Mat 27:57-61, Luk 23:50-56, Joh 19:38-42 | Ndebele | STEP | Kwathi sekuhlwile , kwafika umuntu onothileyo evela eArimathiya , ibizo lakhe linguJosefa, owayengumfundi kaJesu laye ;

Matthew 27:57-61

Ukungcwatshwa kukaJesu

57 Kwathi sekuhlwile ^a, kwafika umuntu onothileyo evela eArimathiya ^b, ibizo lakhe linguJosefa, owayengumfundi kaJesu laye ^c; 58 yena waya kuPilatu, wacela isidumbu sikaJesu. UPilatu waselaya ukuthi isidumbu asinikwe ^d. 59 UJosefa wasethatha isidumbu wasigoqela ngelembu elicolekileyo elihlambulukileyo, 60 wasibeka engcwabeni lakhe elitsha ^e, elaligujiwe edwaleni ^f; wasegiqela ilitshe elikhulu emnyango wengcwaba, wahamba ^g.

61 Futhi kwakukhona lapho uMariya Magadalena ^h, lomunye uMariya, behlezi maqondana lengcwaba ⁱ.

Luke 23:50-56

Ukungcwatshwa kukaJesu

50 Njalo khangela, indoda ethiwa nguJosefa ^j, ilunga lomphakathi ^k, indoda elungileyo eqotho ^l; 51 yena wayengavumelananga lecebo lesenzo sabo; wayevela eArimathiya umuzi wamaJuda, laye ngokwakhe ^m wayelindele umbuso kaNkulunkulu ⁿ; 52 lowo waya kuPilatu wacela isidumbu sikaJesu. 53 Wasesethula wasigoqela ngelembu elicolekileyo, wasibeka engcwabeni elaligujwe edwaleni, lapho okwakungazanga kubekwe khona umuntu ^o. 54 Kwakulusuku lwamalungiselelo, lesabatha ^p laselisondela ^q. 55 Labesifazana, ababeze laye bevela eGalili ^r, balandela, balibona ingcwaba, lokuthi isidumbu sibekwe njani ^s. 56 Basebebuyela emuva balungisa amakha lamagcobo ^t. Ngesabatha basebephumula njengokomlayo ^u.

John 19:38-42

Ukungcwatshwa kukaJesu

38 Kwathi emva kwalezizinto uJosefa weArimathiya ^v, owayengumfundi kaJesu, kodwa ngasese ngenxa yokwesaba amaJuda ^w, wacela kuPilatu ukuthi asuse isidumbu sikaJesu; futhi uPilatu wavuma. Ngakho weza wasisusa isidumbu sikaJesu. 39 Kwasekusiza loNikodima ^x, owafika kuJesu kuqala ebusuku, ephethe inhlanganiso ^y yemure* ^z lenhlaba ^aa engaba amaphawundi alikhulu ^ab. 40 Basebesithatha isidumbu sikaJesu, basibopha ngamalembu acolekileyo kanye lamakha ^ac, njengomkhuba wamaJuda wokungcwaba ^ad. 41 Njalo kwakukhona kuleyondawo ayebethelwe khona isivande, lesivandeni kwakulengcwaba elitsha, okwakungazange kubekwe muntu kulo. 42 Basebembeka lapho uJesu ngenxa yamalungiselelo amaJuda, ngoba ingcwaba laliseduze ^ae.