane; wazala amadodana lamadodakazi. 14 Zonke-ke izinsuku zikaKenani zaziyiminyaka engamakhulu ayisificamunwemunye letshumi, wasesifa.

15 UMahalaleli wasephila iminyaka engamatshumi ayisithupha lanhlanu, wazala uJaredi ^{▼▼ uJaredi: Heb uJeredi.}. 16 UMahalaleli wasephila, esezele uJaredi, iminyaka engamakhulu ayisificaminwembili lamatshumi amathathu; wazala amadodana lamadodakazi. 17 Zonke-ke izinsuku zikaMahalaleli zaziyiminyaka engamakhulu ayisificaminwembili lamatshumi ayisificamunwemunye lanhlanu; wasesifa.

18 UJaredi wasephila iminyaka elikhulu lamatshumi ayisithupha lambili, wazala uEnoki ^g. 19 UJaredi wasephila, esezele uEnoki, iminyaka engamakhulu ayisificaminwembili; wazala amadodana lamadodakazi. 20 Zonke-ke izinsuku zikaJaredi zaziyiminyaka engamakhulu ayisificamunwemunye lamatshumi ayisithupha lambili; wasesifa.

21 UEnoki wasephila iminyaka engamatshumi ayisithupha lanhlanu, wazala uMethusela. 22 UEnoki wasehamba loNkulunkulu ^h, esezele uMethusela, iminyaka engamakhulu amathathu; wazala amadodana lamadodakazi. 23 Zonke-ke izinsuku zikaEnoki zaziyiminyaka engamakhulu amathathu lamatshumi ayisithupha lanhlanu. 24 UEnoki wasehamba loNkulunkulu; kasekho, ngoba uNkulunkulu wamthatha ⁱ.

25 UMethusela wasephila iminyaka elikhulu lamatshumi ayisificaminwembili lesikhombisa, wazala uLameki. 26 UMethusela wasephila, esezele uLameki, iminyaka engamakhulu ayisikhombisa lamatshumi ayisificaminwembili lambili; wazala amadodana lamadodakazi. 27 Zonke-ke izinsuku zikaMethusela zaziyiminyaka engamakhulu ayisificamunwemunye lamatshumi ayisithupha lesificamunwemunye; wasesifa.

28 ULameki wasephila iminyaka elikhulu lamatshumi ayisificaminwembili lambili, wazala indodana. 29 Wasebiza ibizo layo wathi nguNowa esithi: Lo uzasiduduza ekusebenzeni kwethu lekutshikatshikeni kwezandla zethu ^j, ngenxa yomhlabathi, ewuqalekisileyo iNkosi ^k. 30 ULameki wasephila, esezele uNowa, iminyaka engamakhulu amahlanu lamatshumi ayisificamunwemunye lanhlanu; wazala amadodana lamadodakazi. 31 Zonke-ke izinsuku zikaLameki zaziyiminyaka engamakhulu ayisikhombisa lamatshumi ayisikhombisa lesikhombisa; wasesifa. 32 UNowa waba leminyaka engamakhulu amahlanu, uNowa wasezala uShemu, uHamu, loJafethi ^l.

Genesis 6:1-9

Ukwanda kobubi babantu

1 Kwasekusithi abantu sebeqala ukwanda ebusweni bomhlaba, basebezalelwa amadodakazi, 2 amadodana kaNkulunkulu ebona amadodakazi abantu ukuthi wona ayemahle; asezithathela abafazi kuwo wonke awakhethayo ^m. 3 INkosi yasisithi: UMoya wami kawuyikulwisana lomuntu njalonjalo ⁿ, ngoba laye eyinyama ^o; kodwa izinsuku zakhe zizakuba yiminyaka elikhulu lamatshumi amabili. 4 Iziqhwaga zazisemhlabeni ngalezonsuku; lemva kwalokho-ke, lapho amadodana kaNkulunkulu esengenile emadodakazini abantu, asewazalela abantwana. Wona ayengamaqhawe asendulo, engamadoda alebizo.

5 INkosi yasibona ukuthi ububi bomuntu bukhulu emhlabeni, lokuthi konke ukuceba kwemicabango ^{▼▼ imicabango: Ibala lesiHebheru litsho lenjongo leziloyiso.} yenhliziyo yakhe kwakukubi kuphela usuku lonke ^q. 6 INkosi yasizisola ^r ngokuthi yayimenzile umuntu emhlabeni, yasidabuka enhliziyweni yayo ^s. 7 INkosi yasisithi: Ngizamchitha umuntu engamdalayo ngimsuse ebusweni bomhlaba, kusukela emuntwini kusiya enyamazaneni, kuze kube kokuhuquzelayo, lenyonini zamazulu; ngoba ngiyazisola ukuthi ngikwenzile. 8 Kodwa uNowa wazuza umusa emehlweni eNkosi ^t.

UNowa wenza umkhumbi

9 Lezi yizizukulwana zikaNowa. UNowa wayeyindoda elungileyo ^u epheleleyo ^{▼▼ epheleleyo: kumbe, eqotho.} esizukulwaneni sakhe; uNowa wahamba loNkulunkulu ^w.

Genesis 18:26-33

26 INkosi yasisithi: Uba ngithola eSodoma abalungileyo abangamatshumi amahlanu phakathi komuzi ^x, ngizaxolela yonke indawo ngenxa yabo. 27 UAbrahama wasephendula ^y wathi: Khangela-ke, ngizimisele ukukhuluma eNkosini, lanxa ngiluthuli lomlotha ^z. 28 Mhlawumbe kuzasweleka abahlanu kubo abalungileyo abangamatshumi amahlanu; uzabhubhisa umuzi wonke ngenxa yabahlanu yini? Yasisithi: Kangiyikuwubhubhisa uba ngithola khona abangamatshumi amane lanhlanu. 29 Waseqhubeka elokhu ekhuluma kuyo wathi: Mhlawumbe kuzatholwa khona abangamatshumi amane. Yasisithi: Kangiyikukwenza ngenxa yabangamatshumi amane. 30 Wasesithi: Ngicela iNkosi ingathukutheli lapho ngikhuluma. Mhlawumbe kuzatholwa khona abangamatshumi amathathu. Yasisithi: Kangiyikukwenza uba ngithola khona abangamatshumi amathathu. 31 Wasesithi: Khangela-ke, ngizimisele ukukhuluma eNkosini; mhlawumbe kuzatholwa khona abangamatshumi amabili. Yasisithi: Kangiyikuwubhubhisa ngenxa yabangamatshumi amabili. 32 Wasesithi: Ngicela iNkosi ingathukutheli ^aa, ngizakhuluma khathesi kuphela; mhlawumbe kuzatholwa khona abalitshumi. Yasisithi: Kangiyikuwubhubhisa ngenxa yabalitshumi. 33 INkosi yasihamba isiqedile ukukhuluma kuAbrahama; uAbrahama wasebuyela endaweni yakhe.

Genesis 19:1-16

Ukubhujiswa kweSodoma leGomora

1 Ingilosi ezimbili zasezifika eSodoma ^ab sekuhlwile. LoLothi wayehlezi esangweni leSodoma. Kwathi uLothi ezibona, wasukuma ukuzihlangabeza ^ac, wathi mbo ngobuso emhlabathini; 2 wasesithi: Khangelani-ke makhosi ami, ngicela liphendukele endlini yenceku yenu ^ad, lilale ubusuku, ligeze inyawo zenu ^ae, beselivuka ngovivi, lihambe indlela yenu. Zathi-ke: Hatshi, kodwa sizalala endleleni ^af. 3 Wasezincenga kakhulu zaze zaphendukela kuye zangena endlini yakhe; wazenzela idili, wapheka isinkwa esingelamvubelo, zasezisidla.

4 Zingakalali, amadoda omuzi, amadoda eSodoma, azingelezela indlu, kusukela komutsha kusiya komdala, bonke abantu bevela ephethelweni lomuzi. 5 Asembiza ^ag uLothi athi kuye: Angaphi amadoda afike kuwe lobubusuku? Akhuphele phandle kithi ^ah ukuze siwazi ^ai. 6 ULothi wasephumela kuwo emnyango ^aj, wavala umnyango ngemva kwakhe. 7 Wathi: Ngiyacela bazalwane, lingenzi okubi. 8 Khangelani-ke, ngilamadodakazi amabili, angakazi indoda ^ak; ake ngilikhuphele wona, beselisenza kuwo njengokuhle emehlweni enu; kodwa kulamadoda lingenzi lutho, ngoba yikho engene emthunzini wophahla lwami ^al. 9 Kodwa athi: Xekela le. Athi njalo: Yena lo yedwa wafika engowezizwe ^am, kambe ngeqiniso angaba ngumahluleli ^an? Khathesi sizakwenza okubi kuwe okwedlula wona. Acindezela kakhulu indoda uLothi, asondela ukuze afohloze isivalo. 10 Kodwa lawomadoda elula isandla sawo, amngenisa uLothi kuwo endlini, avala umnyango. 11 Asetshaya amadoda ayesemnyango wendlu ngobuphofu ^ao, kusukela komncinyane kusiya komkhulu, aze adinwa yikudinga umnyango.

12 Amadoda asesithi kuLothi: Useselobani lapha? Umkhwenyana lamadodana akho lamadodakazi akho, laye wonke olaye emzini, mkhuphe kulindawo ^ap, 13 ngoba sizabhubhisa lindawo, ngoba isikhalo sabo sikhulu phambi kweNkosi; njalo iNkosi isithumile ukuthi siyibhubhise. 14 ULothi wasephuma, wakhuluma labakhwenyana bakhe ^aq ababezathatha amadodakazi akhe, wathi: Sukumani liphume kulindawo ^ar; ngoba iNkosi izabhubhisa umuzi. Kodwa waba njengosomayo emehlweni abakhwenyana bakhe.

15 Kwathi emadabukakusa, ingilosi zamcindezela uLothi, zisithi: Suka, uthathe umkakho lamadodakazi akho womabili atholakalayo, hlezi ubhujiswe ebubini ^{▼▼ ebubini: kumbe, ekujezisweni.} bomuzi. 16 Kodwa esazilazila, amadoda abamba isandla sakhe, lesandla somkakhe, lesandla samadodakazi akhe womabili, ngoba iNkosi ilomusa kuye, asemkhupha, ambeka ngaphandle komuzi.