‏ Colossians 3

Dat .iij. Capittel. ✣ 1DAer om eest dat ghy mede verresen sijt met Christo, soe soect die die dinghen die bouen sijn, daer Christus is aen die rechte handt Godts sittende. 2Smaect die dinghen die bouen sijn, niet die op der eerden sijn. 3Want ghy sijt doot, ende v leuen is verborghen met Christo in Gode. 4Als Christus hem openbaren sal v leuen, dan suldi ghy oock openbaren met hem in die glorie. ✴ ✣ 5Daer om doodt v leden die op deerde sijn, hoereringhe, onnatuerlijcke onsuyuerheyt, quade lusticheyt, quade begheerten ende ghiericheyt welck is afgoderie, 6om die welck Godts gramscap coemt op die kinderen der ongheloouicheyt, 7in die welcke ghy oock somtijts ghewandelt hebt, doen ghy daer in leefde. 8Maer nu legghet ghy oock al af, tornicheyt, verbolghenheyt, archeyt, blasphemie. oneerbaer sprake van uwen mont. 9En wilt malcanderen niet lieghen. V seluen ontcledende van den ouden mensch met sijnen wercken, 10ende den nieuwen aendoende den ghenen die vernieut wort ter kennissen nae sijn beelt die hem ghescapen heeft, 11daer noch heydene en is, noch Iode, besnijdenisse, noch ombesnedenheyt, Barbarus, noch Schyta, eyghen knecht, noch vrij mensch, maer Christus eest al ende in allen.

✣ 12Daer om doet v seluen aen als wtuercorene Gods heylighe ende beminde, die binnenste der bermherticheyt, goedertierenheyt, ootmoedicheyt, maenierlijcheyt verduldicheyt, 13verdraghende malcanderen, ende quijtscellende malcanderen eest datter iemant teghen iemanden eenighe clachte heeft, ghelijck die Heere v lieden oock quijt ghescouden heeft, alsoe doet ghy oock. 14Maer bouen alle dese, soe hebt die liefde, welck is den bant der volmaectheyt, 15ende den vrede Christi, houde die ouerhant in v lieder herten, in den welcken ghy oock gheroepen sijt in een lichaem ende weest dancbarich. 16Dat woert Christi woone in v lieden oueruloedelijck, in alle wijsheyt, leerende ende vermanende malcanderen met psalmen, lof sanghen, ende gheestelijcke liedekens, in gratien singhende in v herten Gode. 17Alle dat ghy doet tsij in woerden oft in wercken doet dat al in den naem des Heere Iesu Christi, danckende Godt, ende den vader doer hem. ✴ 18Ghy vrouwen weest onderdanich uwen mans, alsoo dat behoort inden Heere. 19Ghy mans hebt lief v huysvrouwen, ende en wilt niet bitter sijn tot haer. 20Ghy kinderen weest onderdanich uwen ouders in alles, want dat is behaghelijck in den Heere. 21Ghy vaders en wilt v kinderen niet tot onweerdicheyt verwecken, dat sij niet cleyn moedich en worden. 22Ghi knechten weest in alles onderdanich uwen vleeschelijcken heeren, niet scoon voer die ooghen dienende als den menschen behaghende, maer in simpelheyt des herten Godt vreesende. 23Alle dat ghy doet werct dat wter herten als den Heere, ende niet den menschen, 24wetende dat ghy vanden Heere sult ontfanghen den loon der erffenissen. Den Heere Christo dient, 25want wie onrecht doet die salt weder ontfanghen dat hy onrechtelijck ghedaen heeft, ende daer en is gheen wtnemen der persoonen by Gode.