2Th 1 | NldLeuv1548 | STEP | PAULUS ende Siluanus, ende Timotheus der kercken van die Thessalonicensen in Gode onsen vader, ende den Heere Iesu Christo,

‏ 2 Thessalonians 1

Dat ierste Capittel. 1 PAULUS ende Siluanus, ende Timotheus der kercken van die Thessalonicensen in Gode onsen vader, ende den Heere Iesu Christo, 2 Gratie sij v lieden ende vrede van Gode onsen vader ende den Heere Iesu Christo. 3 Wi moeten altijt Gode dancken voer v lieden broeders, alsoo alst recht is, want v ghelooue wast ouerlijcke seere, ende die liefde elcs van v lieden tot malcanderen neemt seer toe, 4 alsoo dat wy selue oock in v lieden glorieren in Gods kercke, van v verduldicheyt, ende ghelooue in alle uwe veruolghinghen ende tribulatien, die ghi verdraecht 5 tot een exempel van Godts rechtuerdich ordeel, op dat ghy moecht weerdich ghehouden worden des rijcs Godts. Waer om dat ghy oock lijdet. 6 Eest nochtans rechtuerdich voor Godt tribulatie te verghelden den ghenen die v lijden aen doen, 7 ende v lieden die ghetribuleert wort ruste met ons in die openbaringhe ons Heeren Iesu vanden hemel, met die enghelen sijnder cracht, 8 in die vlamme des viers doende wrake ouer die ghene die Godt niet ghekent en hebben, ende die niet onderdanich en sijn der euangelie ons Heeren Iesu Christi, 9 die pijnen lijden sullen ter doot eewelijck duerende, van daenschijn des Heeren, ende van die glorie sijnder macht, 10 als hy sal comen om gheglorificeert te worden in sijn heyleghen, ende wonderlijck te worden in alle die ghene die ghelooft hebben (Om dat ons ghetuyghenis ghelooft is gheweest ouer v lieden) in dien dach. 11 Waer in dat wy oock bidden altijt voor v lieden, dat onse Godt v wil weerdich houden tot sijnen roep, ende dat hy volbringhe alle den wille der goetheyt, ende dwerck des gheloofs in die cracht, 12 op dat ghepresen mach worden den naem ons Heeren Iesu Christi in v lieden, ende ghy in hem, nae die gratie ons Godts, ende ons Heeren Iesu Christi.