Mark 13

1Kwathi ephuma ethempelini, omunye wabafundi bakhe wathi kuye: Mfundisi, khangela, amatshe anjani lezakhiwo ezinjani! 2UJesu wasephendula wathi kuye: Uyabona lezizakhiwo ezinkulu yini? Akusoze kutshiywe ilitshe phezu kwelitshe, elingasoze lidilizelwe phansi ^a.

3Esehlezi entabeni yeMihlwathi maqondana lethempeli, uPetro loJakobe loJohane ^b loAndreya bambuza bebodwa, 4bathi: Sitshele, lezizinto zizakuba nini? Lesibonakaliso siyini lapho sezizapheleliswa lezizinto zonke? 5UJesu ebaphendula waseqala ukuthi: Qaphelani kungabi khona oliduhisayo ^c. 6Ngoba abanengi bazakuza ngebizo lami, besithi: Mina nginguye; futhi baduhise abanengi ^d. 7Kodwa nxa lisizwa ngezimpi lamahungahunga ezimpi, lingethuki; ngoba kufanele kwenzeke; kodwa ukuphela kakukabi khona. 8Ngoba isizwe sizavukela isizwe, lombuso uvukele umbuso; njalo kuzakuba khona ukuzamazama komhlaba indawo ngendawo, njalo kuzakuba khona indlala lezinhlupheko; lezizinto ziyikuqala kwemihelo ^e.

9Kodwa ziqapheleni lina ^f; ngoba bazalinikela emiphakathini, lemasinagogeni lizatshaywa, lizalethwa laphambi kwababusi lamakhosi ngenxa yami, kube yibufakazi kubo ^g. 10Kodwa ivangeli limele ukutshunyayelwa kuqala kuzo zonke izizwe ^h. 11Kodwa nxa belidonsa belinikela, lingakhathaleli ngaphambili elizakukhuluma, linganakani; kodwa loba yini elizayinikwa ngalelohola, ikhulumeni; ngoba kakusini elikhulumayo, kodwa uMoya oyiNgcwele ⁱ. 12Futhi umfowabo uzanikela umfowabo ekufeni, loyise umntwana; labantwana bazavukela abazali, besebebabulala; 13njalo lizazondwa yibo bonke ngenxa yebizo lami; kodwa ophikelelayo kuze kube sekupheleni, nguye ozasindiswa.

14Kodwa nxa libona amanyala encithakalo, akhulunywa nguDaniyeli umprofethi, emi lapho angafanele khona (ofundayo kaqedisise), khona labo abaseJudiya kababalekele ezintabeni; 15lophezu kophahla lwendlu angehleli endlini, angangeni ukuthatha ulutho endlini yakhe; 16losemasimini angabuyeli emuva, ukuyathatha isembatho sakhe. 17Kodwa maye kwabakhulelweyo labamunyisayo ngalezonsuku!

18Kodwa khulekani ukuthi ukubaleka kwenu kungabi sebusika. 19Ngoba ngalezonsuku kuzakuba khona ukuhlupheka, okungazanga kube khona kusukela ekuqaleni kokudaliweyo uNkulunkulu akudalayo kuze kube khathesi, lokungasoze kwaba khona. 20Njalo uba iNkosi ibingazifinyezanga lezonsuku, bekungesindiswe nyama; kodwa ngenxa yabakhethiweyo, ebakhethileyo, izifinyezile insuku.

21Langalesosikhathi nxa umuntu esithi kini: Khangelani, nangu uKristu; kumbe: Khangelani, ulaphayana; lingakholwa; 22ngoba kuzavuka okristu bamanga labaprofethi bamanga, besebesenza izibonakaliso lezimangaliso, ukuduhisa, nxa kungenzeka, labakhethiweyo ^j. 23Kodwa qaphelani lina; khangelani, sengilitshelile konke ngaphambili ^k.

24Kodwa ngalezonsuku, emva kwalokhokuhlupheka, ilanga lizafiphazwa, lenyanga kayiyikupha ukukhanya kwayo, 25lenkanyezi zezulu zizabe zisiwa, lamandla asemazulwini azazanyazanyiswa. 26Khona-ke bezabona iNdodana yomuntu isiza emayezini ilamandla amakhulu lenkazimulo, 27khona-ke izathuma ingilosi zayo, ibisiqoqa abakhethiweyo bayo emimoyeni yomine, kusukela emkhawulweni womhlaba kuze kube semkhawulweni wezulu.

28Fundani-ke umfanekiso emkhiweni; nxa ugatsha lwawo selusiba buthakathaka, luhlume amahlamvu, liyazi ukuthi ihlobo seliseduze; 29ngokunjalo lani, nxa libona lezizinto zisenzeka, yazini ukuthi kuseduze kuseminyango ^l.

30Ngiqinisile ngithi kini: Lesisizukulwana asisoze sidlule, zize zenzeke izinto zonke lezi. 31Kuzadlula izulu lomhlaba; kodwa amazwi ami awasoze adlule.

32Kodwa lolosuku lalelohola kakho owaziyo ngakho, ngitsho lengilosi ezisezulwini ^m, ngitsho leNdodana, ngaphandle kukaBaba ⁿ.

33Qaphelani ^o, lilinde likhuleke; ngoba kalazi ukuthi isikhathi sinini ^p. 34Njengomuntu owasuka elizweni lakibo watshiya indlu yakhe, wanika inceku zakhe amandla, kuleyo laleyo umsebenzi wayo ^q, walaya umlindisango ukuthi alinde ^r. 35Ngakho lindani ^s; ngoba kalazi ukuthi inkosi yendlu izafika nini, kusihlwa, loba phakathi kobusuku ^t, loba ekukhaleni kweqhude ^u, loba emadabukakusa ^v; 36hlezi ifike ilijume, ilifice lilele. 37Lalokhu engikutsho kini ngikutsho kubo bonke: Lindani ^w.

Luke 21:5-36

UJesu ukhuluma ngokuchithwa kweJerusalema langokuphela kwesikhathi

5Abanye besakhuluma ngethempeli, ukuthi liceciswe ngamatshe amahle ^x langezipho, wathi: 6Lezizinto elizibonayo, kuzafika insuku okungayikutshiywa ngazo ilitshe phezu kwelitshe, elingayikudilizelwa phansi ^y.

7Basebembuza, besithi: Mfundisi, pho lezizinto zizakuba nini? Lesibonakaliso siyini, lapho sekuzakwenzeka lezizinto? 8Wasesithi: Qaphelani ukuthi lingaduhiswa; ngoba abanengi bazakuza ebizweni lami ^z, besithi: Nginguye ^aa; futhi: Isikhathi sesisondele. Ngakho lingabalandeli ^ab. 9Njalo nxa lisizwa ngezimpi langeziphithiphithi ^ac, lingethuki ^ad; ngoba lezizinto zimele ukuthi zenzeke kuqala, kodwa ukuphela kakuhle kufike ^ae.

10Wasesithi kubo: Isizwe sizavukela isizwe, lombuso uvukele umbuso; 11njalo kuzakuba khona ukuzamazama komhlaba okukhulu indawo ngendawo lezindlala labomatshayabhuqe bezifo; kube khona lezinto ezesabekayo lezibonakaliso ezinkulu ezivela ezulwini.

12Kodwa ngaphambi kwakho konke lokhu bazalibamba ngezandla zabo, balizingele ^af, balinikele emasinagogeni lezintolongweni, balise phambi kwamakhosi lababusi, ngenxa yebizo lami ^ag. 13Njalo lokhu kuzaphenduka kini kube yibufakazi ^ah. 14Ngakho kubekeni enhliziyweni zenu ^ai ukuthi linganakani ngaphambili ngelizakuphendula ^aj; 15ngoba mina ngizalinika umlomo lenhlakanipho, abangekuphike, bamelane lakho ^ak, bonke abayizitha zenu. 16Njalo lizanikelwa langabazali labafowenu lezihlobo labangane, njalo bazabulala abanye benu. 17Njalo lizazondwa yibo bonke ngenxa yebizo lami. 18Kodwa kakuyikulahleka ngitsho unwele lwekhanda lenu ^al. 19Ekubekezeleni kwenu ^am zuzani imiphefumulo yenu ^an.

20Kodwa nxa libona iJerusalema ihanqwe ngamabutho ^ao, yazini-ke ukuthi sekusondele ukuchitheka kwayo ^ap. 21Ngalesosikhathi abaseJudiya kababalekele ezintabeni; labaphakathi kwayo baphume; labasemaphandleni ^aq bangangeni kuyo ^ar. 22Ngoba lezi zinsuku zempindiselo ^as, ukuze kugcwaliseke zonke izinto ezilotshiweyo ^at. 23Kodwa maye kwabakhulelweyo labamunyisayo ngalezonsuku! Ngoba kuzakuba khona ukuhlupheka okukhulu emhlabeni, lolaka kulesisizwe ^au. 24Njalo bazakuwa ngobukhali benkemba, bathunjelwe ezizweni zonke ^av; leJerusalema inyathelelwe phansi ngabezizwe ^aw, kuze kugcwaliseke izikhathi zabezizwe ^ax.

25Kuzakuba khona izibonakaliso elangeni lenyangeni lezinkanyezini; lemhlabeni usizi lwezizwe ngokudideka ^ay; kudume ulwandle lamagagasi, 26abantu baphele amandla ngenxa yokwesaba langokulindela lokho okuzayo emhlabeni; ngoba amandla amazulu azazanyazanyiswa ^az. 27Khona-ke bezayibona iNdodana yomuntu isiza eyezini ilamandla lenkazimulo enkulu. 28Njalo nxa kuqala ukwenzeka lezizinto, manini liqonde njalo liphakamise amakhanda enu ^ba; ngoba kusondele ukukhululwa kwenu ^bb.

29Wasebatshela umfanekiso: Khangelani umkhiwa lazo zonke izihlahla; 30nxa sezihluma, liyazibonela lani likwazi ukuthi ihlobo selisondele. 31Ngokunjalo lani, nxa libona lezizinto zisenzeka, yazini ukuthi umbuso kaNkulunkulu useduze. 32Ngiqinisile ngithi kini: Lesisizukulwana asisoze sidlule, kuze kwenzeke zonke izinto. 33Kuzadlula izulu lomhlaba, kodwa amazwi ami kawasoze adlule ^bc.

34Njalo ziqapheleni ^bd, ukuthi inhliziyo zenu zingasindwa ngenxa yokuminza lokudakwa ^be lokuphisekela izinto zalokhukusila ^bf, lalolosuku lulifikele lingananzelele ^bg; 35ngoba luzafika njengomjibila phezu kwabo bonke abahlezi ebusweni bomhlaba wonke ^bh. 36Ngakho lindani ngezikhathi zonke ^bi likhulekele ^bj ukuthi lifanele ukuphepha zonke lezizinto ezizakwenzeka ^bk, lokuma phambi kweNdodana yomuntu ^bl.