Mark 10:17-31

Ijaha elinothileyo

17Esephumele endleleni, omunye wamgijimela ^a, eguqa phambi kwakhe wambuza wathi: Mfundisi olungileyo, ngingenzani ukuze ngidle ilifa lempilo elaphakade ^b? 18UJesu wasesithi kuye: Ungibizelani ngokuthi olungileyo? Kakho olungileyo, ngaphandle koyedwa, uNkulunkulu. 19Uyayazi imilayo ethi: Ungafebi, ungabulali, ungebi, ungafakazi amanga ^c, ungadlelezeli ^d, hlonipha uyihlo lonyoko ^e. 20Wasephendula wathi kuye: Mfundisi, lezizinto zonke ngizigcinile kusukela ebutsheni bami. 21Njalo uJesu emkhangela wamthanda ^f, wathi kuye: Kunye okusweleyo; hamba, uthengise konke olakho, uphe abayanga, njalo uzakuba lokuligugu ezulwini; njalo uze, uthathe isiphambano, ungilandele ^g. 22Kodwa edanile ngalelilizwi wasuka wahamba edabukile; ngoba wayelempahla ezinengi.

23UJesu wasethalaza wathi kubafundi bakhe: Kuzakuba lukhuni kangakanani kwabalenotho ukungena embusweni kaNkulunkulu. 24Abafundi basebemangala ngamazwi akhe ^h. Kodwa uJesu ephendula futhi wathi kubo: Bantwana, kulukhuni kangakanani kwabathembela enothweni ukungena embusweni kaNkulunkulu; 25kulula ukuthi ikamela lithutshe entunjeni yenalithi, kulokuthi umuntu onothileyo angene embusweni kaNkulunkulu ⁱ. 26Basebemangala kakhulukazi, bekhulumisana bathi: Pho kungasindiswa bani ^j? 27UJesu wasebakhangela wathi: Kubantu kakulakwenzeka, kodwa kakunjalo kuNkulunkulu; ngoba zonke izinto ziyenzeka kuNkulunkulu ^k.

Umvuzo wokuzidela

28UPetro waseqala ukuthi kuye: Khangela, thina sitshiye konke, sakulandela. 29UJesu wasephendula wathi: Ngiqinisile ngithi kini: Kakukho muntu otshiye indlu, kumbe abafowabo, kumbe odadewabo, kumbe uyise, kumbe unina, kumbe umkakhe, kumbe abantwana, kumbe amasimu, ngenxa yami levangeli, 30ongayikwemukela ngokwekhulu khathesi ngalesisikhathi, izindlu labafowabo labodadewabo labonina labantwana lamasimu ^l, kanye lokuzingelwa, lempilo elaphakade esikhathini esizayo ^m. 31Kodwa abanengi abokuqala bazakuba ngabokucina, labokucina ngabokuqala.

Luke 18:18-30

Ijaha elinothileyo

18Umbusi ⁿ othile ^o wasembuza, esithi: Mfundisi olungileyo, ngenzeni ukuze ngidle ilifa lempilo elaphakade? 19Kodwa uJesu wathi kuye: Ungibizelani ngokuthi olungileyo? Kakho olungileyo, ngaphandle koyedwa, uNkulunkulu ^p. 20Uyayazi imilayo ethi: Ungafebi, ungabulali, ungebi, ungafakazi amanga, hlonipha uyihlo lonyoko ^q. 21Yena wasesithi: Konke lokhu ngikugcinile kusukela ebutsheni bami. 22Kodwa uJesu esizwa lezizinto wathi kuye: Usaswele ulutho olulodwa; thengisa konke olakho, wabele abayanga, njalo uzakuba lempahla eligugu ezulwini; njalo uze lapha ungilandele. 23Kodwa yena esizwa lezizinto wadana kakhulu; ngoba wayenothile kakhulu.

24Kwathi uJesu ebona ukuthi usedane kakhulu wathi: Abalenotho bazangena ngokulukhuni kangakanani embusweni kaNkulunkulu. 25Ngoba kulula ukuthi ikamela lingene ngentunja yenalithi, kulokuthi umuntu onothileyo angene embusweni kaNkulunkulu. 26Abakuzwayo basebesithi: Pho kungasindiswa bani? 27Kodwa yena wathi: Izinto ezingenzekiyo ebantwini ziyenzeka kuNkulunkulu ^r.

Umvuzo wokuzidela

28UPetro wasesithi: Khangela, thina sitshiye konke, sakulandela. 29Wasesithi kubo: Ngiqinisile ngithi kini: Kakho umuntu otshiye indlu, kumbe abazali, kumbe abafowabo, kumbe umkakhe, kumbe abantwana, ngenxa yombuso kaNkulunkulu, 30ongayikwemukela okuphindwe kanengi ^s kulesisikhathi, lesikhathini esizayo impilo elaphakade ^t.