Mar 9:2-8, Luk 9:28-36 | Ndebele | STEP | Emva kwensuku eziyisithupha uJesu wasethatha uPetro loJakobe loJohane, wasebakhuphulela entabeni ende ebehlukanisa bodwa ; waseguqulwa isimo phambi kwabo;

Mark 9:2-8

Ukukhazimuliswa kukaJesu entabeni

2 Emva kwensuku eziyisithupha uJesu wasethatha uPetro loJakobe loJohane, wasebakhuphulela entabeni ende ebehlukanisa bodwa ^a; waseguqulwa isimo phambi kwabo; 3 lezembatho zakhe zacwazimula, zaba mhlophe nke njengeliqhwa elikhithikileyo, kakulamcoli welembu emhlabeni ongazenza zibe mhlophe kangako ^b. 4 Kwasekubonakala kubo uElija eloMozisi, njalo bekhuluma loJesu. 5 UPetro wasephendula wathi kuJesu: Rabi*, kuhle ukuthi sibe lapha ^c; futhi asakhe amadumba amathathu, elinye ngelakho, lelinye ngelikaMozisi, lelinye ngelikaElija. 6 Ngoba wayengakwazi angakutsho; ngoba babesesaba kakhulu ^d. 7 Kwasekufika iyezi labasibekela; kwaba lelizwi elivela eyezini, lisithi: Lo uyiNdodana yami ethandekayo; zwanini yona. 8 Njalo bahle bathalaza, kababe besabona muntu, kodwa uJesu yedwa elabo.

Luke 9:28-36

Ukukhazimuliswa kukaJesu entabeni

28 Kwasekusithi ^e emva kwalawomazwi ^f, kungaba zinsuku eziyisificaminwembili ^g, wathatha uPetro loJohane loJakobe, wakhwela entabeni ukuyakhuleka ^h. 29 Kwasekusithi ekukhulekeni kwakhe, isimo sobuso bakhe saphenduka, lesembatho sakhe saba mhlophe, sacwazimula ⁱ. 30 Njalo khangela, akhuluma laye amadoda amabili, ayengoMozisi loElija ^j; 31 abonakala ngenkazimulo ^k akhuluma ngokusuka kwakhe ayezakuphelelisa eJerusalema ^l. 32 Kodwa uPetro lababelaye babesindwe yibuthongo ^m; kodwa sebephapheme babona inkazimulo yakhe ⁿ, lamadoda amabili ayemi laye. 33 Kwasekusithi, ekwehlukaneni kwawo laye ^o, uPetro wathi kuJesu: Nkosi ^p, kuhle ukuthi sibe lapha; futhi asakhe amadumba amathathu, elinye ngelakho, lelinye ngelikaMozisi, lelinye ngelikaElija; engakwazi akutshoyo ^q. 34 Kwathi ekhuluma lezizinto, kwafika iyezi labasibekela; basebesesaba ekungeneni kwabo eyezini ^r. 35 Kwasekuphuma ilizwi eyezini, lisithi: Lo uyiNdodana yami ethandekayo; zwanini yona. 36 Kwathi ilizwi selifikile, uJesu waficwa eyedwa. Kodwa bona bathula, kabaze batshela muntu ngalezonsuku okunye kwalezozinto abazibonileyo ^s.