Mat 17:1-8, Mar 9:2-8 | Ndebele | STEP | Lemva kwensuku eziyisithupha uJesu wathatha uPetro loJakobe loJohane umfowabo, wasekhwela labo entabeni ende bebodwa .

Matthew 17:1-8

1 Lemva kwensuku eziyisithupha uJesu wathatha ^a uPetro loJakobe loJohane umfowabo, wasekhwela labo entabeni ende bebodwa ^b. 2 Waseguqulwa isimo phambi kwabo, njalo ubuso bakhe bakhanya njengelanga, lezembatho zakhe zaba mhlophe njengokukhanya. 3 Futhi khangela, kwasekubonakala kubo uMozisi loElija, bekhuluma laye ^c. 4 UPetro wasephendula wathi kuJesu: Nkosi, kuhle ukuthi sibe lapha ^d. Uba uthanda, asakhe lapha amadumba amathathu, elinye ngelakho, lelinye ngelikaMozisi, lelinye ngelikaElija ^e. 5 Kwathi esakhuluma, khangela, iyezi elikhanyayo labasibekela; futhi khangela, ilizwi laphuma eyezini ^f, lisithi: Lo uyiNdodana yami ethandekayo, engithokoza ngayo ^g; zwanini yona ^h. 6 Sebezwile abafundi ⁱ, bawa phansi ngobuso babo, besaba kakhulu ^j. 7 Kodwa uJesu weza wabathinta wathi ^k: Sukumani lingesabi ^l. 8 Sebephakamisile amehlo abo, kababonanga muntu, ngaphandle kukaJesu yedwa ^m.

Mark 9:2-8

Ukukhazimuliswa kukaJesu entabeni

2 Emva kwensuku eziyisithupha uJesu wasethatha uPetro loJakobe loJohane, wasebakhuphulela entabeni ende ebehlukanisa bodwa ⁿ; waseguqulwa isimo phambi kwabo; 3 lezembatho zakhe zacwazimula, zaba mhlophe nke njengeliqhwa elikhithikileyo, kakulamcoli welembu emhlabeni ongazenza zibe mhlophe kangako ^o. 4 Kwasekubonakala kubo uElija eloMozisi, njalo bekhuluma loJesu. 5 UPetro wasephendula wathi kuJesu: Rabi*, kuhle ukuthi sibe lapha ^p; futhi asakhe amadumba amathathu, elinye ngelakho, lelinye ngelikaMozisi, lelinye ngelikaElija. 6 Ngoba wayengakwazi angakutsho; ngoba babesesaba kakhulu ^q. 7 Kwasekufika iyezi labasibekela; kwaba lelizwi elivela eyezini, lisithi: Lo uyiNdodana yami ethandekayo; zwanini yona. 8 Njalo bahle bathalaza, kababe besabona muntu, kodwa uJesu yedwa elabo.