Mat 9:18-26, Luk 8:41-56 | Ndebele | STEP | Kwathi esakhuluma lezizinto kubo , khangela, kwafika umphathi othile waguqa phambi kwakhe, wathi: Indodakazi yami isanda ukufa; kodwa woza ubeke isandla sakho phezu kwayo, njalo izaphila .

Matthew 9:18-26

Indodakazi kaJayirosi ivuswa ekufeni. Owesifazana owayelomopho uyasiliswa

18 Kwathi esakhuluma lezizinto kubo ^a, khangela, kwafika umphathi othile waguqa phambi kwakhe, wathi: Indodakazi yami isanda ukufa; kodwa woza ubeke isandla sakho phezu kwayo, njalo izaphila ^b. 19 Wasesukuma uJesu wamlandela, labafundi bakhe.

20 Njalo khangela, owesifazana owayelomopho okweminyaka elitshumi lambili ^c, weza ngemuva kwakhe, wathinta umphetho wesembatho sakhe. 21 Ngoba wathi ngaphakathi kwakhe: Aluba ngithinta nje isembatho sakhe, ngizasindiswa ^d. 22 Kodwa uJesu etshibilika embona, wathi: Mana isibindi, ndodakazi; ukholo lwakho lukusindisile. Owesifazana wasesila kusukela ngalelohola ^e.

23 UJesu wasefika endlini yomphathi, wabona abakhalisa imihlanga lexuku liphithizela ^f, 24 wathi kubo: Dedani; ngoba intombazana kayifanga ^g, kodwa ilele. Basebemhleka usulu ^h. 25 Kodwa ixuku selikhutshiwe, wangena wabamba isandla sayo, intombazana yasivuka. 26 Indumela yalokho yasiphumela kulelolizwe lonke ⁱ.

Luke 8:41-56

41 Njalo khangela, kwafika indoda, uJayirosi ngebizo, yona ingumphathi wesinagoge, yasisiwa phansi enyaweni zikaJesu yamncenga ukuthi angene endlini yayo ^j; 42 ngoba yayilendodakazi eyodwa ezelweyo eyayingaba leminyaka elitshumi lambili ^k, njalo yona yayisisifa. Kwathi esahamba amaxuku amcindezela. 43 Lowesifazana owayelomopho wegazi okweminyaka elitshumi lambili, echithe konke okwempilo yakhe kubelaphi engelakusiliswa langubani ^l, 44 wasondela ngemva kwakhe, wathinta umphetho wesembatho sakhe ^m; njalo wahle wakhawula umopho wegazi lakhe. 45 UJesu wasesithi: Ngubani ongithintileyo? Kwathi lapho bephika bonke, uPetro wathi lababelaye: Nkosi ⁿ, ixuku likuminyanisile likucindezele, kodwa uthi: Ngubani ongithintileyo? 46 Kodwa uJesu wathi: Ukhona ongithintileyo; ngoba mina ngazile ukuthi amandla aphumile kimi. 47 Kwathi owesifazana ebona ukuthi kafihlakalanga, weza ethuthumela, wawa phambi kwakhe ^o, walandisa phambi kwabantu bonke ukuthi umthinte ngesizatho bani, lokuthi uhle wasila njani. 48 Wasesithi kuye: Mana isibindi, ndodakazi, ukholo lwakho lukusindisile ^p; hamba ngokuthula ^q. 49 Esakhuluma, kwafika umuntu evela endlini yomphathi wesinagoge, wathi kuye: Indodakazi yakho isifile; ungamhluphi uMfundisi. 50 Kodwa uJesu esizwa, wamphendula, wathi: Ungesabi; kholwa kuphela, njalo izasindiswa. 51 Futhi esengenile endlini, kavumanga ukuthi kungene muntu, ngaphandle kukaPetro loJakobe loJohane, loyise wendodakazi lonina. 52 Njalo bakhala bonke, beyililela ^r. Kodwa wathi: Lingakhali; kayifanga, kodwa ilele. 53 Basebemhleka usulu, besazi ukuthi ifile. 54 Kodwa yena esebakhuphele phandle bonke, wabamba isandla sayo, wamemeza, esithi: Ndodakazi, vuka! 55 Wasubuya umoya wayo, yasivuka khona lapho; waselaya ukuthi kayiphiwe ukudla. 56 Abazali bayo basebemangala kakhulu ^s; kodwa wabalaya ukuthi bangatsheli muntu okwenzakeleyo ^t.