2Th 3 | NldLeuv1548 | STEP | VOertaen broeders biddet voer ons, dat het woert Godts mach loopen ende verclaert worden, ghelijck dat oock gheweest is by v lieden,

‏ 2 Thessalonians 3

Dat .iij. Capittel. 1 VOertaen broeders biddet voer ons, dat het woert Godts mach loopen ende verclaert worden, ghelijck dat oock gheweest is by v lieden, 2 ende dat wy moghen verlost worden van die quellijcke ende quade menschen. Want het ghelooue en is alder menschen niet, 3 maer die Heere is ghetrouwe die v vestighen sal, ende bewaren van tquaet. 4 Ende wy hebben betrouwen van v lieden inden Heere, dat ghy tghene dat wy ghebieden, oock doet, ende doen sult. 5 Maer die Heere bescicke v herten, in die liefde Godts, ende in die verduldicheyt Christi.

✣ 6 Maer wy vercondighen v broeders inden naem ons Heeren Iesu Christi, dat ghy v seluen aftrect van allen broeders die onghescictelijck wandelt, ende niet nae die insettinghe die sij van ons ontfanghen hebben. 7 Want ghy selue weet wel, hoe datmen ons moet nauolghen, want wy en hebben niet ongherustich gheweest onder v lieden. 8 Noch wy en hebben om niet gheen broot gheten van iemanden, maer in arbeyt ende vermoetheyt dach ende nach werckende, op dat wy niemanden van v lieden lastich wesen en souden. 9 Niet als oft wy dies gheen macht en hadden ghehadt, maer om dat wy v lieden eenen spieghel gheuen souden om ons nae te volghen. 10 Want doen wy oock by v lieden waren, soe vercondichden wy v lieden dit, dat soo wie niet en wilt wercken, dat die niet en ete. 11 Want wy hebben ghehoort datter onder v lieden sommighe sijn die ongherustelijck wandelen, niet werckende, maer curioeselijck leuende. 12 Maer den ghenen die alsulck sijn vercondighen, ende bidden wy inden Heere Iesu Christo, dat sij met stillicheyt werckende, hen selfs broot eten. 13 Maer ghy broeders en wilt niet ophouden van wel te doen. ✴ 14 Eest datter iemant niet ghehoorsaem en is onsen woerde, teekent dien doer eenen brief, ende en houdt gheen ghemeynscap met dien, op dat hy bescaemt worde, 15 ende en wilt dien niet als eenen viant houden, maer straft hem als eenen broeder. 16 Ende die selue Heere des vreeds gheue v lieden eewighen vrede in allen plaetsen. Die Heere sij met v allen. 17 Die groete met mijn handt Pauli dwelck is een teeken in allen brieuen, alsoo scrijue ick. 18 Die gratie ons Heeren Iesu Christi sij met v allen. Amen. Hier voleyndt die tweede Epistel van Sinte Pauwels tot die Thessalonicensen.