‏ Ephesians 3

Dat .iij. Capittel. 1VEr saken van desen. Ic Paulus een gheuangene Iesu Christi voor v lieden ghy heydenen 2eest nochtans also dat ghi ghehoort hebt, dat bedienen der gratien Godts dwelc my ghegheuen is in v lieden, 3Want nae dopenbaringhe is my kenlijc geworden die verborghentheyt, alsoo ic bouen ghescreuen hebbe int corte, 4ghelijc ghy lesende moecht verstaen mijn verstandicheyt in Christus verborgentheyt, 5dwelc in die ander gheslachten den kinderen der menschen niet en is kenlijc gheweest, ghelijc dat nv gheopenbaert is sijnen heylighen apostelen ende propheten inden geest, 6dat die heydenen souden sijn mede erfghenamen, ende van eenen lichaem, ende mede deelachtich van sijnder beloften in Christo Iesu doort euangelie, 7Des welcs dienaer ick gheworden ben, nae die gaue der gratien Gods, die mi ghegheuen is nae dwerck sijnder cracht, 8my den alderminsten der heylighen is dese gratie ghegheuen, Onder die heydenen te vercondighen die ongrondelijcke rijcdommen Christi, 9ende alle menschen kenlijck te maken welc dat het wtdeylen is van die verholentheyt die verborghen is gheweest van tbeghin der werelt in Gode, die alle dinghen ghescapen heeft, 10op dat den ouerheyden ende machten in die hemelen door die kercke kenlijc soude worden die menigherande wijsheyt Gods, 11nae die voorgescictheyt der tijden, die hy ghemaect heeft in Christo Iesu onsen Heere, 12Inden welcken wij betrouwen hebben, ende eenen toeganc int betrouwen door sijn ghelooue. ✣ 13Waerom bidde ick v dat ghy niet en verflauwt in mijn tribulatien voor v lieden, welc v glorie is, 14Ter saken van desen buyghe ic mijn knyen totten vader ons Heeren Iesu Christi, 15wten welcken alle vaderlijcheyt in die hemelen ende in deerde ghenoemt wort, 16op dat hi v lieden gheue nae die rijcdommen sijnder glorien, cracht om doer sijnen gheest versterct te worden inden inwendighen mensche, 17dat Christus in v herten mach woonen doort ghelooue, inder liefden ghewortelt ende ghefundeert, 18op dat ghy moecht begrijpen met alle die heylighen, welck dat is die breetheyt, ende lancheyt, ende hoocheyt, ende diepte, 19om oock te weten die bouen al gaende liefde van Christus kennisse op dat ghy veruult mocht worden in alle volheyt Gods, 20Maer den ghenen die machtich is alle dinghen te doen oueruloedelijcker dan wi begheren oft verstaen, nae die cracht die in ons werct, 21hem si glorie in die kercke ende in Christo Iesu in alle die gheslachten van die eewicheyt totter eewicheyt. Amen. ✴