Matthew 19:16-29

Ijaha elinothileyo

16Njalo khangela, kwasondela omunye wathi kuye ^a: Mfundisi olungileyo, ngizakwenzani okulungileyo, ukuze ngibe lempilo elaphakade? 17Wasesithi kuye: Ungibizelani ngokuthi olungileyo? Kakho olungileyo, ngaphandle koyedwa, uNkulunkulu ^b. Kodwa uba uthanda ukungena ekuphileni, gcina imilayo ^c. 18Wathi kuye: Yiyiphi? UJesu wasesithi: Ungabulali; ungafebi; ungebi; ungafakazi amanga ^d; 19hlonipha uyihlo lonyoko ^e; njalo, wothanda umakhelwane wakho njengalokhu uzithanda wena ^f. 20Ijaha lathi kuye: Konke lokhu ngikugcinile kusukela ebutsheni bami; ngisaswelani? 21UJesu wathi kulo: Uba uthanda ukuphelela ^g, hamba uthengise impahla zakho uphe abayanga ^h, njalo uzakuba lempahla eligugu ezulwini ⁱ; njalo uze lapha, ungilandele. 22Kodwa selizwile lelilizwi ijaha lasuka lidanile; ngoba lalilempahla ezinengi.

23UJesu wasesithi kubafundi bakhe: Ngiqinisile ngithi kini: Onothileyo uzangena ngokulukhuni embusweni wamazulu ^j. 24Njalo futhi ngithi kini: Kulula ukuthi ^k ikamela lingene ngentunja yenalithi, kulokuthi onothileyo angene embusweni wezulu ^l. 25Sebezwile abafundi bakhe bamangala kakhulu, bathi: Pho kungasindiswa bani? 26Kodwa uJesu wabakhangela wathi kubo: Kubantu kakulakwenzeka ^m, kodwa kuNkulunkulu zonke izinto zingenzeka ⁿ.

Umvuzo wokuzidela

27Khona uPetro waphendula wathi kuye: Khangela, thina sitshiye konke sakulandela; pho sizazuzani ^o? 28UJesu wasesithi kubo: Ngiqinisile ngithi kini: Lina elingilandeleyo, ekuvuselelweni lapho iNdodana yomuntu isihlezi esihlalweni sobukhosi senkazimulo yayo ^p, lani lizahlala ezihlalweni zobukhosi ezilitshumi lambili ^q lahlulele izizwe ezilitshumi lambili zakoIsrayeli ^r. 29Laye wonke otshiye izindlu, kumbe abafowabo, kumbe odadewabo, kumbe uyise, kumbe unina, kumbe umkakhe, kumbe abantwana, kumbe amasimu, ngenxa yebizo lami, uzakwemukela ngekhulu, adle ilifa lempilo elaphakade ^s.

Mark 10:17-30

Ijaha elinothileyo

17Esephumele endleleni, omunye wamgijimela ^t, eguqa phambi kwakhe wambuza wathi: Mfundisi olungileyo, ngingenzani ukuze ngidle ilifa lempilo elaphakade ^u? 18UJesu wasesithi kuye: Ungibizelani ngokuthi olungileyo? Kakho olungileyo, ngaphandle koyedwa, uNkulunkulu. 19Uyayazi imilayo ethi: Ungafebi, ungabulali, ungebi, ungafakazi amanga ^v, ungadlelezeli ^w, hlonipha uyihlo lonyoko ^x. 20Wasephendula wathi kuye: Mfundisi, lezizinto zonke ngizigcinile kusukela ebutsheni bami. 21Njalo uJesu emkhangela wamthanda ^y, wathi kuye: Kunye okusweleyo; hamba, uthengise konke olakho, uphe abayanga, njalo uzakuba lokuligugu ezulwini; njalo uze, uthathe isiphambano, ungilandele ^z. 22Kodwa edanile ngalelilizwi wasuka wahamba edabukile; ngoba wayelempahla ezinengi.

23UJesu wasethalaza wathi kubafundi bakhe: Kuzakuba lukhuni kangakanani kwabalenotho ukungena embusweni kaNkulunkulu. 24Abafundi basebemangala ngamazwi akhe ^aa. Kodwa uJesu ephendula futhi wathi kubo: Bantwana, kulukhuni kangakanani kwabathembela enothweni ukungena embusweni kaNkulunkulu; 25kulula ukuthi ikamela lithutshe entunjeni yenalithi, kulokuthi umuntu onothileyo angene embusweni kaNkulunkulu ^ab. 26Basebemangala kakhulukazi, bekhulumisana bathi: Pho kungasindiswa bani ^ac? 27UJesu wasebakhangela wathi: Kubantu kakulakwenzeka, kodwa kakunjalo kuNkulunkulu; ngoba zonke izinto ziyenzeka kuNkulunkulu ^ad.

Umvuzo wokuzidela

28UPetro waseqala ukuthi kuye: Khangela, thina sitshiye konke, sakulandela. 29UJesu wasephendula wathi: Ngiqinisile ngithi kini: Kakukho muntu otshiye indlu, kumbe abafowabo, kumbe odadewabo, kumbe uyise, kumbe unina, kumbe umkakhe, kumbe abantwana, kumbe amasimu, ngenxa yami levangeli, 30ongayikwemukela ngokwekhulu khathesi ngalesisikhathi, izindlu labafowabo labodadewabo labonina labantwana lamasimu ^ae, kanye lokuzingelwa, lempilo elaphakade esikhathini esizayo ^af.