Lev 26:14-39, Deu 28:15-68, 2Ki 17:13-18 | Ndebele | STEP | Kodwa uba lingangilaleli, lingayenzi yonke le imilayo ,

14 Kodwa uba lingangilaleli, lingayenzi yonke le imilayo ^a, 15 njalo uba lidelela izimiso zami, njalo uba umphefumulo wenu unengwa yizahlulelo zami, ukuze lingenzi yonke imilayo yami, ukwephula isivumelwano sami ^b, 16 lami ngizakwenza lokhu kini: Ngizamisa phezu kwenu ukwesaba okukhulu ^c, isifo esicakisayo, lomkhuhlane ^d, okuqeda amehlo, okwenza impilo iphele ^e. Njalo inhlanyelo yenu lizayihlanyelela ize, ngoba izitha zenu zizayidla ^f. 17 Njalo ngizamisa ubuso bami bumelane lani ^g, njalo litshaywe phambi kwezitha zenu ^h. Labalizondayo bazalibusa ⁱ, libaleke kungelamuntu olixotshayo ^j. 18 Kodwa uba ngalezizinto lingangilaleli, ngizakwengeza ngilijezise kasikhombisa ngenxa yezono zenu ^k, 19 ngephule ukuziphakamisa kwamandla enu ^l, ngenze isibhakabhaka senu sibe njengensimbi, lomhlabathi wenu njengethusi ^m; 20 lamandla enu azachithelwa ize ⁿ, ngoba ilizwe lenu kaliyikuveza isivuno salo, lezihlahla zelizwe kaziyikuthela isithelo sazo ^o.

21 Uba-ke lihamba ngokuphambene lami, lingafuni ukungilalela, ngizakwengezelela kini inhlupheko kasikhombisa ngokwezono zenu. 22 Ngizathumela phakathi kwenu izilo zeganga ezizalemuka abantwana benu, zichithe izifuyo zenu, zilenze libe balutshwana ^p, lezindlela zenu zibe yinkangala ^q. 23 Njalo uba lingavumi ukuxwayiswa yimi ngalezizinto, kodwa lihamba ngokuphambene lami ^r, 24 lami ngizahamba ngokuphambene lani, lami ngilitshaye kasikhombisa ngenxa yezono zenu ^s. 25 Ngizakwehlisela inkemba phezu kwenu ezaphindisela impindiselo yesivumelwano. Uba libuthana emizini yenu ^t, ngizathumela umatshayabhuqe wesifo phakathi kwenu, njalo linikelwe esandleni sesitha ^u. 26 Lapho ngilephulela udondolo lwesinkwa, abesifazana abalitshumi bazabhaka isinkwa senu eziko elilodwa, babuyise isinkwa senu ngesisindo ^v; njalo lizakudla, kodwa lingasuthi ^w.

27 Kodwa uba lingangilaleli kulokhu, lihambe ngokuphambene lami ^x, 28 lami ngizahamba ngokuphambene lani ngilentukuthelo ^y, lami ngilijezise kasikhombisa ngenxa yezono zenu. 29 Njalo lizakudla inyama yamadodana enu lenyama yamadodakazi enu lizayidla ^z. 30 Njalo ngizachitha indawo zenu eziphakemeyo ^aa, ngidilize amalathi enu elanga ^ab, ngiphosele izidumbu zenu phezu kwezidumbu zezithombe zenu ^ac, lomphefumulo wami unengwe yini ^ad. 31 Ngizakwenza-ke imizi yenu ibe lunxiwa ^ae, ngidilize izindlu zenu ezingcwele; kangiyikunuka uqhatshi lwenu olumnandi ^af. 32 Mina-ke ngizachitha ilizwe ^ag ukuze izitha zenu ezihlala kulo zikhakhamale ngalo ^ah. 33 Njalo ngizalihlakazela ezizweni, ngihwatshe inkemba emva kwenu; lelizwe lakini lizakuba yincithakalo, lemizi yenu ibe lunxiwa ^ai. 34 Khona ilizwe lizathokoza ngamasabatha alo zonke izinsuku zencithakalo, liselizweni lezitha zenu; khona ilizwe lizaphumula, lithokoze ngamasabatha alo ^aj. 35 Zonke insuku zencithakalo lizaphumula, ngoba kaliphumulanga ngamasabatha enu lisahlala kilo ^ak. 36 Mayelana lalabo abaseleyo phakathi kwenu, ngizathuma ubuthakathaka enhliziyweni zabo emazweni ezitha zabo ^al; lomsindo wehlamvu eliphephukayo uzabaxotsha, bazabaleka njengomuntu obalekela inkemba, bawe kungelamuntu obaxotshayo ^am. 37 Bazakhubeka omunye phezu komunye kungathi kuphambi kwenkemba, kungelamuntu obaxotshayo ^an. Kaliyikuba lakho ukuma phambi kwezitha zenu ^ao. 38 Njalo lizabhubha phakathi kwezizwe, lelizwe lezitha zenu lizakulidla. 39 Labaseleyo phakathi kwenu bazacikizeka ebubini babo emazweni ezitha zabo, yebo lebubini baboyise bazacikizeka kanye labo ^ap.

Deuteronomy 28:15-68

Iziqalekiso zokungalaleli

15 Kodwa kuzakuthi, uba ungalaleli ilizwi leNkosi uNkulunkulu wakho, ukugcina ukwenza yonke imilayo yayo lezimiso zayo engikulaya zona lamuhla, leziziqalekiso zonke zize phezu kwakho ^aq zikufice ^ar.

16 Uzaqalekiswa emzini, uqalekiswe futhi ensimini ^as.

17 Kuzaqalekiswa isitsha sakho lomganu wakho wokuxovela izinkwa.

18 Kuzaqalekiswa isithelo sesizalo sakho, lesithelo somhlaba wakho, umqegu wenkomo zakho, lamazinyane ezimvu zakho.

19 Uzaqalekiswa ekungeneni kwakho, uqalekiswe ekuphumeni kwakho.

20 INkosi izathumela phakathi kwakho isiqalekiso ^at, inhlupheko ^au, lokukhuza ^av, kukho konke obeka isandla sakho kukho ukukwenza, uze uchithwe, njalo uze ubhubhe masinyane, ngenxa yobubi bezenzo zakho, ongidele ngazo ^aw. 21 INkosi izanamathelisa kuwe umatshayabhuqe wesifo, aze akuqede usuke elizweni oya kulo ukudla ilifa lalo ^ax. 22 INkosi izakutshaya ngesifo esicakisayo ^ay, langoqhuqho, langokuvuvuka komzimba, langokutshisa okukhulukazi, langenkemba ^az, langokuhanguka ^ba, langengumane ^bb; njalo kuzakuxotsha uze ubhubhe. 23 Lesibhakabhaka sakho esiphezu kwekhanda lakho sizakuba lithusi, lomhlaba ongaphansi kwakho ube yinsimbi ^bc. 24 INkosi izakwenza izulu lelizwe lakho libe lubhuqu lothuli, kwehlele phezu kwakho kuvela emazulwini, uze ubhujiswe. 25 INkosi izakwenza utshaywe phambi kwezitha zakho; uzaphuma umelane lazo ngandlelanye, njalo uzabaleka phambi kwazo ngezindlela eziyisikhombisa ^bd; uzakuba yinto eyesabekayo kuyo yonke imibuso yomhlaba ^be. 26 Lesidumbu sakho sizakuba yikudla kwenyoni zonke zamazulu lokwezinyamazana zomhlaba ^bf, njalo kungabi khona ozethusayo ^bg. 27 INkosi izakutshaya ngamathumba eGibhithe ^bh, lamaqhubu ^bi, loqweqwe, lenkomo, ongelakwelatshwa kukho ^bj. 28 INkosi izakutshaya ngobuhlanya langobuphofu ^bk langokudideka kwenhliziyo ^bl. 29 Njalo uzaphumputha emini njengesiphofu siphumputha emnyameni, ungenzi indlela zakho ziphumelele; ucindezelwe kuphela, uphangwe insuku zonke, kungabi khona osindisayo ^bm. 30 Uzagana umfazi, kodwa enye indoda ilale laye ^bn; uzakwakha indlu, kodwa ungahlali kuyo; uhlanyele isivini, kodwa ungakhi izithelo zaso ^bo. 31 Inkabi yakho izahlatshwa phambi kwamehlo akho, ungadli okwayo; ubabhemi wakho athathwe ngodlakela phambi kobuso bakho, angabuyiselwa kuwe; izimvu zakho zizanikwa izitha zakho, kungabi khona okusindiselayo. 32 Amadodana akho lamadodakazi akho azanikelwa kwesinye isizwe, lamehlo akho azakhangela abalangathe usuku lonke ^bp; kodwa kungabi lamandla esandleni sakho ^bq. 33 Isithelo somhlaba wakho, lomsebenzi wakho wonke, isizwe ongasaziyo sizakudla. Uzacindezelwa kuphela, uchotshozwe insuku zonke ^br, 34 uze uhlanye ngenxa yokubona kwamehlo akho ozakubona ^bs. 35 INkosi izakutshaya emadolweni lemilenzeni ngamathumba amabi angelakwelatshwa, kusukela kungaphansi yonyawo lwakho kuze kube senkanda yakho ^bt. 36 INkosi izakusa wena lenkosi yakho owayibeka phezu kwakho esizweni ongasaziyo wena laboyihlo ^bu, ukhonze lapho abanye onkulunkulu, isigodo lelitshe ^bv. 37 Uzakuba yinto eyesabekayo ^bw, isaga ^bx, lenhlekisa phakathi kwazo zonke izizwe ^by, lapho iNkosi ezakusa khona. 38 Uzaphuma lenhlanyelo enengi uye ensimini, kodwa ubuthelele okulutshwana ^bz, ngoba isikhonyane sizakudla ^ca. 39 Uzahlanyela izivini, uzisebenze, kodwa kawuyikunatha iwayini, kawuyikubutha lutho, ngoba imihogoyi izazidla. 40 Uzakuba lezihlahla zemihlwathi phakathi kwemingcele yakho yonke, kodwa kawuyikugcoba ngamafutha, ngoba imihlwathi izawohloka. 41 Uzazala amadodana lamadodakazi, kodwa kawayikuba ngawakho, ngoba azakuya ekuthunjweni ^cb. 42 Zonke izihlahla zakho lezithelo zomhlaba wakho zizakuba ngezesikhonyane. 43 Owemzini ophakathi kwakho uzaphakama phezu kwakho aqonge phezulu, wena-ke uzakwehlela phansi phansi ^cc. 44 Yena uzakweboleka, kodwa wena ungameboleki ^cd; yena uzakuba yinhloko, kodwa wena ube ngumsila ^ce. 45 Lazo zonke leziziqalekiso zizakwehlela, zixotshane lawe, zikufice, uze ubhujiswe, ngoba ungalilalelanga ilizwi leNkosi uNkulunkulu wakho, ukugcina imilayo yayo lezimiso zayo eyakulaya zona ^cf. 46 Njalo zizakuba phezu kwakho ukuba yisibonakaliso lokuba yisimangaliso, laphezu kwenzalo yakho kuze kube nininini. 47 Njengoba ungayikhonzanga ^cg iNkosi uNkulunkulu wakho ngentokozo langokuhle kwenhliziyo ^ch, ngenxa yobunengi bakho konke ^ci, 48 ngakho uzakhonza izitha zakho iNkosi ezazithuma ukumelana lawe, endlaleni, lekomeni, lekuhambenize, lekusweleni konke. Njalo izabeka ijogwe lensimbi entanyeni yakho, ize ikubhubhise. ^cj 49 INkosi izakuvusela isizwe esivela khatshana, emkhawulweni womhlaba ^ck, njengokuphapha kokhozi, isizwe olimi lwaso ongayikuluzwa ^cl, 50 isizwe esilobuso obesabekayo, esingemukeli ubuso bomdala, esingelamusa komutsha ^cm. 51 Sizakudla isithelo sezifuyo zakho lesithelo somhlaba wakho, uze ubhujiswe; okungayikukutshiyela amabele, iwayini elitsha, lamafutha, umqegu wenkomo zakho, lamazinyane ezimvu zakho, size sikuchithe ^cn. 52 Sizakuvimbezela emasangweni akho wonke, ize idilike imiduli yakho ephakemeyo lebiyelwe ngemithangala obuthembela kuyo, elizweni lonke lakho; njalo sizakuvimbezela emasangweni akho wonke elizweni lonke lakho iNkosi uNkulunkulu wakho ekunike lona ^co. 53 Njalo uzakudla isithelo sesizalo sakho, inyama yamadodana leyamadodakazi akho, iNkosi uNkulunkulu wakho ekunike wona ^cp, ekuvinjezelweni lekucindezelweni, izitha zakho ezizakucindezela ngakho ^cq. 54 Indoda ebuthakathaka phakathi kwakho letotoziweyo kakhulu, ilihlo layo lizakuba libi kumfowabo ^cr, lakumkayo wesifuba sayo, lakunsali yabantwana bayo ezabatshiya ^cs; 55 ukuze inganiki lamunye wabo okwenyama yabantwana bayo ebadlayo, ngoba ingasalelwanga lutho ekuvinjezelweni lekucindezelweni, izitha zakho ezizakucindezela ngakho emasangweni akho wonke ^ct. 56 Owesifazana obuthakathaka lototoziweyo phakathi kwakho ongazamanga ukubeka ingaphansi yonyawo lwakhe emhlabathini ngenxa yokutotozwa lobuthakathaka ^cu, ilihlo lakhe lizakuba libi endodeni yesifuba sakhe, lasendodaneni yakhe, lasendodakazini yakhe ^cv, 57 lakumnakwabo ophuma phakathi kwenyawo zakhe, lebantwaneni azabazala ^cw; ngoba uzabadla ensitha ngenxa yokuswela konke, ekuvinjezelweni lekucindezelweni, isitha sakho esizakucindezela ngakho emasangweni akho ^cx.

58 Uba ungayikugcina ukwenza wonke amazwi alumlayo abhaliweyo egwalweni lolu, ukwesaba lelibizo elilodumo lelesabekayo, iNkosi uNkulunkulu wakho, 59 iNkosi izakwenza-ke inhlupheko zakho zimangalise, lenhlupheko zenzalo yakho, inhlupheko ezinkulu leziqhubekayo, lemikhuhlane emibi leqhubekayo ^cy. 60 Njalo izabuyisela kuwe zonke izifo zeGibhithe owawuzesaba, zizanamathela kuwe ^cz, 61 lawo wonke umkhuhlane layo yonke inhlupheko engabhalwanga egwalweni lwalumlayo, iNkosi izakwehlisela zona uze ubhujiswe. 62 Njalo lizasala lilabantu abalutshwana ^da, endaweni yokuthi lalinjengenkanyezi zamazulu ngobunengi, ngoba kawulalelanga ilizwi leNkosi uNkulunkulu wakho ^db. 63 Kuzakuthi-ke, njengalokhu iNkosi yathokoza ngani ukulenzela okuhle lokulandisa ^dc, ngokunjalo iNkosi izajabula ngani ukulichitha lokuliqeda, lihluthunwe elizweni ongena kulo ukudla ilifa lalo ^dd. 64 INkosi izakuhlakazela-ke phakathi kwezizwe zonke, kusukela komunye umkhawulo womhlaba kuze kube komunye umkhawulo womhlaba ^de, ukhonze lapho abanye onkulunkulu, wena laboyihlo elingabazanga, isigodo lelitshe ^df. 65 Laphakathi kwalezozizwe kawuyikuphumula, lengaphansi yonyawo lwakho kayiyikuba lendawo yokuphumula ^dg; kodwa lapho iNkosi izakupha inhliziyo ethuthumelayo ^dh, lokufiphala kwamehlo ^di, lokudangala komphefumulo ^dj. 66 Lempilo yakho izahlala isevalweni phambi kwakho; uzatshaywa luvalo ebusuku lemini, ungabi lethemba lempilo yakho. 67 Ekuseni uzakuthi: Kungathi kungahlwa! Lakusihlwa uzakuthi: Kungathi kungasa! ngenxa yokwesaba kwenhliziyo ozakwesaba ngakho ^dk, langenxa yokubona kwamehlo akho ozakubona ^dl. 68 LeNkosi izakubuyisela eGibhithe ngemikhumbi, ngendlela engatsho ngayo kuwe ukuthi ^dm: Kawusayikuyibona futhi. Lapho lizazithengisa ezitheni zakho libe yizigqili lezigqilikazi, kodwa kakuyikuba lomthengi ^dn.

2 Kings 17:13-18

13 Kanti iNkosi yafakaza imelene loIsrayeli njalo imelene loJuda ngesandla sabo bonke abaprofethi lababoni bonke isithi: Phendukani endleleni zenu ezimbi, ligcine imithetho yami, izimiso zami, njengokomlayo wonke engawulaya oyihlo lengawuthumela kini ngesandla senceku zami abaprofethi. 14 Loba kunjalo kabalalelanga, kodwa benza lukhuni intamo yabo, njengentamo yaboyise, abangakholwanga eNkosini uNkulunkulu wabo. 15 Njalo bala izimiso zayo lesivumelwano sayo eyasenza laboyise lezifakazelo zayo eyazifakaza imelene labo, balandela ize, baba yize, balandela izizwe ezazibahanqile, iNkosi eyayibalaye ngazo ukuthi bangenzi njengazo. 16 Bayitshiya yonke imilayo yeNkosi uNkulunkulu wabo, bazenzela izithombe ezibunjwe ngokuncibilikisa, amathole amabili, benza isixuku, bakhothamela lonke ibutho lamazulu, bakhonza uBhali. 17 Benza amadodana abo lamadodakazi abo adabule emlilweni, benza ukuvumisa, benza imilingo, bazithengisela ukwenza okubi emehlweni eNkosi ukuyithukuthelisa. 18 Ngakho iNkosi yamthukuthelela kakhulu uIsrayeli, yabasusa ebusweni bayo; kakusalanga loyedwa ngaphandle kwesizwe sakoJuda kuphela.