Isa 64 | NldLeuv1548 | STEP | OCh oft ghy die hemelen schoordet, en de nederdaeldet, van v aensicht souden die berghen affuloeyen.

‏ Isaiah 64

Dat .lxiiij. Capittel. 1 OCh oft ghy die hemelen schoordet, ende nederdaeldet, van v aensicht souden die berghen affuloeyen. 2 Als een verbrandinghe des viers souden sij verdwijnen, die wateren souden metten viere bernen, opdat uwen naem soude bekent worden uwen vianden, Van v aensichte souden die Heydenen verbaest worden. 3 Als ghy wonderlijcke dinghen doen sult, soo en sullen wijt niet verdraghen, ghy sijt neder ghedaelt, ende van v aensicht sijn die berghen affgheuloeyt. 4 Van tbeghin der werelt en hebben sijt niet ghehoort, noch metten ooren gheuaet, gheen ooghe Heere en heeft ghesien sonder v, dat ghy bereydt hebt den ghenen die v verwachten. 5 Ghy sijt te ghemoete ghecomen den vrolijcken ende den ghenen die rechtuerdicheyt doet, in v weghen sullen sij ws ghedencken, siet ghy sijt gram, ende wij hebben ghesondicht, wij hebben altijts daer in gheweest, ende wij sullen salich ghemaect worden. 6 Ende wij allegader sijn gheworden als een onsuyuere, ende als dlaken der maensuchtigher vrouwen sijn alle onse rechtuerdicheden, ende wij sijn allegader gheuallen als een loof, ende onse boosheyt hebben ons als eenen wint wech ghenomen. 7 Daer en is niemant die uwen naem aenroepe, die opstae, ende v houde, ghi hebt v aensicht van ons verborghen, ende ghy hebt ons ghestooten in die hant onser boosheyt. 8 Ende nv ghy Heere sijt onse vader, maer wij sijn voorwaer slijm der aerden, ende ons scepper zijt ghy, ende uwer handen wercken sijn wi allegader. 9 En wilt Heere niet te seer gram sijn, ende en wilt voorts niet meer gedachtich wesen onser boosheyt, siet aenmerct v volc sijn wij allegader. 10 Die stadt van uwen heylighe is woest gheworden. Sion is woest gheworden, Ierusalem is verlaten. 11 Het huys onser heylichmakinghen, ende onser glorien, daer v onse vaderen gheloeft hebben, is gheworden tot een verberringe des viers, ende alle onse lusticheden sijn verkeert tot veruallinghen. 12 Suldy v hier ouer onthouden Heere, suldi swijghen, ende ons seer crachtelijck quellen?