Mar 9:14-29, Luk 9:37-42 | Ndebele | STEP | Kwathi efika kubafundi, wabona ixuku elikhulu libahanqile , lababhali bephikisana labo .

14 Kwathi efika kubafundi, wabona ixuku elikhulu libahanqile ^a, lababhali bephikisana labo ^b. 15 Lahle lathi ukumbona ixuku lonke laselimangala, lagijimela kuye lambingelela ^c. 16 Wasebabuza ababhali wathi: Liphikisana ngani labo ^d? 17 Omunye wexuku wasephendula wathi: Mfundisi, ngilethe kuwe indodana yami, elomoya oyisimungulu; 18 kuthi loba ngaphi oyibamba khona, uyidabule; ikhihlize amagwebu, igedle amazinyo ayo, yome qha ^e; njalo ngikhulume labafundi bakho ukuthi bawukhuphe, kodwa behluleka. 19 Wasemphendula wathi: O sizukulwana esingelakholo, koze kube nini ngilani? Koze kube nini ngilibekezelela? Iletheni kimi. 20 Basebeyiletha kuye; kwathi umbona, umoya wahle wayihlukuza; yawela emhlabathini ^f, yazigiqagiqa ikhihliza amagwebu ^g. 21 Wasebuza uyise wathi: Kulesikhathi esingakanani, lokhu kwenzeka kiyo? Wasesithi: Kusukela ebuntwaneni. 22 Futhi uyiphosele kanengi emlilweni lemanzini, ukuze uyibhubhise; kodwa nxa kukhona ongakwenza, sihawukele, usisize. 23 UJesu wasesithi kuye: Nxa usenelisa ukukholwa, zonke izinto ziyenzeka kokholwayo. 24 Njalo uyise womntwana wahle wamemeza ngezinyembezi wathi: Ngiyakholwa, Nkosi, siza ukungakholwa kwami ^h. 25 Kwathi uJesu esebona ukuthi ixuku ligijima kanyekanye ndawonye, wakhuza umoya ongcolileyo, esithi kuwo: Wena moya oyisimungulu loyisacuthe, mina ngiyakulaya: Phuma kuye, ungabe usangena kuye ⁱ. 26 Usumemezile, wayihlukuza kakhulu, waphuma ^j; yasisiba njengofileyo, kwaze kwathi abanengi bathi isifile. 27 Kodwa uJesu wayibamba ngesandla, wayiphakamisa; yasisukuma.

28 Wathi esengenile endlini ^k, abafundi bakhe bambuza bebodwa bathi: Kungani thina sehlulekile ukuwukhupha? 29 Wasesithi kubo: Loluhlobo lungeke luphume ngalutho, ngaphandle komkhuleko lokuzila ukudla.

Luke 9:37-42

Ukusiliswa komfana owayelesithuthwane

37 Kwasekusithi ngelanga elilandelayo, sebehlile ^l entabeni, ixuku elikhulu lamhlangabeza ^m. 38 Njalo khangela, indoda exukwini yamemeza, isithi: Mfundisi, ngiyakuncenga, bona indodana yami ⁿ, ngoba yiyo yodwa ezelweyo yami ^o; 39 njalo khangela, umoya uyayibamba, futhi ihle iklabalale ^p, njalo uyihlukuze, ikhihlize amagwebu, uphume nzima kuyo, uyihluzule ^q. 40 Njalo ngincenge abafundi bakho ukuthi bawukhuphe, kodwa abenelisanga. 41 UJesu wasephendula wathi: O sizukulwana esingelakholo lesonakeleyo, kuzaze kube nini ngilani, ngilibekezelela? Ilethe lapha indodana yakho. 42 Kuthe iseza, idimoni layidabula layihlukuza; kodwa uJesu wawukhuza umoya ongcolileyo, wamsilisa umntwana, wambuyisela kuyise.