Mat 21:33-46, Luk 20:9-19 | Ndebele | STEP | Zwanini omunye umfanekiso. Kwakukhona umuntu othile ongumninimuzi , owahlanyela isivini , wasibiyela ngothango , wagebha isikhamelo kuso, wakha umphotshongo , wasiqhatshisa kubalimi, waya kwelinye ilizwe .

Matthew 21:33-46

Umfanekiso wabalimi besivini

33 Zwanini omunye umfanekiso. Kwakukhona umuntu othile ongumninimuzi ^a, owahlanyela isivini ^b, wasibiyela ngothango ^c, wagebha isikhamelo ^d kuso, wakha umphotshongo ^e, wasiqhatshisa kubalimi, waya kwelinye ilizwe ^f. 34 Kwathi sekusondele isikhathi sezithelo, wathuma inceku zakhe kubalimi, ukuze zemukele izithelo zakhe. 35 Abalimi basebezibamba inceku zakhe, enye bayitshaya ^g, lenye bayibulala ^h, lenye bayikhanda ngamatshe ⁱ. 36 Wabuya wathuma ezinye inceku ezinengi kulezokuqala ^j; basebesenza njalo kulezo. 37 Ekucineni wasethuma indodana yakhe kubo, esithi: Bazayihlonipha indodana yami ^k. 38 Kodwa abalimi sebeyibonile indodana bakhulumisana besithi: Le yindlalifa ^l; wozani, siyibulale, njalo sibambe ilifa layo ^m. 39 Basebeyibamba ⁿ bayiphosela ngaphandle kwesivini, bayibulala ^o. 40 Ngakho mhla kufika umninisivini, uzabenzani abalimi labo? 41 Bathi kuye: Uzababhubhisa kakubi labo ababi ^p, njalo uzaqhatshisa isivini kwabanye abalimi, abazamnika izithelo ngezikhathi zazo ^q.

42 UJesu wathi kubo: Alikaze lifunde yini emibhalweni ukuthi: Ilitshe abakhi abalalayo, yilo eseliyinhloko yengonsi; lokhu yikwenza kweNkosi; njalo kuyamangalisa emehlweni ethu ^r? 43 Ngakho ngithi kini: Lizakwemukwa umbuso kaNkulunkulu, unikwe isizwe esithela izithelo zawo ^s. 44 Lalowo owela phezu kwalelilitshe uzaphahlazwa ^t; kodwa loba ngubani eliwela phezu kwakhe lizamchoboza ^u.

45 Kwathi abapristi abakhulu labaFarisi sebezwile imifanekiso yakhe bazi ukuthi ubekhuluma ngabo. 46 Kwathi sebedinga ukumbamba ^v besaba amaxuku ^w, ngoba ayemphatha njengomprofethi ^x.

Luke 20:9-19

Umfanekiso wabalimi besivini

9 Waseqala ukutshela abantu lumfanekiso, esithi: Umuntu othile wahlanyela isivini, wasiqhatshisa kubalimi ^y, waya kwelinye ilizwe okwesikhathi eside ^z; 10 kwathi ngesikhathi esifaneleyo wathuma inceku kubalimi, ukuze bayinike okwesithelo sesivini; kodwa abalimi bayitshaya bayithumeza ize. 11 Wasethuma njalo enye inceku; layo bayitshaya bayiyangisa, bayithumeza ize ^aa. 12 Wasephinda ethuma leyesithathu; layo leyo bayilimaza bayiphosela ngaphandle ^ab. 13 Umninisivini wasesithi: Ngizakwenza njani? Ngizathuma indodana yami ethandekayo; mhlawumbe bebona yona bazayihlonipha. 14 Kodwa abalimi beyibona bazindlisana ^ac, besithi: Le yindlalifa; wozani, siyibulale, ukuze ilifa libe ngelethu. 15 Bayiphosela ngaphandle kwesivini, bayibulala. Kambe uzakwenzani kubo umninisivini? 16 Uzakuza, ababhubhise labobalimi, anikele isivini kwabanye. Bekuzwa basebesithi: Akungabinjalo ^ad! 17 Kodwa wabakhangela wathi ^ae: Pho kuyini lokhu okulotshiweyo, okuthi: Ilitshe abakhi abalalayo, yilo eseliyinhloko yengonsi ^af? 18 Wonke owela phezu kwalelolitshe, uzaphahlazwa; kodwa loba ngubani eliwela phezu kwakhe, lizamchoboza.

Umthelo kaKesari

19 Abapristi abakhulu lababhali basebedinga ukumbamba ngezandla ngalelohola, kodwa besaba abantu; ngoba baqedisisa ukuthi wayekhuluma lumfanekiso emelane labo ^ag.