Mark 6:32-44

32Bakhuphuka ngomkhumbi ^a baya endaweni eyinkangala bebodwa ^b. 33Amaxuku asebabona besuka, labanengi bamazi, bagijimela khona kanyekanye ngenyawo bevela emizini yonke, basebebandulela, bahlangana kuye.

34Kwathi uJesu esephuma wabona ixuku elikhulu, waba lesihelo ngabo ^c, ngoba babenjengezimvu ezingelamelusi ^d; waseqala ukubafundisa izinto ezinengi ^e.

35Kwathi isikhathi sesihambile, abafundi bakhe beza kuye bathi: Lindawo iyinkangala, lesikhathi sesihambile; 36bayekele, ukuze baye ezigabeni ezizingelezeleyo lemizaneni bazithengele izinkwa; ngoba bengelalutho abangaludla. 37Wasephendula wathi kubo: Banikeni lina ukuthi badle. Basebesithi kuye ^f: Sihambe yini siyethenga izinkwa ngabodenariyo* abangamakhulu amabili, sibaphe badle ^g? 38Wasesithi kubo: Lilezinkwa ezingaki? Hambani liyebona. Sebesazi bathi: Zinhlanu, lenhlanzi ezimbili. 39Wasebalaya ukuthi babahlalise bonke phansi ngezigaba ngezigaba etshanini obuluhlaza ^h. 40Basebehlala phansi ngamaviyo ngamaviyo, ngamakhulu langamatshumi amahlanu ⁱ. 41Wasethatha izinkwa ezinhlanu lenhlanzi ezimbili, ekhangela phezulu ezulwini, wabonga, wazihlephula izinkwa, wazinika abafundi bakhe ukuthi bazibeke phambi kwabo; lenhlanzi ezimbili wazabela bonke. 42Basebesidla bonke, basutha. 43Basebedobha izitsha ezilitshumi lambili ezagcwala imvuthu ezazisele, lokuseleyo kwenhlanzi. 44Lalabo abadlayo izinkwa, babengaba ngamadoda azinkulungwane ezinhlanu.

Luke 9:10-17

UJesu usuthisa amadoda azinkulungwane ezinhlanu

10Abaphostoli ^j sebebuyile bambikela konke ababekwenzile. Wasebathatha ^k, wahamba labo bebodwa waya endaweni eyinkangala eyomuzi othiwa yiBhethisayida ^l. 11Kwathi amaxuku esekwazi, amlandela; wasewemukela, wakhuluma lawo ngombuso kaNkulunkulu ^m, wabasilisa labo abaswele ukusiliswa ⁿ.

12Ilanga laseliqala ukutshona ^o; abalitshumi lambili basebesiza bathi kuye: Yekela ixuku lihambe, ukuze baye emizaneni lezigabeni ezizingelezeleyo bangenise khona, bathole ukudla ^p; ngoba lapha sisendaweni eyinkangala. 13Kodwa wathi kubo: Banikeni lina bona ukuthi badle. Bathi-ke: Asilakho okwedlula izinkwa ezinhlanu lenhlanzi ezimbili, ngaphandle kokuthi thina siyebathengela ukudla bonke lababantu. 14Ngoba kwakukhona amadoda angaba zinkulungwane ezinhlanu. Wasesithi kubafundi bakhe: Bahlaliseni phansi ngezigaba ngamatshumi amahlanu. 15Basebesenza njalo, babahlalisa phansi bonke. 16Wasezithatha izinkwa ezinhlanu lenhlanzi ezimbili, wakhangela phezulu ezulwini, wazibusisa, wazihlephula, wazinika abafundi ukuthi babeke phambi kwexuku. 17Basebesidla basutha bonke; kwadojwa imvuthu ezazisele kubo, izitsha ezilitshumi lambili.

John 6:1-13

1Emva kwalezizinto uJesu wasuka waya ^q ngaphetsheya kolwandle lweGalili ^r, lweTiberiyasi ^s. 2Laselimlandela ixuku elikhulu, ngoba babebone izibonakaliso zakhe azenza kulabo abagulayo ^t. 3UJesu wasesenyukela entabeni ^u, wahlala phansi khona labafundi bakhe ^v. 4Iphasika, umkhosi wamaJuda, laselisondele ^w.

5Kwathi uJesu ephakamisa amehlo, wasebona ixuku elikhulu lisiza kuye ^x, wathi kuFiliphu ^y: Sizathenga ngaphi izinkwa, ukuze laba badle? 6Njalo watsho lokhu emhlola, ngoba yena wayekwazi azakwenza ^z. 7UFiliphu wamphendula wathi: Izinkwa zabodenariyo* abangamakhulu amabili zingebanele, ukuthi wonke ngamunye wabo azuze ingcosana ^aa. 8Omunye wabafundi bakhe, uAndreya umfowabo kaSimoni Petro ^ab, wathi kuye: 9Kukhona umfanyana lapha, olezinkwa ezinhlanu zebhali* lenhlanzana ezimbili ^ac; kodwa ziyini kwabanengi kangaka? 10Kodwa uJesu wathi: Hlalisani abantu phansi. Kwakukhona utshani obunengi kuleyondawo ^ad. Ngakho amadoda ahlala phansi inani lawo lalingaba zinkulungwane ezinhlanu ^ae. 11UJesu wasezithatha izinkwa, esebongile wazinika abafundi ^af, labafundi kulabo ababehlezi phansi; ngokunjalo lenhlanzana ngangokufuna kwabo ^ag. 12Bathi sebesuthi, wathi kubafundi bakhe: Buthani imvuthu eziseleyo, ukuze kungachitheki lutho. 13Basebebutha, bagcwalisa izitsha ezilitshumi lambili ngemvuthu zezinkwa ezinhlanu zebhali, ezasalayo kulabo abadlayo ^ah.