‏ 1 Corinthians 16

Dat .xvi. Capittel. 1MAer van die vergaderinge der aelmoesen die ghedaen worden den heylighen, doet ghi ooc alsoo ick gheordineert hebbe die kercken van Galatien, 2op eenen dach vander sabbathen soo sal een ieghelijck onder v by sij seluen wechlegghen, oplegghende tghene dat hem belieuen sal, op dat die vergaderinghen der almissen dan niet en ghescieden als ick comen sal, 3Ende als ick teghenwoordich sijn sal, soo sal ick, die ghene die ghy met brieuen sult prijsen, senden om v weldaet ouer te draghen in Ierusalem, 4Ende eest dat noot sal sijn dat icker henen gae, soo sullen sij met my gaen, 5Ende ick sal tot v lieden comen als ick door Macedonien ghepasseert sal wesen, want ic sal door Macedonien gaen, 6Maer by v lieden sal ick by auontueren blijuen, oft ooc ouerwinteren, op dat ghi my gheleyt werwaerts dat ick gaen sal, 7Want ick en wil v nv niet inden doorganc sien, want ic hope noch een wat tijts by v lieden te blijuen, eest dat die Heere ghehenghen sal, 8maer ick sal te Ephesen blijuen tot sinxenen toe, 9Want my is een groote ende openbaer doere open ghedaen, ende daer sijn veel teghenpartijders 10Maer eest dat Timotheus coemt, siet toe dat hy sonder vreese sij by v lieden, want hy werct des Heeren werck soo als ic, 11Daerom niemant en versmade hem maer gheleydt hem in vrede, dat hi tot my come, want ic verwachte hem met den broeders, 12Maer vanden broeder Apollo laet ick v weten dat ick hem vele ghebeden hebbe dat hy tot v comen soude met die broeders, ende ten was waerlijck sijnen wille niet dat hy nv comen soude, maer hy sal comen alst hem sal gheleghen sijn, 13Waect, staet int ghelooue, doet manlijck, ende wert versterct, 14alle uwe dinghen laet in die liefde ghedaen worden, 15Maer ic bidde v broeders, ghy kent wel Stephane ende Fortunatus huys, want si sijn dierste vruchten van Achaien, ende totten dienst der heylighen hebben sij hen seluen ghescict, 16op dat ghy oock onderdanich sijt alsulcken, ende eenen yeghelijcken die mede werct ende arbeyt, 17Ende ick verblijde my van die teghenwoordicheyt van Stephane ende Fortunati ende Achaici, want sij hebben tghene dat v lieden ghebrack voldaen, 18want si hebben vermaect mijnen gheest ende oock den uwen, Daerom kentse die alsulck sijn, 19Die kercken van Asien groeten v lieden, V lieden groeten seere inden Heere Aquila ende Pruscila met die vergaderinghe van haren huysghenooten, 20V groeten alle die broeders, Groet malcanderen met een heylich cussen, 21Die groete ghescreuen mijnder hant Pauli is. 22Soo wie niet lief en heeft onsen Heere Iesum Christum, die si Anathema Maran-atha, 23Die gratie ons Heeren Iesu Christi sij met v lieden, 24Mijn liefde si met v allen in Christo Iesu Amen. Hier voleynt dierste Epistel van sinte Pauwels totten Corinthien.