‏ Matthew 22:15-33

Umthelo kaKesari

15Khona-ke abaFarisi basuka, bacebisana ngokuthi bangamthiya njani ekukhulumeni ^a. 16Basebethuma kuye abafundi babo kanye labakaHerodi ^b, besithi: Mfundisi, siyazi ukuthi wena uqotho, ufundisa indlela kaNkulunkulu ngeqiniso, kawukhathaleli muntu, ngoba kawunanzi isimo sabantu ^c. 17Ngakho sitshele, wena ucabangani? Kuvunyelwe yini ukuthela ^d kuKesari, kumbe hatshi ^e? 18Kodwa uJesu ebazi ububi babo wathi ^f: Bazenzisi, lingilingelani ^g? 19Ngitshengisani imali yokuthela. Basebeletha kuye udenariyo*. 20Wasesithi kubo: Ngokabani lumfanekiso lalumbhalo? 21Bathi: NgokaKesari. Wasesithi kubo: Ngakho mnikeni uKesari izinto zikaKesari; loNkulunkulu izinto zikaNkulunkulu ^h. 22Kwathi sebezwile bamangala; bamtshiya bahamba ⁱ.

Ukuvuka kwabafileyo

23Ngalolosuku kweza kuye abaSadusi ^j, abathi kakukho ukuvuka kwabafileyo ^k, basebembuza, 24besithi: Mfundisi, uMozisi wathi: Uba umuntu esifa engelabantwana, umfowabo uzamthatha umkakhe, amvusele umfowabo inzalo ^l. 25Kwakukhona phakathi kwethu izelamani eziyisikhombisa; owokuqala wasethatha umfazi wafa; futhi engelanzalo, watshiya umkakhe kumfowabo. 26Kwaba njalo lowesibili, lowesithathu, kwaze kwaba kowesikhombisa. 27Kwathi emva kwabo bonke kwafa lomfazi. 28Ngakho ekuvukeni kwabafileyo, uzakuba ngumkabani kwabayisikhombisa? Ngoba bonke babelaye. 29Kodwa uJesu waphendula wathi kubo: Liduhile, lingayazi imibhalo ^m, loba amandla kaNkulunkulu ⁿ; 30ngoba ekuvukeni kwabafileyo kabathathani, kabendiswa ^o, kodwa banjengengilosi zikaNkulunkulu ezulwini. 31Kodwa mayelana lokuvuka kwabafileyo ^p, kalifundanga yini okwakhulunywa kini nguNkulunkulu, esithi: 32Mina nginguNkulunkulu kaAbrahama, loNkulunkulu kaIsaka, loNkulunkulu kaJakobe ^q? UNkulunkulu kayisuye uNkulunkulu wabafileyo, kodwa owabaphilayo. 33Kwathi amaxuku ekuzwa amangala kakhulu ngokufundisa kwakhe ^r.

‏ Mark 12:13-27

Umthelo kaKesari

13Basebethuma kuye abanye babaFarisi labakaHerodi ^s, ukuze bamthiye ekukhulumeni ^t. 14Basebesiza bathi kuye: Mfundisi, siyazi ukuthi wena uqotho, njalo kawukhathali ngomuntu; ngoba kawunanzi isimo somuntu, kodwa ufundisa indlela kaNkulunkulu ngeqiniso ^u: Kuvunyelwe yini ukuthela kuKesari kumbe hatshi? 15Sithele, kumbe singatheli? Kodwa ekwazi ukuzenzisa kwabo wathi kubo: Lingilingelani ^v? Lethani kimi udenariyo*, ukuze ngibone. 16Basebeletha. Wasesithi kubo: Ngokabani lumfanekiso lalumbhalo ^w? Basebesithi kuye: NgokaKesari. 17UJesu wasephendula wathi kubo: Mnikeni uKesari okukaKesari, loNkulunkulu okukaNkulunkulu. Basebemangala ngaye.

Ukuvuka kwabafileyo

18Basebesiza kuye abaSadusi, abathi kakukho ukuvuka kwabafileyo; basebembuza, besithi: 19Mfundisi, uMozisi wasibhalela, ukuthi: Uba umfowabo womuntu esifa, atshiye umkakhe, engatshiyi bantwana, umfowabo kamthathe umkakhe, amvusele umfowabo inzalo ^x; 20kwakulezelamani eziyisikhombisa; owokuqala wasethatha umfazi, wafa engatshiyanga inzalo; 21lowesibili wamthatha, wafa, laye engatshiyanga inzalo; lowesithathu kwaba njalo; 22lalaba boyisikhombisa bamthatha, kabatshiyanga inzalo. Ekucineni kwabo bonke kwafa lomfazi. 23Ngakho ekuvukeni kwabafileyo, mhla bevukayo, uzakuba ngumkabani kubo; lokhu abayisikhombisa babelaye engumkabo? 24UJesu wasephendula wathi kubo: Kaliduhanga yini ngalokhu, ngoba lingayazi imibhalo, loba amandla kaNkulunkulu? 25Ngoba mhla bevukayo ekufeni, kabathathani, njalo kabendiswa, kodwa banjengengilosi ezisemazulwini. 26Kodwa mayelana labafileyo, ukuthi bayavuswa, kalifundanga yini egwalweni lukaMozisi, ukuthi uNkulunkulu esihlahleni wakhuluma njani kuye ^y, esithi: NginguNkulunkulu kaAbrahama, loNkulunkulu kaIsaka, loNkulunkulu kaJakobe ^z? 27Kayisuye uNkulunkulu wabafileyo, kodwa uNkulunkulu wabaphilayo; ngakho lina liduhile kakhulu.