Mat 14:13-21, Mar 6:32-44, Joh 6:1-13 | Ndebele | STEP | UJesu esezwile wasuka lapho ngomkhumbi waya endaweni eyinkangala eyedwa; kodwa amaxuku e ku zwa amlandela ngenyawo evela emizini .

Matthew 14:13-21

UJesu usuthisa amadoda azinkulungwane ezinhlanu

13 UJesu esezwile ^a wasuka lapho ngomkhumbi waya endaweni eyinkangala eyedwa; kodwa amaxuku ekuzwa amlandela ngenyawo evela emizini ^b. 14 UJesu esephumile wabona ixuku elikhulu, waba lesihelo ngabo ^c, wasilisa abagulayo babo ^d.

15 Kwathi sekuhlwile abafundi bakhe beza kuye, bathi: Lindawo iyinkangala, lesikhathi sesihambile ^e; liyekele ixuku lihambe, ukuze baye emizaneni bazithengele ukudla ^f. 16 Kodwa uJesu wathi kubo: Kakuswelekanga ukuthi bahambe; banikeni lina ukuthi badle. 17 Kodwa bathi kuye: Kasila lapha ngaphandle kwezinkwa ezinhlanu lenhlanzi ezimbili. 18 Wasesithi: Ziletheni lapha kimi. 19 Waselaya amaxuku ukuthi ahlale phansi etshanini, wathatha izinkwa ezinhlanu lenhlanzi ezimbili ^g, wakhangela phezulu ezulwini ^h, wabusisa, esezihlephule wabanika abafundi izinkwa, labafundi bapha amaxuku ⁱ. 20 Basebesidla bonke, basutha; badobha imvuthu ezazisele, izitsha ezigcweleyo ezilitshumi lambili ^j. 21 Lalabo abasebedlile babengamadoda angaba zinkulungwane ezinhlanu, ngaphandle kwabesifazana labantwana.

Mark 6:32-44

32 Bakhuphuka ngomkhumbi ^k baya endaweni eyinkangala bebodwa ^l. 33 Amaxuku asebabona besuka, labanengi bamazi, bagijimela khona kanyekanye ngenyawo bevela emizini yonke, basebebandulela, bahlangana kuye.

34 Kwathi uJesu esephuma wabona ixuku elikhulu, waba lesihelo ngabo ^m, ngoba babenjengezimvu ezingelamelusi ⁿ; waseqala ukubafundisa izinto ezinengi ^o.

35 Kwathi isikhathi sesihambile, abafundi bakhe beza kuye bathi: Lindawo iyinkangala, lesikhathi sesihambile; 36 bayekele, ukuze baye ezigabeni ezizingelezeleyo lemizaneni bazithengele izinkwa; ngoba bengelalutho abangaludla. 37 Wasephendula wathi kubo: Banikeni lina ukuthi badle. Basebesithi kuye ^p: Sihambe yini siyethenga izinkwa ngabodenariyo* abangamakhulu amabili, sibaphe badle ^q? 38 Wasesithi kubo: Lilezinkwa ezingaki? Hambani liyebona. Sebesazi bathi: Zinhlanu, lenhlanzi ezimbili. 39 Wasebalaya ukuthi babahlalise bonke phansi ngezigaba ngezigaba etshanini obuluhlaza ^r. 40 Basebehlala phansi ngamaviyo ngamaviyo, ngamakhulu langamatshumi amahlanu ^s. 41 Wasethatha izinkwa ezinhlanu lenhlanzi ezimbili, ekhangela phezulu ezulwini, wabonga, wazihlephula izinkwa, wazinika abafundi bakhe ukuthi bazibeke phambi kwabo; lenhlanzi ezimbili wazabela bonke. 42 Basebesidla bonke, basutha. 43 Basebedobha izitsha ezilitshumi lambili ezagcwala imvuthu ezazisele, lokuseleyo kwenhlanzi. 44 Lalabo abadlayo izinkwa, babengaba ngamadoda azinkulungwane ezinhlanu.

John 6:1-13

1 Emva kwalezizinto uJesu wasuka waya ^t ngaphetsheya kolwandle lweGalili ^u, lweTiberiyasi ^v. 2 Laselimlandela ixuku elikhulu, ngoba babebone izibonakaliso zakhe azenza kulabo abagulayo ^w. 3 UJesu wasesenyukela entabeni ^x, wahlala phansi khona labafundi bakhe ^y. 4 Iphasika, umkhosi wamaJuda, laselisondele ^z.

5 Kwathi uJesu ephakamisa amehlo, wasebona ixuku elikhulu lisiza kuye ^aa, wathi kuFiliphu ^ab: Sizathenga ngaphi izinkwa, ukuze laba badle? 6 Njalo watsho lokhu emhlola, ngoba yena wayekwazi azakwenza ^ac. 7 UFiliphu wamphendula wathi: Izinkwa zabodenariyo* abangamakhulu amabili zingebanele, ukuthi wonke ngamunye wabo azuze ingcosana ^ad. 8 Omunye wabafundi bakhe, uAndreya umfowabo kaSimoni Petro ^ae, wathi kuye: 9 Kukhona umfanyana lapha, olezinkwa ezinhlanu zebhali* lenhlanzana ezimbili ^af; kodwa ziyini kwabanengi kangaka? 10 Kodwa uJesu wathi: Hlalisani abantu phansi. Kwakukhona utshani obunengi kuleyondawo ^ag. Ngakho amadoda ahlala phansi inani lawo lalingaba zinkulungwane ezinhlanu ^ah. 11 UJesu wasezithatha izinkwa, esebongile wazinika abafundi ^ai, labafundi kulabo ababehlezi phansi; ngokunjalo lenhlanzana ngangokufuna kwabo ^aj. 12 Bathi sebesuthi, wathi kubafundi bakhe: Buthani imvuthu eziseleyo, ukuze kungachitheki lutho. 13 Basebebutha, bagcwalisa izitsha ezilitshumi lambili ngemvuthu zezinkwa ezinhlanu zebhali, ezasalayo kulabo abadlayo ^ak.